सिजनमै सुक्खा स्वीमिङ पुल

पौडी पोखरीमा लकडाउन प्रभाव 
रीना मोक्तान

काठमाडौँ — पौडी पोखरीहरु गर्मीयामको व्यग्र प्रतिक्षामा हुन्छन् । पानीसँग खेल्न रुचाउनेहरु पनि यही मौसम कुरिरहेका हुन्छन् । चैतको अन्तिम साताबाट यस वर्षको गर्मी सुरु भइसकेको छ । तर, सहरका पौडी पोखरीको दृश्य अहिले सधैंझैं छैन ।

शनिबार भक्तपुरस्थित आदर्शमा रहेको क्लब बागमती पुग्दा त्यहाँको पौडीपोखरी निकै शान्त थियो । तर, कोरोना भाइरसको त्रासले देशमा लकडाउन नभएको भए सायद यहाँ खुट्टा टेक्ने ठाउँ हुन्थेन ।

‘अहिले त मान्छेहरु नआएको देखेर यहाँको पोखरी पनि जिल खाइरहेको होला,’ क्लब छेउ बस्ने ज्योती लामाले हामीसँग सुनाइन् ।

त्यहाँ पुुग्दा क्लबका आधिकारिक व्यक्ति कोही थिएनन् । बस शान्त पानी थियो, त्यो पनि लेउ लागेर हरियो भइसकेको ।

त्यस्तै, गत वर्षको असारमा खुलेको भक्तपुरको सिपाडोलमा रहेको भादगाउँ स्पोर्ट एन्ड रिसोर्ट पौडी पोखरी अवस्था पनि बागमतीभन्दा फरक थिएन । ‘स्वीमिङ पुलले राम्रै पिकअप लिइरहेको थियो । यो सिजनमा राम्रै व्यापार होला भन्ने अपेक्षा थियो तर कोरोनाले डामाडोल भयो,’ भादगाउँका म्यानेजर मनोज व्यन्जुले भने, ‘पुल खोल्न नपाउँदै यो सिजन जालाजस्तो छ । लाखौंको घाटा हुने भो । बैंकबाट लिएको ऋण कसरी तिर्ने, स्टाफलाई तलब कसरी खुवाउने अनि दिनहुँ पुलको सरसफाइ खर्च कसरी जुटाउने तनावमा छौं ।’

पौडी पोखरीमा सधैं पानी चलाइरहनुपर्छ । समयसमयमा पानी फोहोर हुन्छ, फेरिरहनु पर्छ । तर, अहिले पौडी पोखरी बन्द हुँदा सरसफाइमा ध्यान नगएको बताउँछन् म्यानेजर व्यन्जु ।

‘अब मानिसहरु आउने भएको भए पो पानी फेरिन्थ्यो होला स्वीमिङ पुलमा अहिले त लेउ नै लागिसक्यो होला,’ उनले भने ।

उक्त पौडी पोखरीमा ४० जना कर्मचारी काम गर्थे । तर, लकडाउन सुरु भएदेखि उनीहरुलाई घर पठाइएको छ । अहिले उनीहरुले पौडी पोखरीमा कसैलाई जान दिएका छैनन् ।

भक्तपुरको सबैभन्दा व्यस्त पौडी पोखरी हो, काठमाडौं फन भ्याली । काठमाडौं, ललितपुर र काभ्रे लगायतका जिल्लाबाट यहाँ रमाइलो गर्न मानिसहरु आउने गर्छन् । तर, अहिले यो पौडी पोखरी पनि सुनसान छ । सिजन सुरु हुनासाथ करिब ५० जनाले यहाँ अस्थायी रोजगारी पाउँथे । तर, यसपाली सबैको बेहाल छ ।

‘पुल बन्द भएपछि रोजगारी दिने कुरै भएन,’ फन भ्यालीका मार्केटिङ अफिसर विक्रम भूमि भन्छन्, ‘अहिले हाम्रो मात्र व्यापार बन्द छैन । अरु पनि बन्द छन् । हाम्रो मात्रै खोल्ने कुरा भएन हुन त हाम्रो व्यापार ६ महिना हुन्थ्यो । यसपाली त्यो पनि भएन । हिसाब त गरेको छैन तर लाखौंको घाटा हुने पक्का छ ।’

अप्रिलदेखि सेप्टम्बरसम्म स्वीमिङ एभ्रिडे (मोबाइल स्वीमिङ स्कुल)ले मानिसहरुलाई पौडी खेल्न सिकाउँथ्यो । उनीहरु विभिन्न पौडीपोखरीलाई भाडामा लिएर बालबालिका, युवा र असाधारणलाई पौडी खेल्न सिकाउने कक्षाहरु सञ्चालन गर्थे । यसपटक स्वीमिङ एभ्रिडेले विभिन्न स्थानमा आफ्नो कक्षाहरु बढाउने सोचेका पनि थिए । तर लकडाउन गर्दा योजना पूरा हुन नपाएको एभ्रिडेका सञ्चालक विवश श्रेष्ठले बताए ।

‘यसपटक जावलाखेल, बालुवाटार र त्रिपुरेश्वर लक्षित गरेर स्वीमिङ सिकाउने योजना थियो । तर लकडाउनले गर्दा हाम्रो योजना पूरा भएन । यसले त हाम्रो व्यापार नै शून्य बनायो,’ उनले भने । अहिलेसम्म १५ लाख नोक्सान भइसकेको विवशले दुखेसो पोखे ।

अन्य वर्षमाझैं यो वर्ष पनि पौडी सिक्न चाहनेले जाडो महिनादेखि नै एभ्रिडेमा बुकिङ गरिसकेका थिए । विवशका अनुसार २ महिनाको कक्षाहरु बुक नै भइसकेको थियो । तर अब यी कक्षा सञ्चालन नहुँदा पौडी प्रशिक्षक बेरोजगार भएको उनी सुनाउँछन् । ‘नेपालमा स्वीमिङ सिक्ने ठाउँ धेरै छैन । हामीकहाँ ५–६ जना स्वीमिङ इन्स्ट्रक्टर हुनुहुन्थ्यो । उहाँहरु अन्य समयका लागि गर्मीकै आम्दानीमा भर पर्नुहुन्थ्यो । तर यसपाली सबै स्वीमिङ इन्स्ट्रक्टर बेरोजगार हुनु भयो,’ विवश सुनाउँछन् ।

प्रकाशित : जेष्ठ ६, २०७७ १५:०५
प्रतिक्रिया
पठाउनुहोस्

ओम्‍नी भनेको सुनेको पनि थिएन, कसको के हो थाहा थिएन : प्रधानमन्त्री 

कान्तिपुर संवाददाता

काठमाडौँ — कोरोना भाइरस (कोभिड- १९) विरुद्ध लड्नका लागि सरकारले खरिद गरेका स्वास्थ्य सामग्री खरिदकर्ता ओम्नी कम्पनीबारे आफूलाई थाहै नभएको प्रधानमन्त्री केपी शर्मा ओलीले बताएका छन् । संसद्मा उठेका प्रश्नको जवाफ दिने क्रममा प्रधानमन्त्रीले ओम्नी व्यापारिक समूहबारे आफूलाई थाहै नभएको बताएका हुन् । 

मंगलबार प्रतिनिधिसभाको बैठकमा प्रधानमन्त्रीले भने, 'ओम्नी भनेको सुनेको पनि थिएन, कसको के हो थाहा पनि थिएन ।' उक्त कम्पनीसँग आफ्नो कार्यालयलाई जोडिएकोमा उनले आपत्ति जनाएका छन् ।

सञ्चारमाध्यमले अनावश्यक रूपमा बालुवाटारलाई जोडेको भन्दै उनले आपत्ति जनाएका छन् । 'व्यापार मेरो विषय होइन, राजनीति हो । म डिल गर्दिनँ र मेरो सरोकार पनि होइन,' उनले भने । स्वास्थ्य सेवा विभागका महानिर्देशकले छोटो बाटोबाट खरिद गर्ने काममा प्रधानमन्त्री कार्यालयलाई जोडिनु राम्रो नभएको उनको भनाइ थियो ।

उक्त प्रकरणमा अनियमितता भएको खण्डमा कारबाही हुने प्रधानमन्त्रीको भनाइ थियो । 'यदि कसैले कुनै एक रुपैयाँ पनि अनियमितता गरेको छ भने त्यससम्बन्धमा छानबिन हुन्छ, कारबाही हुन्छ । तर हरेक कुरामा भ्रष्टाचार मात्रै देख्नु राम्रो होइन । जो मन परेको छैन, त्यससँग जोड्नु राम्रो होइन,' उनले भने ।

ओम्नी नामको कम्पनीले स्वास्थ्य सेवा विमागले खरिद गर्ने सामग्री चीनबाट ल्याएको थियो । जसमा केही सामग्री सम्झौताभन्दा बढी ल्याइएका र केहीको गुणस्तरमा प्रश्न उठेको थियो । उक्त प्रकरणमा कोरोना भाइरससँग सम्बन्धित उच्चस्तरीय समिति र स्वास्थ्य मन्त्रालयको नेतृत्वलाई पनि जोडिएको थियो ।

ओम्नीका सञ्चालकहरूको प्रधानमन्त्री केपी शर्मा ओलीसँग र राम्रो सम्बन्ध भएको बताइएको थियो । तर प्रधानमन्त्रीले लामो समयपछि उक्त कुराको जवाफ दिएका हुन् ।

पछि उक्त सम्झौता रद्द गरेर सेनालाई स्वास्थ्य सामग्री खरिदको जिम्मा दिइएको थियो । ओम्नीले ल्याएका सामग्री भने प्रश्न उठे पनि प्रयोगमा ल्याइएको छ ।

प्रकाशित : जेष्ठ ६, २०७७ १४:५०
पूरा पढ्नुहोस्
प्रतिक्रिया
पठाउनुहोस्
×