मैनालीले गरे २०५औं पटक रक्तदान
काठमाडौँ — विश्वभर रगतको अभावमा कुनै पनि बिरामीको ज्यान नजाओस् भन्दै ३५ वर्षदेखि निरन्तर रक्तदान अभियान सञ्चालन गर्दै आएका स्वयमंसेवी रक्तदाता अर्जुनप्रसाद मैनालीले २ सय ५औं पटक रक्तदान गरेका छन् ।
मंसिर १२ गते अमेरिकाको साउथ क्यारोलिनामा २ सय ५ औं पटक रक्तदान गरेको ‘वर्ल्ड ब्लड डोनर अर्जुन मैनाली इंक’ द्वारा आइतबार जारी विज्ञप्तिमा उल्लेख गरिएको छ ।
मैनालीले पहिलोपटक ३५ वर्षअघि काठमाडौंको विशालबजारबाट रगत दान सुरु गरेका थिए । काभ्रेको सिपाली मूल घर भई हाल अमेरिकाबाट विश्वभर रक्तदानमार्फत नेपाली समुदायलाई जोड्दै आइरहेका मैनालीले यसअघि अगस्ट २७, २०२२ मा २ सय ४ औं पटकका लागि अफ्रिकी मुलुक घानामा रक्तदान गरेका थिए ।
उनले सन् २०२२ मात्रै ५ पटक रक्तदान गरेको विज्ञप्तिमा उल्लेख गरिएको छ । सन् १९८७ देखि रक्तदान गर्दै आएका मैनालीले २०२२ सम्म ६ वटा महादेशका २० वटा मुलुकमा रक्तदान गरिसकेका छन् । उनले हालसम्म सबैभन्दा धेरै अमेरिकामा १ सय ३३ पटक र नेपालमा ५० पटक रक्तदान गरेका छन् ।
प्रकाशित : मंसिर १९, २०७९ १९:१४
