गत वर्षभन्दा साढे ५१ हजार हेक्टर बढीमा रोपाइँ

‘०७६ भदौ १ सम्म ९४.४३ प्रतिशत रोपाइँ भएको थियो, ०७७ साउन २८ सम्म ९८.१९ प्रतिशत रोपाइँ भएको छ,’ मन्त्रालयका प्रवक्ता हरिबहादुर केसीले भने । केही क्षेत्रमा एक/दुई हेक्टर रोपाइँ हुन बाँकी रहे पनि त्यसले खासै असर नगर्ने उनले बताए । समयमै रोपाइँ हुनुको कारण मुख्यतः मनुसन नै हो ।

मन्त्रालयका अनुसार मुख्य धान रोपाइँ हुने क्षेत्रमा धेरै ठूलो बाढीपहिरो पनि आएन । कोभिड–१९ का कारण सर्वसाधारण गाउँघर पुगे । धानको बीउ पनि पर्याप्त भएकाले समयमै रोपाइँ भएको प्रवक्ता केसीको दाबी छ । उच्च पहाडी क्षेत्रमा ९८.८४ प्रतिशत रोपाइँ भएको छ । यो क्षेत्रमा ४८ हजार १ सय ९३ हेक्टरमा रोपाइँ हुन्छ । मध्य पहाडमा ९७.२७ प्रतिशत रोपाइँ भएको छ । यस क्षेत्रमा ३ लाख ४६ हजार ९९ हेक्टरमा धान रोपाइँ हुन्छ । धान उत्पादन हुने मुख्य क्षेत्र तराईमा ९८.५ प्रतिशतमा रोपाइँ भएको छ । यहाँ ९ लाख ७७ हजार ४ सय १४ हेक्टरमा रोपाइँ हुने उनले जानकारी दिए ।

पहाडमा भने केही मान्छेले खेती गर्न छाडेको उनले बताए । केही क्षेत्रमा टुक्रे जग्गा छ । जसले गर्दा पहाडमा हरेक वर्ष रोपाइँ हुन बाँकी रहँदै आएको उनको भनाइ छ । कोभिडका कारण सरकारले ‘जग्गा बाँझो नराखौं’ अभियान चलाएकाले पनि केही सुधार भएको मन्त्रालयको दाबी छ । ‘केही पालिकाले अनुदानको समेत व्यवस्था मिलाए । जसले गर्दा रोपाइँ राम्रो भएको देखिन्छ,’ केसीले भने ।

_{स्रोत : कृषि तथा पशुपन्छी विकास मन्त्रालय}

प्रदेशका हिसाबले सबैभन्दा सुदूरपश्चिम प्रदेशमा रोपाइँ भएको छ । यहाँ ९९.८६ प्रतिशत रोपाइँ भएको मन्त्रालयको तथ्यांक छ । गत वर्ष यस क्षेत्रमा शतप्रतिशत रोपाइँ भएको थियो । सुदूरमा १ लाख ६४ हजार ६ सय ३९ हेक्टरमा रोपाइँ हुन्छ । दोस्रोमा प्रदेश २ मा ९९.०२ प्रतिशत रोपाइँ भएको छ । गत वर्ष यो क्षेत्रमा ९३.४९ प्रतिशत मात्रै रोपाइँ भएको थियो । प्रदेश २ मा ३ लाख ६५ हजार ६ सय १५ हेक्टरमा रोपाइँ हुन्छ । तेस्रोमा प्रदेश ५ छ । यहाँ ९८.६६ प्रतिशत रोपाइँ भएको छ ।

गत वर्ष ९४.३९ प्रतिशत मात्रै रोपाइँ भएको थियो । यस क्षेत्रमा ३ लाख ३ हजार ५ सय ९३ हेक्टरमा रोपाइँ हुन्छ । कर्णाली प्रदेशमा ९८.५३ प्रतिशत रोपाइँ भएको छ । यो क्षेत्रमा ३८ हजार ३ लाख ८५ हेक्टरमा रोपाइँ भयो । गण्डकी प्रदेशमा ९७.६८ प्रतिशत रोपाइँ भयो । यहाँ १ लाख ८ हजार २ सय ७८ हेक्टरमा रोपाइँ हुन्छ । यस्तै प्रदेश १ मा ९५.८८ प्रतिशत रोपाइँ भएको छ । गत वर्ष यहाँ ९३.४९ प्रतिशत रोपाइँ भएको थियो ।

प्रदेश ३ मा ९७.८५ प्रतिशत रोपाइँ भएको मन्त्रालयको तथ्यांक छ । गत वर्ष यहाँ ९६.९५ प्रतिशत रोपाइँ भएको थियो । यस वर्ष जुम्लामा जेठ १५ देखि रोपाइँ सुरु भएको मन्त्रालयले जनाएको छ । मध्य पहाडमा जेठ अन्तिम साता र तराईमा असार लागेपछि रोपाइँ सुरु भएको थियो ।

खडेरी हुँदा केही क्षेत्रमा भदौ पहिलो सातासम्मै रोपाइँ हुन्छ । गत वर्ष पनि खडेरीकै कारण भदौ १० सम्म पनि रोपाइँ भएको मन्त्रालयले जनाएको छ । यस वर्ष रोपाइँ समयमै भए पनि मलकै समस्या देखिएको छ । रोपाइँकै समयमा मलको चरम अभाव देखिएको थियो । जसले गर्दा उत्पादनमा सामान्य असर गर्न सक्ने मन्त्रालयको दाबी छ ।