‘सहायक श्रीमान’लाई अमेरिकामा उत्कृष्ट अन्तर्राष्ट्रिय डकुमेन्ट्री अवार्ड- मनोरञ्जन - कान्तिपुर समाचार

‘सहायक श्रीमान’लाई अमेरिकामा उत्कृष्ट अन्तर्राष्ट्रिय डकुमेन्ट्री अवार्ड

कान्तिपुर संवाददाता

काठमाडौँ — नेपालका कतिपय हिमाली क्षेत्रमा विद्यमान बहुपति प्रथाका बारेमा निर्मित वृत्तचित्र ‘सहायक श्रीमान’ (को–हजबेन्ड)ले आठौं कब इन्टरनेसनल फिल्म फेस्टिवलमा उत्कृष्ट उपाधि जितेको छ ।

अमेरिकाको एटलान्टमा अगष्ट ४ देखि ७ सम्म आयोजित उक्त फिल्म फेस्टिवलको अन्तिम दिन सोमबार भएको अवार्ड समारोहमा ‘को–हजबेन्ड’लाई उत्कृष्ट अन्तर्राष्ट्रिय डकुमेन्ट्री अवार्ड घोषणा गरिएको हो ।

निर्देशक गणेश पाण्डेका अनुसार बहुपति प्रथामा आधारित ३५ मिनेटको यो डकुमेन्ट्री फिल्म कर्णाली प्रदेशको हुम्लामा छायाँकन गरिएको थियो । दाजुभाइहरूले एउटै श्रीमती बिहे गर्ने प्रचलन अहिले पनि नेपालका हुम्ला लगायत हिमाली जिल्लामा विद्यमान छ । सोही विषयलाई निर्देशक पाण्डेले पर्दामा उतारेका हुन् ।

निर्देशक पाण्डेले करिब ४ वर्षको छायाँकन र अनुसन्धानबाट 'सहायक श्रीमान' तयार भएको बताएका छन् । साइन मिडिया प्रालिले निर्माण गरेको यो वृत्तचित्रको लेखन पनि निर्देशन पाण्डेले नै गरेका हुन् ।

जसको निर्माता शारदा गैरे हुन् भने प्रमुख सहायक निर्देशक एवं दृश्य सम्पादक ईश्वर कोइराला र सहायक निर्देशकको रुपमा नृपराज हमाल छन् । यस्तै ईश्वर कोइराला, चन्द्रमान डंगोल, अविनाश लामा र पुकार तिमिल्सिनाले सिनेमाटोग्राफरको रुपमा काम गरेका हुन् ।

यस्तै संगीतकार जुगल डंगोलले संगीत संयोजन गरेका हुन् । अमेरिकामा अवार्ड ग्रहण गर्दै निर्देशक पाण्डेले यो अवार्ड नेपाल र नेपालीका लागि पनि गर्वको विषय भएको प्रतिक्रिया दिएका छन् । पाण्डेका अनुसार ‘सहायक श्रीमान’ले अहिलेसम्म सात वटा अन्तर्राष्ट्रिय अवार्ड जितिसकेको छ ।

प्रकाशित : श्रावण २३, २०७९ १७:४८
प्रतिक्रिया
पठाउनुहोस्

सरकारले आदिवासीको हितमा महत्त्वपूर्ण काम गरेको छ : प्रधानमन्त्री देउवा

कान्तिपुर संवाददाता

काठमाडौँ — प्रधानमन्त्री एवं नेपाली कांग्रेसका सभापति शेरबहादुर देउवाले वर्तमान सरकारले आदिवासी, जनजातिको हितका लागि धेरै महत्त्वपूर्ण काम गर्दै आएको बताएका छन् ।

२८ औं विश्व आदिवासी दिवसको अवसरमा सोमबार काठमाडौंमा आयोजित एक कार्यक्रमलाई सम्बोधन गर्दै प्रधानमन्त्री देउवाले संविधानमा उल्लेख भए अनुसार उनीहरूको हक, अधिकार र सुविधा दिलाउने कार्यमा पनि सरकार सधैँ क्रियाशील रहेको बताए ।

आदिवासी, जनजातिहरूको पहिचान गर्ने र उनीहरूको भाषा, कला र संस्कृतिको संरक्षण र सम्वर्द्धन गर्नका लागि आफू नेतृत्वको विगतमा बनेको सरकारले नै आदिवासी, जनजाति उत्थान राष्ट्रिय प्रतिष्ठान स्थापना गरेको उनले स्मरण गराएका थिए ।

त्यस अवसरमा प्रधानमन्त्री देउवाले आदिवासी, जनजातिहरूलाई राज्यको कुनै पनि अवसरबाट बञ्चित हुन नदिन सम्बन्धित सबै पक्षले मिलेर काम गर्न आवश्यक रहेको पनि बताए ।

‘वर्तमान सरकार संविधानमा उल्लेख गरिएका आदिवासी, जनजातिका हक, अधिकार र सुविधाका विषयमा उत्साहका साथ क्रियाशील रहँदै आएको छ । नेपालको संविधानले आदिवासी, जनजाति समूदायको विकास र समृद्धिको लागि छुट्टै आयोगको व्यवस्था गरेको छ । सरकारले आदिवासी, जनजातिको हितका लागि धेरै महत्वपूर्ण कार्यहरू गर्दै आएको छ,' प्रधानमन्त्री देउवाले भने ।

यस्तै आदिवासी, जनजातिको पहिचानसहित उनीहरूलाई राज्यको मूलधारमा ल्याई कुनै पनि अवसरबाट बञ्चित हुन नदिन आफूहरू सबै मिलेर काम गर्न आवश्यक रहेको उनको भनाइ छ । राज्यका हरेक तह र निकायमा समावेशीकरणको नीतिलाई प्रभावकारी रुपमा आत्मसात गर्दै राष्ट्रको विकास र समृद्धिका लागि हामी सबै प्रतिवद्ध हुन आवश्यक छ । नेपालको सबैभन्दा ठूलो समूदाय आदिवासी, जनजातिको सर्वाङ्गिण विकास गरेर मात्रै नेपालको समृद्धिको सपना यथार्थमा परिणत हुने भएकाले यस कुरालाई आत्मसात गरी काम गर्न म सबैलाई हार्दिक अनुरोध गर्दछु ।’

प्रधानमन्त्री देउवाले आदिवासी, जनजातिहरूको उत्थान नभई मुलुकलाई समृद्ध बनाउने सपना यथार्थमा परिणत नहुने पनि दाबी गरेका थिए । साथै यसलाई आत्मासात गर्दै अघि बढनुपर्नेमा जोड दिनु भयो । कार्यक्रममा बोल्दै नेपाली कांग्रेसका महामन्त्री गगनकुमार थापाले सबै आदिवासी, जनजातिहरूको उत्थान गरेर मात्रै मुलुकको समुन्नति हुने भएकाले कांग्रेसले त्यस विषयमा गम्भीर भएर काम गरिरहेको दाबी गरे ।

प्रकाशित : श्रावण २३, २०७९ १७:२९
पूरा पढ्नुहोस्
प्रतिक्रिया
पठाउनुहोस्
x
×