बेलायतमा नेपाली चिकित्सकले लिन थाले कोभिडविरुद्धको खोप- प्रवास - कान्तिपुर समाचार
कान्तिपुर वेबसाईट
AdvertisementAdvertisement

बेलायतमा नेपाली चिकित्सकले लिन थाले कोभिडविरुद्धको खोप

कान्तिपुर संवाददाता

लन्डन — बेलायतमा आममानिसमा कोभिड खोप लगाउन सुरु भएसँगै नेपाली चिकित्सकहरुले पनि कोभिडविरुद्धको खोप लिएका छन् ।

अग्रपंक्तिमा काम गर्ने स्वास्थ्य कर्मचारी, ८० वर्ष नाघेका वृद्धवृद्धा र केयर होमका कामदार खोपको पहिलो प्राथमिकतामा रहेकाले उनीहरुले छिट्टै खोप लिन पाएका हुन् ।

वेल्सको ब्रोङलिस जनरल हस्पिटलको आईसीयूमा कार्यरत नेप्लिज् डक्टर्स एसोसिएसन (एनडीए) यूकेका अध्यक्ष डा. रमेश खोजूले बिहीबार बिहान ग्लाङली जनरल हस्पिटल कारमरथेन गएर उक्त खोप लिएको बताए । उनले अमेरिकी कम्पनी फाइजर र यसको जर्मन साझेदार बायोएनटेकले विकास गरेका खोप लिएका हुन् । कोभिड खोप लिँदा सामान्य लागेको उनले बताए । ’खासै नौलो अनुभव रहेन । अरू खोप लगाउँदाजस्तै सामान्य लाग्यो,’ उनले कान्तिपुरसँग भने, ‘यसले मलाई कुनै साइड इफेक्ट गरेको छैन ।’ अब बाँकी डोज तीन सातामा लिने उनले जनाए ।

उक्त खोप माइनस ७० डिग्री चिसोमा राख्नुपर्ने र निकालेपछि तीन घण्टाभित्र प्रयोग गरिसक्नुपर्नेछ । रियाक्सन कस्तो दिन्छ त्यो हेर्न खोप लगाएपछि १५ मिनेट कुर्न लगाइन्छ । यो खोप परीक्षणहरुबाट प्रभावकारी देखिएको र बेलायतमा सबैले लगाइरहेकाले आफूलाई पनि खोपप्रति विश्वास लागेको उनी बताउँछन् ।

अन्य नेपाली स्वास्थकर्मीले पनि दिन सुरु गरेको उनले जनाए । कुनै डर वा अशंका नलिन उनको सुझाव छ । हिजो उक्त खोप दिएका केही व्यक्तिलाई ‘एलर्जी’ को समस्या आए पनि अरूलाई ठूलो कुनै असर देखिएको खबर नआएको खोजूले बताए ।

बेलायतमा गत मंगलबारदेखि आममानिसमा कोभिड खोप दिने अभियान सुरु भएको हो । अहिले उक्त खोप बेलायतभरका ५० अस्पतालबाट सुरु गरिए पनि आउँदो सातादेखि जीपीबाट समेत खोप दिने तयारी छ । बेलायतमा पहिलो चरणमा ८ लाख डोज भ्याक्सिन दिइनेछ ।

खोजू अध्यक्ष रहेको नेप्लिज डक्टर्स एसोसिएसन (एनडीए) यूकेले विगतदेखि नै नेपाली समुदायमा कोभिड सचेतना कार्यक्रम गर्दै आएको छ । एसोसिएसनले नेपालमा कोभिड–१९ संक्रमितहरुको उपचारमा सघाउन बेलायतको ‘नाइटिंगेल’ जस्तै कोरोना विशेष अस्पताल सञ्चालन गर्ने लक्ष्यमा कोष संकलनसमेत सुरु गरेको छ ।

प्रकाशित : मंसिर २५, २०७७ २०:३६
प्रतिक्रिया
पठाउनुहोस्

पुस २ देखि काठमाडौं–दिल्ली उडान

सुरज कुँवर

काठमाडौँ — कोभिड महामारीका कारण ८ महिनादखि रोकिएको नेपाल–भारत व्यावसायिक उडान पुस २ देखि सञ्चालन हुने भएको छ । तत्काललाई काठमाडौं–दिल्ली मात्रै उडान हुनेछ । बेंगलुरु, मुम्बई, कोलकाता र बनारस उडान भने खुलाइएको छैन ।

नेपालले गत बिहीबार गरेको उडानको प्रस्तावलाई स्वीकृत गरेको नोट भारतले बिहीबार कूटनीतिक नियोगमार्फत संस्कृति, पर्यटन तथा नागरिक उड्डयन मन्त्रालय, नेपाल नागरिक उड्डयन प्राधिकरणलगायतलाई पठाएको प्राधिकरणका महानिर्देशक राजन पोखरेलले जानकारी दिए । उनका अनुसार नेपाली ध्वजावाहक नेपाल एयरलायन्स र भारतीय ध्वजावाहक एयर इन्डियाले दिनमा काठमाडौं–दिल्ली एक/एक उडान गर्न पाउने छन् । चैत ९ गतेदेखि रोकिएको नियमित उडान २ सय ७१ दिनपछि खुला हुँदा भारतमा उपचारका लागि जाने बिरामी, विद्यार्थी, व्यापारीलगायतलाई राहत मिल्नेछ ।

प्राधिकरणका प्रवक्ता तथा उपमहानिर्देशक राजकुमार क्षत्रीका अनुसार भारतीय वायुसेवाले पुस २ गतेदेखि नै दिल्ली–काठमाडौं उडान गर्न अनुमति मागिसकेको छ । नेपाल एयरलायन्सले शुक्रबार भारत र नेपालका हवाई निकायमा अनुमतिका लागि आवेदन दिँदै छ । निगमका एक अधिकारीले काठमाडौं–दिल्लीको उडान पुस २ गतेदेखि गर्न टिकट खुला गरिसकेको जानकारी दिए । दुवै देशले तोकेका यी दुई सरकारी ध्वजावाहकले भारतीय र नेपाली नागरिकलाई एउटा गन्तव्यबाट अर्को गन्तव्यसम्म मात्रै ल्याउने–पुर्‍याउने छन् । यी दुई गन्तव्यबाट हाललाई तेस्रो मुलुक आउजाउ गर्न सकिने छैन । ‘दुई मुलुकका नागरिकबाहेक कूटनीतिक नियोग तथा अन्तर्राष्ट्रिय विकास साझेदार संस्थाका प्रतिनिधिले मात्रै उड्न पाउनेछन्,’ महानिर्देशक पोखरेलले भने, ‘पर्यटक तथा काठमाडौंबाट युरोप, अमेरिका वा अन्य मुलुक जान सकिने छैन ।’

यो उडानमा यात्रुले ७२ घण्टासम्मको पीसीआर जाँच नेगेटिभ भएको प्रयोगशालाको रिपोर्ट अनिवार्य पेस गर्नुपर्नेलगायतका नियम बनाइएको छ । भारतले करिब दुई महिनाअघि नेपाललाई एयर–बबल मोडलबाट उडान सञ्चालन गर्न सकिने प्रस्ताव पठाएको थियो । उसको प्रस्तावलाई अघिल्लो साता मात्रै नेपाल सरकारले स्वीकृत गर्दै भारतलाई गएको बिहीबार नोट पठाएको थियो । नेपालका लागि खाडी र अन्य मुुलुकले यसअघि नै उडान सञ्चालन गरिसकेका छन् ।

प्रकाशित : मंसिर २५, २०७७ २०:११
पूरा पढ्नुहोस्
प्रतिक्रिया
पठाउनुहोस्
×