डेढ सय मेगावाट विद्युत् थपियो
काठमाडौँ — चालु आर्थिक वर्षको सुरुवाती चार महिनामा १४७ दशमलव ५ मेगावाट जडित क्षमता भएका विद्युत् आयोजनाहरू राष्ट्रिय प्रणालीमा जोडिएको नेपाल विद्युत् प्राधिकरणले जनाएको छ ।
प्राधिकरणका अनुसार प्राधिकरण अन्तर्गतका २ र निजी क्षेत्रका ६ वटा गरी ८ वटा विद्युत् आयोजना निर्माण सम्पन्न भई प्रणालीमा जोडिएका हुन् । प्राधिकरणअन्तर्गतका आयोजनाको जडित क्षमता ७४ मेगावाट छ भने निजी क्षेत्रका आयोजनाको जडित क्षमता ७३ दशमलव ५ मेगावाट छ । यो अवधिमा विद्युत् प्राधिकरणद्वारा सञ्चालित आयोजनाको वित्तीय प्रगति १०२ प्रतिशत भएको प्राधिकरणले जनाएको छ । यी आयोजनामा पहिलो चौमासिकमा १३ अर्ब ११ करोड रुपैयाँ खर्च गर्ने लक्ष्य राखिएकामा १३ अर्ब ३१ करोड रुपैयाँ खर्च भएको प्राधिकरणले जनाएको छ ।
प्राधिकरणले चालु आवमा नेपाल सरकारको स्रोतबाट १० अर्ब ३१ करोड र वैदेशिक ऋण तथा अनुदानबाट ४५ अर्ब ३० करोड गरी ५५ अर्ब ६१ करोड रुपैयाँ बजेट पाएको छ ।
प्रकाशित : मंसिर २७, २०७६ ०८:५९