जम्मु-कश्मीरमा रहेका नेपालीका सम्बन्धमा दिल्लीस्थित दूतावासमा छलफल

सुरेशराज न्यौपाने

नयाँदिल्ली — जम्मु-कश्मीरमा रहेका नेपालीहरुको पछिल्लो अवस्थाका सम्बन्धमा दिल्लीस्थित नेपाली दूतावासले यहाँका प्रवासी नेपालीका संगठनका प्रतिनिधिहरुसँग छलफल गरेको छ ।

नरेन्द्र मोदी सरकारले गत साता जम्मु-कश्मीरको विशेषाअधिकार खारेजलगायतका निर्णयले भारत र पाकिस्तानबीचको सम्बन्ध तनावपूर्ण बन्दै गइरहेका बेला त्यहाँ विभिन्न पेशा व्यवसाय गर्दै आएका करीब ८० हजारको संख्यामा रहेका नेपालीहरुको सुरक्षालाई लिएर चिन्ता व्यक्त भइरहेका बेला दूतावासले त्यस्तो छलफल गरेको हो ।

छलफलमा भारतका लागि नेपाली राजदूत निलाम्बर आचार्यले प्रवासी संगठनका प्रतिनिधिहरुसँग जम्मु-कश्मीरमा रहेका नेपालीहरुको सुरक्षालगायतका विषयमा के-कसरी अगाडि बढ्न सकिन्छ भन्ने जिज्ञासा राखेका थिए । राजदूत आचार्यसँगको छलफलमा नेपाल कम्युनिष्ट पार्टी, नेपाली कांग्रेस, राष्ट्रिय जनमोर्चालगायता राजनीतिक दल निकट प्रवासी संगठनका प्रतिनिधि र दूतावासका अन्य अधिकारीहरुसमेत उपस्थिति थियो ।

साथै प्रवासी संगठनका प्रतिनिधिहरुले जम्मु-कश्मीरमा देखिएका पछिल्लो तनावका कारण त्यहाँ स्थायी र अस्थायी रुपमा बस्दै आएका नेपालीहरुले भोग्नु परेका समस्याहरुको जानकारी गराएका थिए । विशेषगरी कश्मीर उपत्यकामा नेपालीहरुको जीवनयापन दिनप्रतिदिन कष्टकर बन्दै गएको र नेपाल सरकारले भारतसरकारसँगको समन्वयमा आवश्यक पहल थाल्नु पर्ने सुझाव पनि उनीहरुले दिएका थिए । ‘जम्मु-कश्मीरका नेपालीहरुले भोग्नु परेको समस्याबारेमा थाहा पाएसम्मका जानकारी राख्यौं,’ छलफलमा सहभागी पूर्व एकीकृत नेकपा माओवादीनिकट पूर्व अखिल भारत नेपाली एकता मञ्चका केन्द्रीय सचिव आरबी खड्काले बताए ।

प्रवासी नेपाली संगठनहरुका अनुसार जम्मु-कश्मीरका कठुवा, साम्बा, जम्मु शहर, उद्यमपुर, कश्मीरको श्रीनगर, पहलगाम, कार्गिल, लेहलद्दाख, बारामुला, पुलवामा, गुलमोहरलगायतका स्थानमा नेपालीहरुको बाक्लो उपस्थिति छ । तिनीहरुमध्ये धेरैजसो मजदुरी, चौकिदारी, कुक, भरिया र ससाना व्यापारलगायतका काममा संलग्न रहेको बताइन्छ ।

मोदी सरकारले गत सोमबार जम्मु-कश्मीरले उपभोग गर्दै आएको संविधानको धारा ३७० खारेज र धारा ३५ (क) खारेज गरे पछि त्यहाँको परिस्थिति तनावपूर्ण बनेको हो । जम्मु र लेह-लद्दाख क्षेत्रमा परिस्थिति केही सहज भए पनि कश्मीर उपत्यकाभित्र त्यसमा पनि श्रीनगरको स्थिति भने अझै असहज नै रहेको छ ।

ईदका लागि आइतबार सुरक्षा व्यवस्था केही खुकुलो बनाइएको भए पनि बुधबारको स्वतन्त्रता दिवसलाई ध्यानमा राख्दै पुनः कडाई गरिएको छ । जसका कारण विशेषगरी श्रीनगर र आसपासका जिल्लामा रहेका नेपालीहरुलाई दैनिक उपभोग्य सामान किन्न पनि कडाई भएको धारणा दूतावासमा भएको छलफलमा सहभागी प्रवासी नेपाली संगठनका प्रतिनिधिहरुले राखेका थिए ।

साथै जम्मु-कश्मीरमा देखिएको तनावपूर्ण स्थितिले त्यहाँको पर्यटन क्षेत्रमा ठप्प भएको हुँदा त्यस क्षेत्रमा काम गर्ने नेपालीहरुको रोजगारी नै संकट परेको समेत उनीहरुले बताएका थिए । साथै आफूहरुले जम्मु-कश्मीरमा रहेका नेपालीहरुको अवस्था बुझ्न दूतावास र प्रवासी संगठनहरुको प्रतिनिधिहरु सम्मिलित संयुक्त टोली पठाउनका पहल गर्न समेत दूतावासलाई आग्रह गरेको समेत उनले जानकारी दिए ।

प्रकाशित : श्रावण २९, २०७६ १०:५२
ADVERTISEMENT
प्रतिक्रिया
पठाउनुहोस्
ADVERTISEMENT

पवन चाम्लिङका १० विधायक भाजपामा

मनोज बोगटी

(दार्जिलिङ) — पश्चिम बंगाल राज्यपछि भारतीय जनता पार्टीको आँखा सिक्किममा परेको छ । सिक्किमको राजनीतिमा भारतको सत्तारूढ दल भाजपाको उपस्थिति रहे पनि हालसम्म खास प्रभाव भने पार्न सकिरहेको थिएन ।

तर पवन चाम्लिङको दल सिक्किम डेमोक्रेटिक फ्रन्ट (एसडीएफ) को २५ वर्षे एकछत्र राज तोड्दै पीएस गोलेको सिक्किम क्रान्तिकारी मोर्चाले सरकार बनाएपछि सिक्किमको राजनीतिमा हलचल पैदा भएको छ ।

भारतीय जनता पार्टीको निर्देशनमा सिक्किमको राजनीतिक चलखेल गरिरहेको आरोप प्रसिद्ध फुटबल खेलाडी भाइचुङ भुटियाको दल हाम्रो सिक्किमलाई लाग्दै आएको छ । त्यसैगरी, सिक्किम क्रान्तिकारी मोर्चालाई समेत भाजपानिकट रहेको आरोप बेलाबेलामा लाग्ने गर्छ । तर क्षेत्रीय राजनीतिमा कुनै छनक नदिई सिक्किम डेमोक्रेटिक फ्रन्टका १० विधायक भारतीय जनता पार्टीमा प्रवेश गरेका छन् ।

उनीहरूलाई मंगलबार दिउँसो भाजपाका कार्यवाहक अध्यक्ष जेपी नड्डा र वरिष्ठ नेता राम माधवले भारतको राजधानी नयाँदिल्लीस्थित मुख्यालयमा आयोजित कार्यक्रममा पार्टी प्रवेश गराए । एसडीएफका वरिष्ठ विधायक दोर्जी छिरिङ लेप्चाको नेतृत्वमा उनीहरू भाजपा प्रवेश गरेका भारतीय सञ्चारमाध्यमले जनाएका छन् ।

सिक्किममा ३२ विधानसभा सिट छन् । गत विधानसभा चुनावमा एसडीएफले १५ र एसकेएमले १७ सिट जितेपछि एसकेएमले सरकार गठन गरेको थियो । यद्यपि एसडीएफका २ र एसकेएमका एक विधायकले दुई/दुई क्षेत्रमा चुनाव जितेका कारण ३ स्थानमा उपनिर्वाचन हुन बाँकी छ । तर १० विधायक सामेल भएसँगै भाजपा सिक्किमको प्रमुख प्रतिपक्षी दल बनेको छ । भाजपा महासचिव राम माधवले भाजपाले विपक्षको रचनात्मक भूमिका निर्वाह गर्ने बताए । पार्टी प्रवेश गरेलगत्तै विधायक दोर्जी छिरिङ लेप्चाले आफूहरू समयको मागअनुसार भाजपा प्रवेश गरेको बताए ।

‘मोदी सरकारले जसरी देशलाई अघि बढाइरहेको छ त्यो देखेर सिक्किमका युवा आकर्षित हुँदै गएका छन्,’ उनले भने, ‘त्यसलाई हरेर हामीले पनि समयसापेक्ष राजनीति गर्नुपर्छ ।’ यद्यपि, उनले केन्द्रको आशीर्वाद नभएसम्म क्षेत्रीय राजनीतिक दलको औचित्य नरहने दाबी गरे ।

प्रकाशित : श्रावण २९, २०७६ १०:५०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×