बुटवलमा फस्टाउँदै होम डेलिभरी- अर्थ / वाणिज्य - कान्तिपुर समाचार
कान्तिपुर वेबसाईट
AdvertisementAdvertisement

बुटवलमा फस्टाउँदै होम डेलिभरी

अमृता अनमोल

बुटवल — कोरोना सन्त्रास र लकडाउनले व्यापार चौपट भएपछि यहाँका व्यवसायीले अहिले हरेक सामान होम डेलिभरी गर्न थालेका छन् । सेमलारका देवराज पोखरेलले वैशाख पहिलो सातादेखि ढाक्रे डटकम खोलेर होम डेलिभरी थालेका हुन् ।

सुरुमा रूपन्देहीका गाउँले किसानका तरकारी बुटवलका घरघरमा पुर्‍याए । अहिले जुम्लाका स्याउ, सिमी, आलुदेखि भारतको नासिक सहरको प्याज, खाद्यान्न होम डेलिभरी गरिरहेको पोखरेलले बताए । ‘भान्सामा आवश्यक पर्ने सबै खाद्यान्नको होम डेलिभरी गर्छौं,’ उनले भने, ‘दिनमा ८० वटा जति डेलिभरी हुन्छ । भ्याइनभ्याइ छ । व्यापार सुरु गरेदेखि पछाडि फर्केर हेर्नुपरेको छैन ।’ ५० लाखको लगानी रहेको बताउने उनीसँग एउटा गाडी र १६ जना कर्मचारी छन् । फोन र इन्टरनेट दुवैबाट अर्डर संकलन गर्छन् । २ वर्षयता खाद्यान्न डेलिभरी सुरु गरेको विशाल होम डेलिभरी सप्लायर्सले लकडाउनको अवधिमा एक दिन खाली हुनुपरेन । व्यापार अरू बेलाभन्दा राम्रो रहेको सञ्चालक विशाल थापाले बताए । ‘कोरोना भाइरसको डर र लकडाउनअघि होटल रेस्टुरेन्टमा मात्रै डेलिभरी हुन्थ्यो । घरायसी रूपमा पुग नपुग एक प्रतिशत थियो,’ उनले भने, ‘अहिले घरायसी प्रयोजनकै लागि होम डेलिभरी गर्न भ्याइनभ्याइ छ ।’ दिनमा ७० घरसम्ममा सामान पुर्‍याउने गरेको उनले बताए । ‘खाद्यान्नका सबै सामानदेखि घरमा प्रयोग हुने सामग्री निःशुल्क डेलिभरी गर्छौं,’ उनले भने, ‘त्यसैले लकडाउनले पनि व्यापार घटेन ।’

लकडाउनले होटल र रेस्टुरेन्ट बन्द छन् । खाद्यान्न सामग्रीका पसल पनि खुल्ने र बन्द हुने समय तालिका छ । त्यसबेला पसलमा भीडभाड हुन्छ । भीडभाडले कोरोना संक्रमण हुने डर हुन्छ । यही डरका कारण पनि धेरै उपभोक्ता अहिले होम डेलिभरीबाट सामान झिकाउँछन् । यसले होम डेलिभरी व्यापार फस्टाउँदै गएको छ । उपभोक्तालाई पनि सहज भएको छ । पछिल्लो समयमा खाद्यान्नदेखि लत्ताकपडासमेत होम डेलिभरी गराएको सुक्खानगरकी उपभोक्ता कविता भुसालले बताइन् । ‘घरमै बसीबसी सबै सामान उही मूल्यमा पाइन्छ,’ उनले भनिन्, ‘त्यसैले कोरोनाको जोखिम मोलेर पसल जानभन्दा होम डेलिभरी रोजेका छौं ।’

लकडाउनअघि व्यापारीहरूले निश्चित मूल्यसम्मको मात्र होम डेलिभरी गर्थे । अहिले जतिसुकै थोरै सामानको पनि डेलिभरी हुन्छ । यसले पनि होम डेलिभरी व्यापार बढेको छ । २ वर्षअघि सुरु एभरग्रिन सप्लायर्सले फ्रोजन फुड्स सप्लायर्स गर्छ । होटल, रेस्टुरेन्टमा सामान पुर्‍याउने सप्लायर्सले पछिल्लो समय होम डेलिभरी सुरु गरेको छ । ‘होम डेलिभरीका कारण महामारीका बेला पनि खाली बस्नुपरेन । व्यापार भयो,’ सञ्चालक राजेन्द्र पन्तले भने, ‘घरघरमा सामान झिकाउने ग्राहक दिनैपिच्छे बढ्दो छन् ।’ बुटवलमा होम डेलिभरीकै लागि खुलेका १८ संस्था छन्  ।

प्रकाशित : भाद्र ३०, २०७७ ०६:५४
प्रतिक्रिया
पठाउनुहोस्

खस्कियो चियाको पश्चिमा व्यापार

यसअघिको तुलनामा यो वर्ष ४० प्रतिशतले चियाको अन्तर्राष्ट्रिय बजारमा गिरावट आएको छ
विप्लव भट्टराई

इलाम — अघिल्ला वर्षहरूमा चियाको फस्टफ्लस सुरु हुनासाथ पश्चिमा देशका व्यापारी पूर्वी पहाडी जिल्लाका चिया बगान चहार्दै गरेका भेटिन्थे । विशेषगरी जर्मनी, अमेरिकालगायत मुलुकका चिया खरिदकर्ताले बगान र कारखानासम्मै पुगेर चिया माग गर्ने गरेका थिए ।

यो पटक भने कोभिड–१९ का कारण विश्वभर छाएको सन्त्रासले कुनै पनि चिया खरिदकर्ता बगान आउन सकेनन् । जसको प्रत्यक्ष प्रभाव पश्चिमा देशमा निर्यात हुने चियामा परेको छ ।

यसअघिको तुलनामा यो वर्ष ४० प्रतिशतले चियाको अन्तर्राष्ट्रिय बजारमा गिरावट आएको छ । नेपाली चिया निर्यात हुने देशमा पनि कोरोनाका कारण लकडाउन हुनु, हवाईमार्गमार्फत नेपाली चिया त्यहाँ पुर्‍याउन नसक्नु जस्ता कारणले निर्यातमा समस्या देखिएको उद्यमीहरू बताउँछन् । नेपाली चियालाई विश्व बजारमा प्रवर्द्धन गर्ने उद्देश्यले चिया तथा कफी विकास बोर्ड र हिमालयन अर्थोडक्स टी प्रोड्युसर्स एसोसिएसन (होड्पा) ले लोगोसमेत तयार पारेर प्रचार भइरहेका बेला कोरोनाको प्रभावले चिया बजारमा समस्या भएको हो । ‘आन्तरिकसहित पश्चिमा देशमा निर्यातमा सुधार हुँदै गएको अवस्थामा कोरोना महामारीले स्पेसल टी उत्पादन गर्नेहरूलाई सबैभन्दा धेरै प्रभावित बनाएको छ,’ उद्यमी चन्द्रभूषण सुब्बाले भने, ‘आफैंले पनि न्यून मात्रामा तयारी चिया उत्पादन गर्ने कारखाना र कर्मचारी थेग्ने काम मात्र गरिरहेको छु ।’ यो पटक पानी धेरै परेको र फस्टफ्लस सुरु हुँदै गर्दा लकडाउन भएकाले चियाको उत्पादनमा कमी आएको किसानको भनाइ छ । लकडाउनको सुरुवाती केही साता कारखाना बन्द हुँदा हरियो चियापत्ती टिपाइ हुन सकेन । त्यसपछि कारखाना सञ्चालन भए पनि इन्धन, कर्मचारी अभाव जस्ता कारणले लामो समय नै कारखाना पूर्ण क्षमतामा चल्न सकेको थिएन । सुरुवातमा भारतीय बजारमा नेपाली चिया निर्यात नभए पनि पछिल्लो समय सहज बन्यो ।

इलामसहित पाँचथर, धनकुटा, तेह्रथुमलगायत जिल्लामा उत्पादन हुने वार्षिक ६० लाख किलो तयारीमध्ये करिब ५ लाख किलो चिया युरोपेली तथा अमेरिकी देशमा जाने अनुमान छ । तर यो वर्ष ४० प्रतिशतले कम मात्र निर्यात हुने गोर्खा टी इस्टेटका सञ्चालक उदय चापागाईं बताउँछन् । ‘अघिल्लो वर्ष यही अवधिसम्म १८ हजार किलो तयारी चिया युरोप पठाएकोमा यो वर्ष मुस्किलले १० हजार किलो मात्र पठाउँदै छौं,’ उनले थपे, ‘अझै पनि लोगोलाई प्रचार गर्दै बजारको पहुँच बढाउने काममा लागेका छौं ।’ ‘नेपाल चिया क्वालिटी अफ हिमालयज’ नामक लोगो सरकारले स्वीकृत गरिसकेको छ । नेपालको चिया गुणस्तरीय रहे पनि पहुँच र प्रचारका अभावमा पश्चिमा बजारमा प्रवर्द्धन हुन नसकेको सरोकारवालाको भनाइ छ । पश्चिमा बजारमा चिया निर्यात गर्ने केही उद्योगले हरियोपत्तीको मूल्य प्रतिकिलो साढे ९२ रुपैयाँसम्म दिए पनि अन्य कारखनाले न्यून मूल्य दिएको र समयमा भुक्तानी नगरेको किसानको गुनासो छ ।

प्रकाशित : भाद्र ३०, २०७७ ०६:५३
पूरा पढ्नुहोस्
प्रतिक्रिया
पठाउनुहोस्
×