पसल अनुगमन गरेपछि कपडा व्यवसायीको विरोध

राजु चौधरी

काठमाडौँ — सरकारले लत्ताकपडामा अनुगमन गर्न थालेपछि व्यवसायीले विरोध जनाएका छन् । बजार अनुगमन तथा मूल्य नियन्त्रण गर्ने अधिकार पाएको वाणिज्य आपूर्ति तथा उपभोक्ता संरक्षण विभागको टोलीले बिहीबार न्युरोडमा अनुगमन गर्दा व्यवसायीले नाराबाजी गरेका छन् ।

विभागले चाडबाडलाई लक्षित गरी न्युरोडमा रहेको रञ्जना कम्प्लेक्समा तीन टोली अनुगमन खटाएको थियो । विभागका निरीक्षण अधिकृत रमेशकाजी श्रेष्ठ, निरज खत्री र निरजकुमार खत्री र कपिलप्रसाद रेग्मीको टोलीले अनुगमन गरेका थिए । अनुगमनको क्रममा व्यवसायीहरूले लत्ताकपडामा मूल्यसूची नराखी मनपरी मूल्य कायम गरेको भेटिएपछि ४ व्यवसायीलाई ५० हजार रुपैयाँको दरले जरिवाना गरेको थियो । त्यसपछि व्यापारीले विरोध गरेको निरीक्षण अधिकृत श्रेष्ठले बताए ।

‘तीन टोलीले अनुगमन गरिरहेका थियो । सुरुमा ठिकै थियो । लत्ताकपडामा मूल्य थिएन । मनोमानी मूल्य लिएको भेटिएपछि जरिवना गर्‍यौं,’ श्रेष्ठले भने, ‘त्यसपछि व्यवसायीहरूले सटर बन्द गरेर विरोध सुरु गरे । उनका अनुसार व्यापारीले ‘घुसिया कर्मचारी मुर्दावाद’, ‘दसैंमा मात्रै अनुगमन गर्न पाइदैन,’ भन्दै नाराबाजी गरेका थिए ।

रन्जना कम्प्लेक्समा करिब ५ सय पसल छन । ती सबै व्यापारी विरोधमा उत्रिएको श्रेष्ठले बताए । ‘भीड अराजक भयो । खबर नगरी अनुगमन गर्न आएको भन्दै नाराबाजी गरे । अनुगमन टोलीलाई घेरे,’ श्रेष्ठले भने । रन्जना कम्प्लेक्सका अध्यक्ष अन्जन शाक्यले व्यवसायीलाई शान्त हुन अनुरोध गरेपछि पनि भीड नियन्त्रण नभएको उनले बताए । करिब आधा घण्टा नाराबाजी चलेको र थप प्रहरी आएपछि भीड नियन्त्रण भएको उनले जानकारी दिए ।

नयाँ उपभोक्ता संरक्षण ऐन २०७५ अनुसार निरिक्षण अधिकृतले अनुगमन स्थलमै जरिवानाको अधिकार दिएको छ । मूल्य सूची नहुँदा ५० हजार देखि १ लाख रुपैयाँ जरिवानाको अधिकार भएको श्रेष्ठले बताए । सोही ऐन कार्यान्वयन गर्न खोज्दा व्यवसायीहरूले विरोध गरेका हुन् । भीड शान्त भएपछि कम्प्लेक्सका अध्यक्ष र अनुगमन टोलीबीच छलफल भएको थियो । थप छलफलका लागि व्यवसायीहरू विभागमै आएका थिए । ‘हुलहुज्जत गर्न खोजेपछि थप छलफलका लागि विभागमा बोलाइएका थियो,’ विभागका अर्का निरीक्षण अधिकृत दिपक पोखरेलले भने, ‘अनुगमन र कारबाही ऐन अनुसार नै हुन्छ ।’

विभागका महानिर्देशक योगेन्द्र गौचनले अनुगमन टोलीलाइ घेराउ गर्नु गलत भएको बताए । ‘बजार अनुगमन गर्दा व्यवसायीले घेराउ गरेका छन् । यो गलत हो,’ उनले भने, ‘विभाग कानुनी ढंगले अघि बढ्छ । अनुगमन रोकिदैन ।’ अनुगमनको क्रममा कैफियत भेटिए कारबाही हुने उनले बताए । करिब ५ वर्षअघि विभागको टोलीले न्युरोडमा अनुगमन गर्दा पनि व्यवसायीहरूले विरोध गरेका थिए ।

उनीहरूले अनुगमनको विरोध गर्दे तत्कालिन विभागका निर्देशक हरि नारायण बेल्बासेलाई पनि घेराबन्दी गरेका थिए । विभागको टोलीले बिशालबजारमा अनुगमन गर्दा अस्वभाविक मूल्य लिएको पाइएको थियो । त्यसपश्चात शिलबन्दी गर्न खोज्दा व्यवसायीले नाराबाजाी गरेका थिए।

करिब दुई वर्षअघि विभागकै अनुगमन टोलीले दरबारमार्गका स्टोरहरू अनुगमन गर्दा पनि अस्वभाविक मूल्य लिएको पाएको थियो । त्यसक्रममा शिलबन्दी गर्दा व्यवसायीहरूले अनुगमनको बिरोधमा अनिश्चतकालिन बन्द समेत गरेका थिए ।

नेपाल चेम्बर अफ कर्मशको पहलमा व्यवसायी र सरकारी निकाय बिच बार्ता भएपछि उनीहरूले व्यवसाय सन्चालन गरेका थिए । विभागको टोलीले कालिमाटी तरकारी बजारमा अनुगमन गर्दा पनि व्यवसायीले घेराउ गरेका थियो । अनुगमन टोलीलाई प्रहरी परिचालन गरेर छुटाइएको थियो । अनुगमनको विरोधमा व्यवसायीले कालीमाटी तरकारी पसल समेत बन्द गरेका थिए ।

प्रकाशित : आश्विन २, २०७६ २१:५१
प्रतिक्रिया
पठाउनुहोस्

आत्महत्या दुरुत्साहनमा ६ महिना कैद  

रमेशकुमार पौडेल

चितवन — आत्महत्या दुरुत्साहन मुद्दामा चितवन जिल्ला अदालतले एक अभियुक्तलाई ६ महिना कैद र ५ हजार रुपैयाँ जरिवाना हुने फैसला सुनाएको छ ।

प्रतिकात्मक तस्बिर ।

चितवन जिल्ला अदालतका स्रेस्तेदार रुद्रमणि गिरीका अनुसार अदालतले बुधबार खैरहनीका संजोग गिरीलाई सजायँ तोकेको हो । गत वर्षदेखि दर्ता हुन थालेको आत्महत्या गर्न बाध्य पार्ने अर्थात दुरुत्साहन मुद्दामा चितवन जिल्ला अदालतले गरेको यो तेस्रो फैसला हो ।

संजोग विरुद्ध गत चैत २४ मा मुद्दा दायर भएको थियो । संजोगसँग बिहे गरेकी युवतीले गत फागुन १३ मा घरमै झुण्डिएर आत्महत्या गरेकी थिइन् । दिवंगत युवतीका माइती पक्षले संजोग र संजोगका बाबुआमा विरुद्ध प्रहरीमा उजुरी दिएपछि फागुन २७ मा उनीहरु पक्राउ परेका थिए । मुद्दा दायर भएपछि अरु जनही ३० हजार रुपैयाँ धरौटीमा छुटे पनि संजोग कारागार चलान भएका थिए ।

अदालतले संजोगलाई सजाय गरे पनि यो मुद्दामा अरुलाई सफाइ दिएको स्रेस्तेदार रुद्रमणि गिरीले बताए । त्यसैगरी माइती पक्षलाई क्षतिपूर्ति स्वरुप एक लाख रुपैयाँ तिर्नुपर्ने अदालतको फैसलामा उल्लेख भएको उनले जानकारी दिए । नयाँ मुलुकी संहिता जारी भएपछि चितवन जिल्ला अदालतमा आत्महत्या दुरुत्साहनमा अहिलेसम्म ७ वटा मुद्दा दायर भएको सरकारी वकिलको कार्यालयका सूचना अधिकारी प्रकाश थापाले बताए ।

जसमध्ये फैसला भएका तीनवटा मुद्दा सबैमा अभियुक्तलाई जेल सजायँ भएको छ । चितवन जिल्ला अदालतमा माधव न्यौपानविरुद्ध आत्महत्या दुरुस्तासहनको पहिलो मुद्दा दायर भएको थियो । पहिलो फैसला पनि सोही मुद्दामा भएको थियो । गत वर्षको मंसिर एक गते एकजना महिलाले आत्महत्या गरेपछि दुरुत्साहन अभियोगमा माधवविरुद्ध मंसिर २५ गते मुद्दा दायर भएको थियो ।

यो मुद्दामा बैशाख २४ मा कसुर ठहर गर्दै अदालतले माधवलाई ६ महिना कैद र पाँच हजार जरिवाना सुनाएको थियो । त्यसैगरी मृतकका आफन्तलाई एक लाख रुपैयाँ क्षतिपूर्ति दिनु पर्ने फैसला पनि अदालतले गरेको थियो । यसैगरी मंसिर ४ गते दायर भएको अर्को मुद्दामा चितवन अदालतले जेठ ९ गते फैसला गरेको थियो । जसमा आत्महत्या गरेकी महिलाका श्रीमानलाई सजाय भएको छ ।

आत्महत्या गरेर गत वर्षको कात्तिक १६ मा राप्ती नगरपालिका–२ मा २३ वर्षीय महिलाको निधन भएपछि प्रहरीले कात्तिक १७ गते उनका श्रीमान् जयराम सेढाई र आमाजुलाई गिरफ्तार गरेको थियो । अदालतमा मंसिर ४ गते मुद्दा दायर भयो । मंसिर ८ गते थुनछेक आदेश हुँदा मृतक महिलाका श्रीमान् जयराम सेढाई कारागार चलान भए । आमाजु एक लाख रुपैयाँ धरौटी राखेर तारेखमा छुटिन् । फैसला हुँदा उनले सफाइ पाइन ।

अदालतले जेठ ९ गते महिलाका श्रीमान् जयराम सेढाईलाई एक वर्ष कैद र १० हजार रुपैयाँ जरिवना हुने फैसला गरेको थियो । ५० हजार रुपैयाँ क्षतिपूर्ति दिनुपर्ने छ । अदालतमा अहिले आत्महत्या दुरुत्साहनका चारवटा मुद्दा विरचाराधीन छन ।

जसमा सञ्चारकर्मी शालिकराम पुडासैनीको आत्महत्या दुरुत्साहनमा दायर भएको कार्यक्रम प्रस्तोता रवी लामिछाने लगायत विरुद्धको मुद्दासमेत छ ।

प्रकाशित : आश्विन २, २०७६ २१:३१
पूरा पढ्नुहोस्
प्रतिक्रिया
पठाउनुहोस्