छिचोलियो दोर्दीखोलाको सुरुङ

आश गुरुङ

लमजुङ — दोर्दीखोलाको सबैभन्दा तल्लो क्षेत्रमा निर्माणाधीन दोर्दीखोला जलविद्युत् आयोजनाको सुरुङ छिचोलिएको छ । आयोजना २७ मेगावाटको हो ।

निर्माणकार्य ढिलाइ हुँदै गएको आयोजनाका लागि निर्मित २ हजार ७ सय ८० मिटर सुरुङको आइतबार छिचोलिएको हो । यसको अडिट टनेल छैन ।

इनलेट (सुरुङ सुरु हुने ठाउँ) बेंसीसहर नगरपालिका–११ (साविक चिती–४) रियाले र आउटलेट साविक चिती ७ रामचोकमा रहेको छ । आउटलेटबाट पावर हाउससम्म ७ सय मिटरको पेनस्टक छ । हेडवर्क्सबाट इनलेटसम्म ३ हजार २ सय फलामे हेडरेस पाइपलाइन रहनेछ । यसको करिब ६ सय मिटर जडान मात्रै बाँकी छ ।

प्रवर्द्धक कम्पनी हिमालयन पावर पार्टनर लिमिटेडले उक्त आयोजनाको निर्माणकार्य २०७१ फागुनबाट थालेको थियो । सुरुङको निर्माणकार्य ४ वर्षअघि थालिएको थियो । सुरुमा इको इन्फ्रा विल्डरले निर्माण थालेकामा १ वर्षमा ५ सय मिटर मात्रै सुरुङ खनेपछि ‘प्रोग्रेस एचिभ’ नगरेको भन्दै हटाएर निर्माण कम्पनीले मल्टी इन्फ्रा इन्स्ट्रक्टर डेभलपमेन्ट कम्पनीलाई नियुक्त गरेको थियो ।

करिब ३ वर्षमा सुरुङ खन्नेकार्य सकिएसँगै आइतबार निर्माण कम्पनीका निर्देशक चन्द्रप्रसाद ढकाल, कार्यकारी निर्देशक गुरुप्रसाद ढकाललगायतले सुरुङको छिचोलेका हुन् । सुरुङभित्र कंक्रिट लाइनिङसुरु हुने आयोजनाका इन्जिनियर दीपक ज्ञवालीले बताए ।

सुरुमा ३ वर्षमा निर्माण सक्ने लक्ष्य लिइएको थियो । पछिल्लो समय शनिबार उत्पादन मिति तोकिएकामा निर्माण कार्य नसकिएपछि ६ महिना निर्माण अवधि लम्बिएको छ । फागुन १४ गते निर्माणकार्य सकेर विद्युत् उत्पादन गर्ने लक्ष्य लिएको कम्पनीका कार्यकारी निर्देशक गुरुप्रसाद ढकालले बताए ।

उनका अनुसार सुरुमा २०७२ वैशाख १२ गतेको भूकम्प, त्यसपछिको भारतीय नाकाबन्दीले काम गर्न दिएन । हरेक वर्ष बर्खायामको बाढीपहिरोले आयोजना निर्माणकार्य ढिलाइ भएको हो । गत वर्ष मर्स्याङ्दी बढेर पावर हाउस क्षेत्रमा क्षति पुगेको र दुईजना कामदार बगाएको थियो ।

प्रकाशित : भाद्र १६, २०७६ ०८:३०
प्रतिक्रिया
पठाउनुहोस्

६ दिनमा ८१ हजारले गरे अवलोकन

मेलामा सबैभन्दा बढी चर्चा ७३ लाख ९० हजारको मोटर साइकलले पायो । अगुस्टाको ब्रुटाले ८०० आरआर एलएच ४४ बाइक मेलाकै अवसर पारेर लन्चिङ गरिको थियो ।
विमल खतिवडा

काठमाडौँ — गत बर्ष भन्दा यो वर्ष १४ औं नाडा अटो सोमा आगन्तुकको बाक्लो उपस्थिति थियो । मेलामा भीड बढे पनि साँघुरो प्रदशनीस्थलले गर्दा बर्सेनि समस्या हुँदै आएको छ । यो वर्ष पनि समस्या भयो ।

सबैभन्दा बढी शनिबार २० हजारले मेलाको अवलोकन गरेका थिए । ६ दिनसम्म चलेको मेला आइतबार सकिएको छ । मेला अवधिभर ८१ हजारले अवलोकन गरेको आयोजक नाडा अटोमाबाइल्स एसोसिएसन अफ नेपालले जनाएको छ ।

योपटक मेलाको आकर्षण विद्युतीय सवारी साधन बने । चारपांग्रे र दुईपांग्रे विद्युतीय सवारी साधनका पाँचवटा स्टल राखिएका थिए । युवादेखि पाकासम्मले विद्युतीय साधनलाई रुचाए ।

‘मेला सोचेभन्दा राम्रो र भव्य भयो,’ नाडा अटोमोबाइल्स एसोसिएसन अफ नेपालका अध्यक्ष शम्भुप्रसाद दाहालले भने, ‘त्यसमा पनि योपटकको मेलामा सबैभन्दा बढी प्रोडक्ट लन्चिङ भए ।’ उनका अनुसार मेला अवधिभर चारपांग्रे १४ र दुईपांग्रे १२ वटा नयाँ प्रोडक्ट लन्चिङ भए । मेलामा दैनिकजस्तो विभिन्न ब्रान्डका नयाँ संस्करणका सवारी साधन सार्वजनिक गर्न कम्पनीहरूबीच प्रतिस्पर्धा नै चल्यो । मेलामा सबैभन्दा बढी चर्चा ७३ लाख ९० हजारको मोटर साइकलले पायो ।

अगुस्टाको ब्रुटाले ८०० आरआर एलएच ४४ बाइक मेलाकै अवसर पारेर लन्चिङ गरिएको थियो । आकर्षक भएकाले बाइक हेर्न मेलामा ठूलै भिड लाग्यो । मेला अवधीभर बैंकका १३ वटा स्टल राखिएको थियो र बैंकहरूले मेलामा विद्युतीय सवारी साधनमा ८० प्रतिशत फाइनान्सिङको व्यवस्था गरेपछि उक्त साधनमा आगन्तुकको आकर्षण बढेको थियो ।

अघिल्लो वर्ष ६५ हजारले मेलाको अवलोकन गरेका थिए ।

यो वर्ष आयोजकले ४२४ हजार पुग्ने दाबी गरे पनि संख्या बढेको हो । मेलामा चार पांग्रेतर्फ २३ र दुईपांग्रे १९ ब्रान्डको सहभागिता थियो । १२ वटा लुब्रिकेन्ट्स, टायरका ९ वटा ब्रान्ड, ब्याट्रीका ५ र ग्यारेज उपकरणसम्बन्धी अन्य १४ वटा ब्रान्ड मेलामा राखिएको थियो । मेला अवधिभर ९५ ब्रान्ड तथा कम्पनीको सहभागिता रहेको थियो । गत वर्ष १ सय ३४ स्टल रहे पनि यो वर्ष १ सय ६० वटा स्टल राखिएको थियो ।

‘बर्सेनि स्टलको संख्या बढ्दो छ तर ठाउँ साँघुरो छ,’ अध्यक्ष दाहालले भने, ‘योपटकको मेलामा पनि स्थानको अभाव खड्किएकै हो, छुट्टै प्रदर्शनीस्थल निर्माणका लागि सरकारले नै पहल गर्नुपर्ने हुन्छ, निजी क्षेत्रबाट गर्दा पनि हुने हो तर त्यो अवस्था देखिँदैन ।’ साँघुरो ठाउँले गर्दा मेलामा सवारी साधन राख्नसमेत समस्या भएको थियो ।

मेलास्थलबाट बाहिरिदा सधैं जामको समस्या हुने गर्छ । छुट्टै फराकिलो ठाउँमा प्रदर्शनीस्थल बनाउन सकिए सबै समस्या समाधान हुने आयोजकले जनाएको छ । ‘प्रदर्शनी हलबारे हरेक वर्ष कुरा उठ्ने गर्छ,’ अर्थमन्त्री युवराज खतिवडाले मेला उद्घाटनको बेला भने, ‘यसमा निजी क्षेत्र अघि आओस्, हामी संयुक्त रूपमा अघि बढ्न तयार छौं । यसमा सरकार सहयोग गर्न तयार छ ।’ मेलामा दुईपांग्रेदेखि चारपांग्रे सवारी साधनको बुकिङ पनि सोचेभन्दा राम्रो भएको आयोजकले जनाएको छ ।

मेलाका संयोजक निराकर श्रेष्ठले ठाउँ अभावले गर्दा बर्सेनि समस्या हुने गरेको बताए । ‘यसबारे सरकारलाई भन्दै आएका छौं तर सुनुवाइ भएको छैन,’ उनले भने । मेला समापनको दिनआइतबार टिकट काटेर मेला अवलोकन गर्नेहरूमध्ये लक्की ड्रमार्फत जीपीएक्स जेन्टलमेन्ट दुई सय सीसीको मोटरसाइकल टिकट नम्बर ०१२३३१ जितेको नाडा अटोमोबाइल्स एसोसिएसन
अफ नेपालका सचिव एवं प्रवक्ता अनुप बरालले बताए ।

उनका अनुसार दिनभित्रमा नाडाको कार्यालयमा आएर बाइक लिइसक्नुपर्नेछ । प्रवक्ता बरालका अनुसार उत्कृष्ट तीनवटा स्टललाई पुरस्कृत गरिएको छ । लुब्रिकेन्टसतर्फ लक्ष्मी कम्पनीको मोटुल लुब्रिकेन्ट्स, दुईपांग्रेतर्फ हंसराज हुलासचन्द्र गोल्छाको केटीएम मोटरसाइकल र चारपांग्रेमा युनाइटेड ट्रेडर्स सिन्डिकेटको टोयोटा भएको छ ।

प्रकाशित : भाद्र १६, २०७६ ०८:२९
पूरा पढ्नुहोस्
प्रतिक्रिया
पठाउनुहोस्