फिल्म कहाँ रिलिज हुन्छ, त्यसले कलाकारलाई फरक पार्दैन : नवाजुद्दिन

कान्तिपुर संवाददाता

काठमाडौँ — बलिउड अभिनेता नवाजुद्दिन सिद्दिकी ओटीटी (ओभर दि टप)मा फिल्म हेर्दा हलको जस्तो सिनेम्याटिक अनुभव नहुने बताउँछन् । शुक्रबारमात्रै उनी अभिनित फिल्म ‘घुमकेतु’ डिजिटल प्लेटफर्म जीफाइभमा प्रदर्शन भयो । 

‘ल्यापटप र आइप्याडमा फिल्म हेर्दा हलमा जस्तो खास मज्जा आउँदैन । यदि तपाईँ ल्यापटप र आइप्याडमा फिल्म हेर्दा रमाइलो मान्नुहुन्छ भने त्यो मज्जा तपाईँकै वरपर सिमित हुन्छ,’ उनले दैनिक भास्करलाई भनेका छन् । पछिल्लो समय लकडाउनले गर्दा फिल्म हल ठप्प भएसँगै बलिउडले ओटीटीमा फिल्म प्रदर्शन गर्न थालेका छन् ।

अमिताभ बच्चन र आयुष्मान खुराना अभिनित ‘गुलाबो सितावो’ पनि जुन १२ मा अमाजोन प्राइममा प्रदर्शन हुने पक्का भएको छ ।

अभिनेता सिद्दिकीले फिल्ममा अभिनय गर्ने क्रममा त्यो फिल्म कुन माध्यमबाट कसरी प्रदर्शन होला भनेर नसोचिने बताउँछन् । ‘आफूले काम गरेको फिल्म टेलिभिजन, हल या ओटीटी जहाँ रिलिज भए पनि कलाकारलाई त्यसले फरक पार्दैन,’ उनी भन्छन्, ‘हाम्रो काम इमान्दारीपूर्वक अभिनय गर्ने हो । पात्रलाई न्याय हुने गरि काम गर्ने हो । म सधैं यही कुरामा फोकस हुन्छु ।’

फिल्म प्रचार र प्रदर्शनको जिम्मेवारी विशुद्ध निर्मातामा निहित हुने उनी बताउँछन् । ‘फिल्म कहाँ प्रदर्शन गर्ने, प्रदर्शन मितिको काम वितरक र निर्माताको हो । यसमा मेरो केही सरोकार हुन्न,’ उनले भने ।

हुन त उनको फिल्म पक्कै सिनेमा घरलक्षित गरेर बनाइएको थियो । तर लकडाउनले फिल्म निर्माण टिमले ओटीटीको माध्यम रोज्यो । फिल्म प्रदर्शनको समयमा सिनेमा हल मिस भएको छैन भन्ने प्रश्नमा उनले भने, ‘छैन । यो अवस्थामा ओटीटी नै उपयुक्त माध्यम हो ।’

अहिले पूरा विश्व घरमा बसेर फिल्म हेरिरहेको अवस्थालाई मध्यनजर गर्दा भविष्यमा ओटीटीका दर्शक बढ्ने अनुमान लगाउँछन्, नवाजद्दिन । लकडाउनको दौरान उनी स्वयमले घरमै डिजिटल प्लेटफर्ममार्फत ९० बढी फिल्म हेर्न भ्याइसकेको बताउँछन् । ‘लकडाउनमा दर्शकलाई अहिले संसारभरको फिल्म हेर्ने मौका मिलेको छ,’ उनले भने, ‘त्यसैले हामीले हाम्रो फिल्मको गुणस्तर पहिले भन्दा झन् सुधार्नुपर्ने चुनौती थपिएको छ । तपाईं अब जति राम्रा फिल्म बनाउनुहुन्छ पूरा संसारले त्यसलाई हेर्नेछ ।’

प्रकाशित : जेष्ठ ११, २०७७ १५:०३
प्रतिक्रिया
पठाउनुहोस्

संविधान संशोधनमा सबै दलबीच सहमति जुटाउन संसदको आग्रह

जयसिंह महरा

काठमाडौँ — संविधान संशोधन विधेयकमा सबै राजनीतिक दलहरूबीच सहमतिको वातावरण बनाउन संघीय संसद प्रतिनिधिसभाको कार्यव्यवस्था समितिले सरकारलाई आग्रह गरेको छ ।

आइतबार बसेको प्रतिनिसभा कार्यव्यवस्था परामर्श समितिको बैठकले निशान छाप संशोधन गर्नका लागि संसदमा दर्ता भएको नेपालको संविधान (दोस्रो संशोधन) संविधान संशोधन, २०७७ विधेयकमा सबै दलहरूबीच सहमति जुटाउन आग्रह गरेको हो ।

प्रमुख प्रतिपक्षी कांग्रेसका प्रमुख सचेतक बालकृष्ण खाँणले भने, 'सरकारले संविधान संशोधन विधेयक ल्याएको छ । त्यसमा सबै दलहरूबीच पास गर्ने बेलासम्म सहमति जुटाउन सरकारलाई आग्रह गर्ने सहमति भयो ।' संविधान संशोधन विधेयक परिपक्‍व हुनका लागि ७ दिन लाग्‍ने कानुनी व्यवस्थाअनुसार सरकारले पहलकदमी लिएर यो बीचमा सबै राजनीतिक दलबीच सहमति जुटाउनुपर्ने विषयमा छलफल भएको खाँणले बताए ।

बैठकमा राजपाका नेता लक्ष्मणलाल कर्णले मधेसी दलहरूले विगतदेखि नै संविधान संशोधनको माग उठाउँदै आएकाले तिनलाई सम्बोधन गर्नुपर्ने माग राखेका थिए ।

सभामुख अग्नि सापकोटाले राष्ट्रियताको विषयमा एकमत भएर अगाडि बढ्नुपर्ने भएकाले सर्वदलीय बैठकका लागि आफूले पहल गर्ने बताएका थिए । 'अहिलेको राष्ट्रिय आवश्यकता सहमति हो । राष्ट्रिय आवाज लगेर जानुपर्छ । हामीबीच सुदृढ एकता भएर जानुपर्छ,' उनले बैठकमा भनेका थिए ।

बैठकले सांसदहरूले लगाउने लोगो रोष्ट्रममा भएको प्रतीक चिन्हलाई अद्यावधिक नक्साअनुसार परिमार्जन गर्ने निर्णय भएको छ ।

सरकारले भारतीय अतिक्रमणमा परेका कालापानी, लिपुलेक र लिम्पियाधुरा समेटेर नक्सा सार्वजनिक गरेको थियाे । साेहीअनुसार निसान छाप परिमार्जन गर्ने संविधान संशोधन विधेयक दर्ता गरिएको छ ।

प्रकाशित : जेष्ठ ११, २०७७ १४:४४
पूरा पढ्नुहोस्
प्रतिक्रिया
पठाउनुहोस्
×