‘आशिकी-२’ बाट चोरिएकै हो त ‘म यस्तो गीत गाउँछु-२ ?’

कान्तिपुर संवाददाता

काठमाडौँ — फिल्म 'म यस्तो गीत गाउँछु २'को टिम यतिखेर विवादमा तानिएको छ । बिहीबार निर्माण युनिटले सार्वजनिक गरेको ट्रेलर बलिउड फिल्म 'आशिकी-२'बाट चोरिएको भन्दै धेरैले आलोचना गरेका छन् ।

युट्युबमा कतिले त 'आशिकी-'को नेपाली भर्सन भन्दै कमेन्टसमेत गरेका छन् । 'ट्रेलर त आशिकी-२ र अ स्टार इज बनको संयोजन जस्तो लाग्यो' एक दर्शकले ट्रेलरको कमेन्टमा लेखेका छन् ।

३ हजार बढी कमेन्टमा अधिकांशले फिल्मको ट्रेलर नै चोरिएको भन्दै चर्को आलोचना गरेका छन् । निर्देशक सुदर्शन भने यी दुई फिल्मसँग आफ्नो फिल्मको ५ प्रतिशत पनि नमिल्ने बताउँछन् ।

'केही समूह पछाडि लागेका छन्। फिल्म नै नहेरीकन जे पायो त्यही बोल्नु भनेको त समूह लाग्नु नै हो । यसले मलाई केही फरक पार्दैन । मेरो फिल्मती फिल्मसँग ५ प्रतिशत पनि मिल्दैन,' उनले फोन संवादमा भने,'म्युजिकल फिल्म भन्ने बित्तिकै आशिकी–२ हुन्छ ?'

तर सुदर्शनलाई चोरीको आरोप लाग्नु नयाँ होइन । उनको डेब्यू फिल्म 'मेरो एउटा साथी छ' कोरियन फिल्म 'मिलिनियर्स फस्ट लभ'को हुबहु कपी थियो भने पछिल्लो फिल्म 'रामकहानी' थाई फिल्म 'पीमक'सँग मिलेको थियो ।

प्रकाशित : फाल्गुन २, २०७६ १८:२८
प्रतिक्रिया
पठाउनुहोस्

नाफा लैजान पाइँदैन भनेपछि विदेशी लगानी आउँदैन : दाहाल

हरिहरसिंह राठौर

धादिङ — नेकपाका अध्यक्ष पुष्पकमल दाहालले नेपालमा गरेको लगानीबाट नाफा गरेर आफ्नो देशमा लैजाने वातावरण भए मात्रै वैदेशिक लगानीकर्ता आउने बताएका छन् । पहिले स्वागत गर्ने लगानीको प्रतिफल लैजाने बेला तर्साउने विधिले वैदेशिक लगानी स्वतः घटने दाहालले बताए । 

धादिङ उद्योग वाणिज्य संघले सदरमुकाममा आयोजना गरेको सातौं धादिङ उद्योग तथा पर्यटन महोत्सवको उद्घाटन गर्दै दाहालले नेकपा सपना पनि देख्ने अरुलाई पनि सपना देखाउने र सपना पूरा पनि गर्ने कुरामा अडिग रहेको बताए।

धादिङ र छिमेकी गोरखा जिल्लाको आर्थिक समृद्धिमा ठूलो योगदान पुर्‍याउन सक्ने प्रस्तावित बुढीगण्डकी जलविद्युत् आयोजनाको मुआब्जा वितरण अन्तिम चरणमा रहेको र अब डुबानबाट पिडित हुने घरपरिवारलाई पुनर्वास तथा पुर्नस्थापना प्रक्रिया अगाडि बढाई आयोजनाको निर्माण प्रक्रिया अघि जाने कुरामा ढुक्क हुन समेत उनले आग्रह गरे ।
तिब्बतबाट रेल आउने कुरामा विभिन्न चरणका कुरामा चीन सरकारसँग पटक पटकको वार्ता र सम्झौता अनुसार भनेकै समयमा रेल नआए पनि आगामी १० वर्ष भित्रै नेपाल विकासको नमुना र मूल्यांकन गर्न लायक र अरु देशसँग तुलना गर्न लायक भइसक्ने दाहाले बताए ।

उनले केरुङबाट गल्छी हुँदै भारतको ठोरीसम्मको त्रिदेशीय मार्ग पनि सम्पन्न हुने चरण भइसकेको र तिब्बतबाट रेल काठमाडौं, धादिङ, पोखरा हुँदै लुम्बिनी लैजानै रणनीति अगाडि बढी सकेको बताए ।

महोत्सव उद्घाटनका क्रममा आएका नेपाली कांग्रेसका केन्द्रिय सदस्य मीन विश्वकर्माले खुला अर्थतन्त्र लागु गरेको देशमा ठूला उद्योगपतिहरुलाई वर्तमान सरकारले तर्साएर लगानीमैत्री वातावरण बिथोल्न लागेको, पार्टी निकट भ्रष्टाचारीहरुलाई जोगाउने र इतरपक्षका उद्योगपतीहरुलाई मुद्दा लगाएर तर्साउने उद्दत रहेको बताए ।

प्रकाशित : फाल्गुन २, २०७६ १८:१८
पूरा पढ्नुहोस्
प्रतिक्रिया
पठाउनुहोस्
×