सुन भाउ उकालो लागेको लाग्यै, प्रतितोला १,०२,५०० रुपैयाँ- अर्थ / वाणिज्य - कान्तिपुर समाचार

सुन भाउ उकालो लागेको लाग्यै, प्रतितोला १,०२,५०० रुपैयाँ

कान्तिपुर संवाददाता

काठमाडौँ — सुनको मूल्य हरेक दिन उकालो लागिरहेको छ । बिहीबार नेपाली बजारमा छापावाल सुनको मूल्य प्रतितोला एक लाख २ हजार ५ सय रुपैयाँ पुगेको छ । बुधबारको तुलनमा नेपाली बजारमा सुनको भाउ एक हजार एक सय रुपैयाँले बढेको हो ।

अन्तर्राष्ट्रिय बजारम सुनको भाउ बढेसँगै नेपाली बजारमा पनि भाउ बढेको सुनचाँदी व्यवसायी महासंघका पूर्वअध्यक्ष एवं महासंघअन्तर्गतका मूल्य निर्धारण समिति संयोजक तेजरत्न शाक्यले जानकारी दिए । त्यस्तै बिहीबार नेपाली बजारमा तेजाबी सुनको भाउ एक लाख २ हजार रहेको छ ।

त्यस्तै बिहीबार नेपाली बजारमा चाँदीको पनि भाउ बढेर प्रतितोला एक हजार ३ सय ९५ रुपैयाँ पुगेको छ । बुधबार नेपाली बजारमा चाँदीको भाउ प्रतितोला एक हजार २ सय ९५ रुपैयाँ कायम भएको थियो ।

अहिले परिस्थिति विषम भएकाले लगानीका अन्य क्षेत्र सुरक्षित नमानिएकाले लगानीकर्ताले सुनमै लगानी गर्न चाहेको शाक्यले जानकारी दिए । कोभिड–१९ का कारण विश्व अर्थतन्त्र शिथिल अवस्थामा पुगेको छ । यसको असर सबै क्षेत्रमा परेपछि लगानीकर्ता सुरक्षित लगानीको खोजीमा सुनमा लगानी गरिरहेका छन् । सुनको माग बढिरहँदा उत्पादन भने घटेको छ । २०१८ मा अन्तर्राष्ट्रिय बजारमा वार्षिक उत्पादन र कारोबार ४ हजार ५ सय टन रहेकोमा घटेर ३ हजार ५ सय टनको मात्रै भएको छ । जसले गर्दा भाउ अकासिएको महासंघले जनाएको छ ।

महासंघको तथ्यांकअनुसार केही महिनायता भाउमा लगातार नयाँ रेकर्ड बनाएको छ । भाउ दिनहुँ बढ्नुको एक कारण अमेरिका र चीनबीचको व्यापारिक युद्ध पनि हो । यीबाहेक अन्तर्राष्ट्रिय बजारमा बैंकहरूले ब्याजदर घटाएका छन् । जसले गर्दा लगानीकर्ताले सुनलाई नै प्राथमिकता दिएका छन् । ‘अन्तर्राष्ट्रिय बजारमा प्रतिऔंस सुन थप २/३ सय डलर बढ्न सक्ने अनुमान छ,’ शाक्यले भने, ‘त्यो भनेको नेपाली बजारमा थप १०/१२ हजार रुपैयाँ थप मूल्य बढ्नु हो ।

सुनको भाउ बढे पनि नेपाली बजारमा माग भने सुस्त छ । भाउ बढेकै कारण बजार सुनसान भएको व्यवसायी बताउँछन् । ‘सुनको भाउले दैनिक नयाँ रेकर्ड बनाएपछि बिक्री शून्य छ,’ शाक्यले भने, ‘भाउ थप बढ्ने आकलनले सर्वसाधारणले पुराना गहना पनि बेचेका छैनन् ।’

प्रकाशित : श्रावण २२, २०७७ ११:४९
प्रतिक्रिया
पठाउनुहोस्

स्कुटरको ठक्करबाट भक्तपुरमा पैदलयात्रुको मृत्यु

कान्तिपुर संवाददाता

भक्तपुर — स्कुटरको ठक्करबाट भक्तपुरमा पैदलयात्रुको मृत्यु भएको छ । प्रहरीका अनुसार बुधबार दिउँसो चाँगुनारायणबाट भक्तपुरतर्फ आउँदै गरेको प्रदेश ३–०२–०१५ प ७२६५ नम्बरको स्कुटरको ठक्करबाट सख्त घाइते भक्तपुर नगरपालिका–२ भोलाछेंकी ४१ वर्षीया सुन्दरी सुवालको उपचारका क्रममा मृत्यु भएको हो ।

स्कुटरको ठक्करबाट घाइते भएकी महिलाको उपचारको क्रममा न्यूरो अस्पताल बाँसबारीमा बिहीबार मृत्यु भएको भक्तपुर प्रहरी प्रवक्ता डीएसपी दीपक गिरीले बताए । पैदलयात्रुलाई ठक्कर दिने स्कुटर र स्कुटर चालक चाँगुनारायण नगरपालिका–६ छालिङका २२ वर्षीय आशिष कार्कीलाई प्रहरीले नियन्त्रणमा लिएको छ ।

प्रकाशित : श्रावण २२, २०७७ ११:२६
पूरा पढ्नुहोस्
प्रतिक्रिया
पठाउनुहोस्
×