कालंगाको साढे तीन किमी सुरुङ निर्माण सम्पन्‍न- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

कालंगाको साढे तीन किमी सुरुङ निर्माण सम्पन्‍न

वसन्तप्रताप सिंह

बझाङ — निजी क्षेत्रको लगानीमा निर्माण भइरहेको सुदूर पश्चिमकै ठुलो कालंगा गाड जलविद्यूत आयोजनाको करिब साढे तीन किलोमिटर सुरुङ निर्माणको काम सम्पन्न (ब्रेकथ्रू) भएको छ । बुगंल नगरपालिका-५ र वित्थडचिर गाउँपालिकाको वडा नं ६ र ८ मा पर्ने उक्त सुरुङको निर्माण कार्य शुक्रबार दिउँसो सम्पन्न भएको हो ।

सुरुङ निर्माणमा संलग्‍न टोलीले शुक्रबार एक कार्यक्रमको आयोजना गरेर अन्तिम विष्फोटन (फाइनल ब्लास्ट) गरेको थियो । ३ हजार ४ सय ६८ मिटर लम्बाईको उक्त सुरुङबाट बुङगल नगरपालिकाको पाउटामा रहेको कालंगा नदीको पानी वित्थड चिर गाउँपालिकाको घोडादाउनामा रहेको विद्युत गृहमा झारिने छ ।

तल्लो कालंगा गाड नाम दिइएको यो खण्डबाट १५.३३ मेघावाट विद्युत उत्पादन हुने अनुमान गरिएको छ । ‘सुरुङको ब्रेक थ्रू भएसँगै यो आयोजनाको मुख्य काम सबै सम्पन्न भएको छ,’ आयोजना प्रमुख बखतबहादुर शाहीले भने,‘संरचनाहरुको फिनिसिंङ गर्न केही समय लाग्ने भएकोले पुसबाट मात्रै विद्युत उत्पादन सुरु हुने छ ।’उनले निर्माण सम्पन्न भएको सुरुङ पेनस्टक सुरुङ रहेको बताउँदै सुरुङभित्र पाइप बिछ्याउने काम पनि सम्पन्न भइसकेको बताए ।

यस्तै, हेड वर्कस, पावरहाउस, प्रसारण लाइन निर्माणको काम पनि अन्तिम चरणमा रहेकाले पुसभित्रै विद्युत उत्पादन हुने कुरामा ढुक्क रहेको शाहीले बताए ।

कालंगागाड (१५.३३ मेघावाट), माथिल्लो कालंगागाड (३८.४६ मेघावाट) र माथिल्लो सानीगाड (१०.७० मेघावाट) गरि करिब ६५ मेघावाट विद्युत उत्पादन गर्ने लक्ष्य रहेको यस आयोजनाको तीन वटै सेक्सनमा लकडाउनको अवधिमा पनि द्रूत गतिमा काम भइरहेको आयोजनाले जानकारी दिएको छ ।

आयोजनाले तीनवटै सेक्सनको ८० प्रतिशत काम सम्पन्‍न भइसकेको र १५ प्रतिशत भन्दा बढी प्रगति लकडाउनको अवधिमा भएको जानकारी दिएको छ । यस आयोजनाको सुरुङ निर्माण कार्य १०० प्रतिशत, इन्टेक, ड्याम साइट र बक्स कल्भर्टलगायत बाहिरी संरचना निमार्णको कार्य ६५ प्रतिशत र विद्युत गृह निमार्णको कार्य ९५ प्रतिशत भन्दा बढी सम्पन्न भैसकेको छ ।

प्रकाशित : आश्विन १०, २०७७ १५:१६
प्रतिक्रिया
पठाउनुहोस्

रुपन्देहीमा बाढीको वितण्डा : १७ घर बगे, २४ भत्किए

अमृता अनमोल

बुटवल — भारी वर्षासँगै शुक्रबार राति आएको बाढीले रुपन्देहीमा १७ घर बगाएको छ भने २४ घर भत्किएका छन् । बाढीपहिरोमा परि ६ जना घाइते भएका छन् । बाढीले दर्जनौं परिवार विस्थापित भएका छन् । एक सय बढी घर डुबानमा परेका छन् ।

दानव नदीमा आएको बाढी बस्तीमा उर्लिएपछि सम्मरीमाई गाउँपालिका देबन्डीका पर्बावती मल्लाहको घर भत्किँदा ५ जना घाइते भएको जिल्ला प्रहरी कार्यालय रुपन्देहीका प्रवक्ता खड्गबहादुर खत्रीले बताए । यस्तै, लुम्बिनी सांस्कृतिक नगरपालिका-१३ वडउलियस्थित बलिराम हरीजनको घर भत्किँदा उनकी पत्‍नी घाइते भएकी छन् ।

बाढीले बुटवल उपमहानगरपालिकामा ६ वटा घर बगाएको छ । तिनाउ नदीमा आएको बाढीले बुटवल-१७ रानीगन्जका ३ र चुरेबाट आएको भेलले बुटवल-४ गैरीगाउँका ३ घर बगाएको वडा अध्यक्ष टंकप्रसाद पराजुलीले बताए । ती ठाउँका १६ घरपरिवार विस्थापित भएका छन् ।

सुखौरा खोलामा आएको बाढीले तिलोत्तमा नगरपालिकामा ४ वटा घर बाढीले बगाएको छ । उता रोहिणी नदीमा आएको बाढीले देवदह १० मा एक घर बगाएको छ । रोहिणी नदीमा आएको बाढी बस्तीमा पस्दा ओमसतिया गाउँपालिका-५ पिपरहियामा ५ घर भत्केका छन् । दानव नदीले लुम्बिनी सांस्कृतिक नगरपालिकामा ५ घर बगाएको छ । बाढीले मर्चवारी गाउँपालिकाका १५ घर भत्काएको छ । तिनाउ नदीको बाढीले मायादेवी गाउँपालिका ६ मा ४ घर भत्काएको छ ।

बाढीले बुटवल ११ बुद्धनगर र तल्लो मझवा जोड्ने सडक बगाएको छ । यसले मझुवाका एक सय घरसंगको सडक सम्बन्ध विच्छेद गराएको वडाअध्यक्ष रामचन्द्र खनालले बताए । बाढीको बेगले पक्कीपुलसमेत जोखीममा छ ।

तिनाउ, दानव, रोहिणी नदी र सुखौरा खोलाले बुटवल, तिलोत्तमा, देवदह, ओमसतिया, सम्मरीमाई, लुम्बिनी सास्कृतिक नगरपालिकाका दर्जनौं घर डुबानमा परेका छन् । क्षति र विस्थापित परिवारको संख्या संकलन गरिरहेको प्रवक्ता खत्रीले बताए ।

प्रकाशित : आश्विन १०, २०७७ १४:१३
पूरा पढ्नुहोस्
प्रतिक्रिया
पठाउनुहोस्
×