‘चित्र बनाउँदा बाल्यकालमा फर्किन्छु’- जीवनशैली - कान्तिपुर समाचार
डा. कोजुसँग चित्रका कुरा

‘चित्र बनाउँदा बाल्यकालमा फर्किन्छु’

बुनु थारु

काठमाडौँ — हरियाली वातावरणमा केटाकेटीहरू रमाइरहेका छन् । कोही चंगा उडाइरहेका छन् त कोही टायर गुडाउँदै छन्। कोही डमरु पनि बजाउँदै छन् । अनि रुखको छेउमै केही व्यक्ति लंगुरबुर्जामा झुम्मिएका छन् । आफ्नो बाल्यकालको दसैंको स्मृति चित्रमार्फत पस्किएका डा. राजेन्द्र कोजुको यो चित्रले दसैंको छनक दिन्छ ।

उनको अर्को चित्रमा घरको बन्द कोठाभित्र मानिसहरू कोही खाटमा पल्टिएर त कोही भित्तामा अडेस लगाएर मोबाइल चलाउन व्यस्त देखिन्छन्। केहीबच संवाद भएको पनि देखिँदैन । उनका यी दुई चित्रले कसरी समय फेरिएसँगै दसैंको त्यो उल्लास र उमंग अहिले प्रविधिले ढाकेको छ भन्ने यथार्थ प्रस्तुत गर्छ ।

दसैंको छेको पारेर डा. कोजुले आफूले कोरेको ‘त्यो दसैं, यो दसैं’ चित्र फेसबुकमा पोस्ट गरेका थिए जुन धेरैले रुचाए । धुलिखेलका ५५ वर्षीय डा. कोजु मुटुरोग विशेषज्ञ हुन् । फुर्सदको समयमा किताब तथा गीत गुनगुनाउन मन पराउने उनी चित्र कोर्न पनि रुचि राख्छन् । विद्यालय पढ्दादेखि नै पेन्सिलबाट स्केच कोर्न मनपराउने उनी प्राय: प्रकृति, भगवान, गाडी, हवाइजहाजका चित्रहरू बनाउँथे। मेडिसिन पढ्दा एनाटोमीको विषयमा शिक्षकले उनलाई बोर्डमा शरीरको संरचना बनाउन लगाउँदा उनी हौसिँदै बनाउथे।

‘म त सैद्धान्तिक प्रश्नमा पनि चित्रसहित उत्तर दिन्थेँ ।स्केच बनाउन मजा लाग्थ्यो,’ उनले हाँस्दै भने । एमबीबीएस पढ्न थालेपछि भने चित्र कोर्न फुर्सद कम मिल्न थाल्यो । कोभिडको समयमा भने उनले आफ्नो रुचीलाई निरन्तरता दिन पाए ।त्यसबखत धेरै चित्रहरू कोरे । अहिले पनि फुर्सदको समयमा विशेषगरी शनिबार मुड चलेको बेला चित्र कोर्न बसिहाल्छन् । प्रायः उनी बेलुकाको समयमा नभए मुड चलेको बेला चित्र बनाउन सुरु गर्छन् । डटपेनबाट स्केच दिमागमा फुरेको बेला जहाँ पनि बनाइदिन्छन्।

उनले पेन्सिल, डटपेनले कोरेका स्केच तथा डिजिटल पेन्टिङहरू पोस्ट गरिरहन्छन् ।उनका धेरैजसो चित्रमा बाल्यकालीन स्मृति पोखिएको हुन्छ ।साइकल चलाएको, चंगा उडाएको, झरीमा पानी कागजे डुंगा बनाएर खेलेको सम्झनाहरू उनी चित्रमा उतार्छन् । त्यसैगरी कतै घुम्न जाँदा कुनै ठाउँको मनमोहक दृश्यलाई पनि कसरी चित्रमा उतार्ने होला भनेर सोच्छन् ।


डा. कोजु भन्छन्, ‘धेरैले सम्झिने भनेको बाल्यकाल हो त्यसैले ती सम्झनाहरू उतार्न रमाइलो लाग्छ ।सामाजिक अवस्था अनि ठाउँ विशेषको चित्रहरू पनि कहिलेकाहीँ कोर्छु ।’ उनले वाटर कलरबाट पेन्टिङ सिकेका छन् । युट्युबबाट तरिका सिकेका उनी ओयल पेन्टिङ पनि गर्छन् साथै डिजिटिल पेन्टिङ गर्न पनि रुचाउँछन् । डा. कोजुलाई कुनै चित्र बनाउँदा ५ दिनसम्म लागेको छ । प्रायः ओयल पेन्टिङ बनाउन समय लाग्ने उनी बताउँछन् । कहिलेकाहीँ उनी २ देखि ३ घण्टासम्मै बनाइसक्छन् । केही चित्रहरू भने अपुरो पनि छोडेका छन् ।

उनी धेरैजसो सम्झनामा अड्किएका दृश्यहरूलाई कागजमा उतार्छन् भने केही फोटो हेरेर पनि बनाउँछन् । सम्झिँदै चित्र बनाउँदा आफू त्यही समयमा यात्रा गरिरहेको जस्तो आभास हुने डा. कोजु बताउँछन् ।‘जस्तै बाल्यकालका सम्झनाहरू बनाउँदा त्यही समयमा यात्रा गरेको जस्तो लाग्छ । जस्तै धुलिखेलमा बसेर फेवातालको चित्र बनाउँदा तालको नजिकै छु जस्तो लाग्छ । चित्र बनाउँदा मेडिटेसन गरेजस्तो लाग्छ ।रमाइलो अनुभव गर्छु,’ उनले भने ।

पेन्टिङको सौखिन उनले घरमा हिमाल, पुरानो काठमाडौं, नेपाली मुखाकृतिहरू घरको भित्तामा झुन्ड्याएका छन् । पेन्टिङ पसलामा जाँदा उनी पेन्टिङ हेर्दै घण्टौं डुब्छन् । साथीभाइलाई कहिलेकाहीँ उपहार पनि दिन्छन्। उनले पनि सानो थान्काको उपहार पाएका छन्। उनले बनाएको घण्टाघरको चित्र पनि धेरैले मनपराएका थिए केही साथीहरूले त आफिसमा राख्नका लागि राम्रो छ भनेर मागे पनि ।

उनी आफूले बनाएका २ वटा पेन्टिङ आफू कार्यरत धुलिखेल अस्पतालमा राखेका छन् । घरमा भने राखेका छैनन् । भविष्यमा अलि धेरै जम्मा भएपछि राख्ने उनको योजना छ । डा. कोजु भन्छन्,‘प्रदर्शनीमा जानुपर्ला भनेर सोचेको थिएँ तर त्यति धेरै चित्रहरू छैनन् ।रुचि हुनाले बनाइराख्ने हो ।ठूलो स्केचहरू छैनन्।’

प्रकाशित : आश्विन ३०, २०७९ १८:१५
प्रतिक्रिया
पठाउनुहोस्

ओनसरी जिताउन शीर्ष नेताहरूको जोडबल

प्रकाश धौलाकोटी

काठमाडौँ — सत्ता गठबन्धनका शीर्ष नेताहरू आइतबार गठबन्धनको पहिलो चुनावी सभामा सहभागी भए । काठमाडौं क्षेत्र नं. २ मा गठबन्धनले गरेको सभामा नेपाली कांग्रेसका सभापति एवं प्रधानमन्त्री शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल र नेकपा एकीकृत समाजवादीका अध्यक्ष माधवकुमार नेपालले सम्बोधन गरे ।

गठबन्धनले मुलुकलाई ठूलो दुर्घटनाबाट बचाएको भन्दै संविधानको रक्षा, विकास र आर्थिक समृद्धिका लागि देशभर गठबन्धनलाई जिताउनुपर्ने नेताहरूको जोड थियो ।

रोचक त के भने गठबन्धनको पहिलो चुनावी सभामा बोलेका माओवादी केन्द्रका अध्यक्ष दाहाल र समाजवादीका अध्यक्ष नेपालले सम्बोधन गर्दा ‘लाल सलाम’ सँगै ‘जय नेपाल’ भनेर सम्बोधन सुरू गरे । प्रधानमन्त्री देउवाले भने सम्बोधनमा अभिवादन गरेनन्, बरू दाहाललाई हँसिया हथौडा र नेपाललाई कलम चुनाव चिन्ह भनेर चिनाए ।

सभामा बोल्दै देउवा, दाहाल र नेपालले सत्ता गठबन्धन र सरकारको गुणगान त गाए नै, तर त्योभन्दा धेरै यहाँबाट उम्मेदवार बनेकी ओनसरी घर्तीलाई जिताउन आग्रह गरे, उनको प्रशंसा गरे, मन्त्री बनाउने वचन समेत दिए । नेताहरूको बोलीमा रोल्पाबाट काठमाडौं आएर उम्मेदवारी दिएकी घर्तीलाई जिताउन जोडबल प्रष्टै झल्किन्थ्यो ।

प्रधानमन्त्री शेरबहादुर देउवाले घर्तीले सभामुख हुँदा पार्टीको नेताका रुपमा नभई निष्पक्ष भूमिका निर्वाह गरेको भन्दै प्रसंसा गरेका थिए । ‘ओनसरी घर्ती अत्यन्तै साहसी महिला हुनुहुन्छ । उहाँले कुशलताका साथ सभामुखको भूमिका निर्वाह गर्नुभएको थियो,’ देउवाले भने, ‘मलाई त विश्वास पनि थिएन, उमेर सानै थियो, सभामुख के चलाउनुहोला भनेको त सबैभन्दा सफल तरिकाले उहाँले संसद चलाउनुभयो ।’

देउवाले घर्तीले माओवादी केन्द्रबाट निर्वाचित भएपनि कहिल्यै पार्टीको आशीर्वाद नखोजेको चर्चा गरे । राष्ट्रहितलाई केन्द्रमा राखेर काम गर्ने गरेको भन्दै देउवाले घर्तीलाई भारी मत दिएर जिताउन अपिल समेत गरे ।

नेकपा माओवादी केन्द्रका अध्यक्ष पुष्पकमल दाहालले भने काठमाडौं–२ गठबन्धनको जितको लागि आफूहरूको उपस्थिति नै महत्वपूर्ण रहेको बताए । ‘प्रधानमन्त्री र हामी पूर्वप्रधानमन्त्रीहरूसहित शीर्ष नेताहरू हामी यहाँ आइपुगेका छौँ, यो हाम्रो उपस्थिति मात्रै होइन, आगामी निर्वाचनकोलागि गठबन्धन गरिसकेपछिको यो पहिलो कार्यक्रम हो,’ उनले भने, ‘यसलाई महत्वका साथ बुझ्न आग्रह गर्दछु ।’

उनले ओनसरीलाई जिताएर पठाउन आग्रह गर्दै उनलाई मन्त्री बनाउने प्रतिवद्धता समेत जनाए । ‘तपाईहरू निर्धक्कसँग उहाँलाई मत दिनुस् । उहाँले जे प्रतिवद्धता जनाउनुहुन्छ, त्यो पूरा गर्नुहुन्छ । उहाँलाई जिताएर पठाउनुस्, राम्रो विकासेमन्त्री बनाएर काम गर्ने मौका म दिलाउँछु,’ दाहालले भने ।

कांग्रेसका नेता कार्यकर्ताले हँसिया हथौडामा मत नदिने भनेर टिप्पणी गरेकाप्रति दाहालले अर्को टिप्पणी गरे ।

‘हँसिया हथौडाले रुखमा कसरी भोट हाल्ने ? रुखले हँसिया हथौडामा कसरी भोट हाल्ने ? अहिले यस्तो आग्रह–पुर्वाग्रह हुने गरेको कुरा सुनेको छु । तर यो अर्थहीन छ,’ दाहालले अघि भने, ‘म तपाईहरूलाई स्मरण गराउन चाहान्छु कि हामीले धेरै पहिले नै रुख र हँसिया हथौडालाई एक बनाइसकेका हौँ । जति बेला हामीले शान्ति सम्झौता गर्‍यौँ, त्यो बेला सात दलको तर्फबाट कांग्रेसबका सभापति गिरिजाप्रसाद कोइराला र माओवादीको तर्फबाट मैले हस्ताक्षर गरेको थिएँ । त्यो भनेकै मैले रुखमा र गिरिजाप्रसाद कोइरालाले हँसिया हथौडामा छाप हाने बराबर हो ।’

गत निर्वाचनमा यही क्षेत्रबाट निर्वाचित भएका एकीकृत समाजवादीका अध्यक्ष माधवकुमार नेपालले पनि यसपटक काठमाडौं–२ ले झन् योग्य उम्मेदवार पाएको बताए । ‘देशको सभामुख भइसकेको ओनसरीजी यहाँबाट तपाईहरूको उम्मेदवार हुनुहुन्छ । उहाँले यहाँबाट चुनाव लड्नु र जनप्रतिनिधि बन्छु भन्नु आफैँमा गौरवको विषय हो,’ नेपालले भने ।

सभामा प्रतिनिधिसभा सदस्य पदकी उम्मेदवार घर्तीले जोरपाटी–साँखु सडकखण्ड आफू निर्वाचित भएपछि दुईवर्षभित्र कालोपत्रे नभए पदबाट राजीनामा दिने घोषणा गरिन् ।

उनले साँखु बजार र शालीनदीको पर्यटकीय विकासमा ध्यान दिने घोषणा गरिन् । ‘दक्षिणढोका, मुलपानी लगायतका क्षेत्रमा हुने डुबानको समस्यालाई समाधान गर्न योजना बनाउनेछु, व्यवसायिक तरकारी, फलफूल खेतीको विस्तार, रोजगारी वृद्धि गर्ने कुरामा मेरो प्राथमिकता हुनेछ,’ घर्तीले भनिन् ।

उनले मुलपानीमा निर्माणाधिन क्रिकेट रंगशालाको कामसमेत छिट्टै सम्पन्न गराउने बताइन् ।

काठमाडौं–२ मा प्रदेशसभातर्फ भने क्षेत्र नं. १ बाट नेपाली कांग्रेसका ध्रुव केसी र क्षेत्र नं. २ मा नेकपा एकीकृत समाजवादीका भरतप्रसाद फुयाल उम्मेदवार छन् । प्रतिनिधिसभा सदस्यमा नेकपा एमालेले यो क्षेत्रबाट मणिराम फुयाललाई उम्मेदवार बनाएको छ ।


प्रकाशित : आश्विन ३०, २०७९ १८:१०
पूरा पढ्नुहोस्
प्रतिक्रिया
पठाउनुहोस्
×