चार दिनमा 'तानाजी'को व्यापार ७५ करोड, 'छपाक'लाई २१ करोड

एजेन्सी

शुक्रबार रिलिज भएका दुई हिन्दी फिल्म 'तानाजी' र 'छपाक'को राजनीतिक मोर्चामा प्रतिस्पर्धा भएपनि बक्स अफिसमा भने खासै प्रतिस्पर्धा भएको छैन । जवाहरलाल नेहरु विश्वविद्यालयमा भएको विद्यार्थीको सरकारविरोधी प्रदर्शनमा सहभागी भएको भन्दै सत्तारुढ दलले दीपिका पादुकोणको फिल्म बहिस्कार गर्ने अभियान चलाएको छ ।


यसका बाबजुद दीपिकाको फिल्म 'छपाक'ले चार दिनमा भारतभरी २१.२७ करोडको व्यापार गरेको छ । एसिड आक्रमणमा परेकी किशोरी लक्ष्मी अग्रवालको कथामा बनेको फिल्म पहिलो दिनदेखि नै अजय देवगनको 'तानाजी' को तुलनामा व्यापारमा कमजोर देखिएको थियो। 'छपाक'को बजेट पनि सानो छ भने यसले पाएको कुल हलको संख्या पनि थोरै छ ।


अजय देवगन-सैफअलि खान- काजोलको 'तानाजी'ले चार दिनमा करीब ७५.६८ करोड कमाएको छ । चौथो दिन 'छपाक' ले करिब २ करोडको व्यापार गर्दा 'तानाजी'ले १२ करोडको व्यापार गर्‍यो । बजार बिश्लेषकहरुले यही अनुपातमा गए 'तानाजी' पहिलो हप्ता नै सय करोड क्लबमा प्रवेश गर्ने अनुमान गरेका छन् ।

प्रकाशित : पुस २९, २०७६ १२:४८
ADVERTISEMENT
प्रतिक्रिया
पठाउनुहोस्
ADVERTISEMENT

मोटरसाइकल दुर्घटनामा १ को मृत्यु

रासस

काठमाडौँ — शङ्खरापुर नगरपालिकाको साँखुमा मोटरसाइकल दुर्घटना हुँदा सिन्धुपाल्चोक मेलम्ची नगरपालिका ११ का २४ वर्षीय शिव सुनारको मृत्यु भएको छ । 

काठमाडौँबाट मेलम्ची जाँदै गरेको बा ६४प ६८०९ नंको मोटरसाइकल साँखु बजार नपुग्दै ओरालोमा दुर्घटनामा परेको हो । उनीसँगै मोटरसाइकलमा सवार सोही ठाउँकै घाइते सागर श्रेष्ठको नारायणटारस्थित शङ्खरापुर अस्पतालमा उपचार भइरहेको महानगरीय प्रहरी प्रभाग साँखुका प्रहरी निरीक्षक गोविन्द पन्थीले जानकारी दिए ।

प्रहरीका अनुसार उक्त मोटरसाइकल नेपाली नम्बरप्लेट र भारतीय नम्बरप्लेट रहेको दुई स्किारपियोमा ठोक्किएर दुर्घटना भएको हो । चाबहिलबाट साँखु जाँदै गरेको बा१६च ८७७० नंको स्कारपियो सडकको बीचमा रोकिराखेको र उक्त स्किारपियोले ढोका खोल्दा मोटरसाइकल ढोकामा ठोक्किएर अनियन्त्रित भई विपरीत दिशाबाट आउँदै गरेको बीआर०६पिडी४०५९ नंको भारतीय स्कारपियोले थप ठक्कर दिएको हुनसक्ने प्रहरीको भनाइ छ ।

प्रहरीले दुवै स्किारपियो चालकलाई नियन्त्रणमा लिएर सोधपुछ गरिरहेको छ ।

प्रकाशित : पुस २९, २०७६ १२:३९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
×