नयाँ वर्षसँगै दक्षिण कोरियामा कामदारको तलब बढ्यो - प्रवास - कान्तिपुर समाचार
कान्तिपुर वेबसाईट
AdvertisementAdvertisement

नयाँ वर्षसँगै दक्षिण कोरियामा कामदारको तलब बढ्यो 

गोकुल थोकर

सोल — नयाँ वर्ष सुरु भएसँगै दक्षिण कोरियामा कामदारको न्यूनतम तलब वृद्धि भएको छ । गत वर्षको तलब भन्दा १.५ प्रतिशत बढि प्रतिघन्टा ८ हजार ७ सय २० वन पाउने भएका छन् । योवर्ष कोरोना महामारीका कारण देशमा आर्थिक मन्दी भएको भन्दै सन् १९८८ देखि कै कम तलब बढेको हो ।

दैनिक ८ घन्टाको दरले हप्ताको ४० घन्टा काम गर्ने कामदारको न्यूनतम ज्याला महिनामा १८ लाख २२ हजार ४ सय ८० कोरियन वन अर्थात् झन्डै १ लाख ८२ हजार रुपैयाँ हुनेछ । साथै ८ घन्टा भन्दा बढि काम गरे बापत ‘ओभरटाइम’ र सार्वजानिक बिदाहरुमा काम गरे प्रतिघन्टा १३ हजार वन भन्दा बढि ज्याला पाउनेछन् । त्यसैगरी राति १० बजेदेखि बिहान ६ बजेसम्मको काम गर्ने कम्पनीमा रात्रि भत्ता हुनेछ ।

गत जुलाईमा तलब निर्धारण समितिले आठौं पटक छलफल गर्दा पनि तलब कति बढाउने भन्ने सहमति नभएपछि नवौं बैठकले बहुमतका आधारमा यो तलब निर्धारण गरेको हो । सो बैठक कामदार पक्षले बहिस्कार गरेको थियो । समितिमा कामदार, व्यवसायी र सरकारी पक्षको ९/९ जना सदस्य रहने व्यवस्था छ ।

व्यवसायीहरुले गत वर्षको तलबमा २.१ प्रतिशत कटौती गरेर ८ हजार ४ सय १० वन बनाउने माग राखेको थिए भने कामदार पक्षले १६.४ प्रतिशत वृद्धि गरेर १० हजार वन बनाउन माग राखेका थिए ।

वृद्धि भएको तलबबाट दक्षिण कोरियामा रहेका ४० लाख कामदारसँगै ३५ हजार भन्दा बढी नेपाली कामदार पनि प्रत्यक्ष रुपमा लाभान्वित हुनेछन् । दक्षिण कोरियाका राष्ट्रपति मुन जे इनले निर्वाचनका ताका सन् २०२०/२१ सम्म कामदारको तलब प्रतिघन्टा १० हजार कोरियन वन बनाउने जनाएका थिए । तर कोरोना भाइरसको महामारीका कारण यस पटक उल्लेखनीय रुपमा तलब वृद्धि नभएको बताइन्छ ।

सन् २०१८ मा १६.४ र सन् २०१९ मा ११ प्रतिशत तलब बढाएको थियो । साना तथा मझौला व्यवसायीले व्यापक विरोध गरेपछि गत वर्ष २.९ प्रतिशत तलब बढेको थियो ।

प्रकाशित : पुस १६, २०७७ १५:५३
प्रतिक्रिया
पठाउनुहोस्

दक्षिण कोरियामा पनि देखियो नयाँ कोरोना

गोकुल थोकर

सोल — दक्षिण कोरियामा पनि नयाँ प्रकारको कोरोना भाइरस देखिएको छ । कोरियाली रोग नियन्त्रण तथा रोकथाम विभाग केसीडीसीका अनुसार डिसेम्बर २२ मा बेलायतबाट आएका तीन जना कोरियालीलाई नयाँ भाइरसको संक्रमण देखिएको हो । उनीहरूको सोमबार परीक्षण गरिएको थियो ।

डिसेम्बर १४ मा बेलायतबाट फर्किएका एक कोरियालीको आइतबार मृत्यु भएको थियो । पहिले कोरोनाको परीक्षण गर्दा रोगको कुनै लक्षण नदेखिए पनि घरमा आइसोलेसनमा बसिरहेकै अवस्थामा उनको शनिबार मृत्यु भएको थियो । मृतकसँगै बेलायतबाट फर्किएका दुई कोरियालीको आइतबार पुन: कोरोना परीक्षण गर्दा दुवै जना संक्रमित भएको पाइएको छ । उनीहरूमा देखिएको भाइरसबारे थप परीक्षण गरिने पनि केसीडीसीले जनाएको छ ।

नयाँ भाइरस फेला परेपछि बेलायतसँगका सबै उडान जनवरी ७ सम्मका लागि बन्द गरिएको छ । साथै संक्रमितहरूसँग एउटै उडानबाट आएका अन्य यात्रुको पनि पुन: कोरोना भाइरस परीक्षण गर्न थालिएको स्वास्थ्य मन्त्रालयले जनाएको छ ।

कोरियामा जाडो मौसम बढ्दै जाँदा कोरोना संक्रमितको संख्या बढी रहेको छ । दैनिक एक हजारको हाराहरीमा मानिसहरू संक्रमित भइरहेका छन् । यो संख्या कोभिड–१९ को महामारी कोरियामा फैलिएपछिकै बढी हो ।

स्थानीय नगरपालिका र स्वास्थ्य मन्त्रालयले कोरोना नियन्त्रणका लागि कडा प्रकारका नियमहरू लागू गरिरहेका छन् । यसअघि नै राजधानी सोल र ख्याङ्गिदो क्षेत्रमा पाँच जनाभन्दा बढी भेला हुन प्रतिबन्ध लगाएको छ । साथै सार्वजनिक स्थलमा माक्स नलाए पहिलो पटक एक लाख वन (१० हजार रुपैयाँ) पनि जरिवाना गर्दै आइरहेको छ ।

बेलायतमा भएको अध्ययनहरूले नयाँ कोरोना भाइरस पहिले देखिएको भाइरसभन्दा ७० प्रतिशतभन्दा बढी छिटो सर्ने देखाएको छ । छिटो सर्ने भए पनि बिरामीको मृत्यु हुने दर बढी छ या छैन भन्ने अझै खुल्न सकेको छैन । साथै पहिलेको कोरोना भाइरसका लागि तयार भएको भ्याक्सिनले पनि काम गर्छ कि गर्दैन भन्ने अध्ययन हुनै बाँकी छ ।

प्रकाशित : पुस १४, २०७७ ०८:०९
पूरा पढ्नुहोस्
प्रतिक्रिया
पठाउनुहोस्
×