तरकारी र खाद्यान्न आयात घट्यो

लक्ष्यको ९१ प्रतिशत मात्रै राजस्व संकलन
भवानी भट्ट

(कञ्चनपुर) — कञ्चनपुर भन्सार कार्यालयले गत वर्षको तुलनामा बढी राजस्व संकलन गरे पनि लक्ष्य भेट्याउन सकेको छैन । आर्थिक वर्ष ०७५/७६ मा लक्ष्यको ९१ प्रतिशत मात्रै राजस्व संकलन भएको छ । गत वर्षको तुलनामा खाद्यान्न र तरकारी आयात घटदा लक्ष्यअनुसार राजस्व संकलन नभएको हो ।

झापाको बिर्तामोड नगरपालिका–५ स्थित कृषि उपज बजारस्थित खुद्रा तरकारी पसल । तस्बिर : अर्जुन/कान्तिपुर

४० करोड १२ लाख रुपैयाँ राजस्व संकलनको लक्ष्य थियो । ३६ करोड ६४ लाख मात्रै संकलन भएको कञ्चनपुर भन्सार कार्यालयका प्रमुख भीमप्रसाद अधिकारीले बताए । उनका अनुसार भारतबाट हुने प्रमुख २० वस्तुको आयात घटेकाले लक्ष्यअनुसार राजस्व सकंलन हुन नसकेको हो ।

भन्सार कार्यालयका अनुसार आर्थिक वर्ष ०७४/७५ मा ७८ करोड रुपैयाँ बराबरका प्रमुख २० वस्तु आयात भएको थियो । ०७५/७६ मा उक्त आयात घटेर ६२ करोड पुगेको अधिकारीले बताए । ‘यस वर्ष चिनी, तरकारी तथा फलफूल र माछा आयात कम भयो,’ उनले भने, ‘राजस्व संकलनमा यसले प्रभाव पार्‍यो ।’

उनका अनुसार यस वर्ष तरकारी तथा फलफूल आयात पनि घटेको छ । गत वर्ष ३८ करोड बराबरको तरकारी तथा फलफूल आयात भएको थियो भने यस वर्ष २७ करोड बराबरको आयात भएको छ । तरकारी तथा फलफूलबाट दैनिक १ लाखभन्दा बढी राजस्व संकलन हुने गरेको उनले जानकारी दिए ।

असारदेखि तरकारी तथा फलफूल विषादी परीक्षणपछि मात्रै आयात गर्ने सरकारी निर्णयपछि कञ्चनपुर भन्सारबाट १२ ट्रक मात्रै भित्रिएको छ । यस्तै फागुनदेखि माछा तथा माछाजन्य पदार्थ आयात पनि रोकिएको छ । सरकारले माछाको स्वच्छता र स्वस्थ्यताको प्रमाणपत्र आवश्यक पर्ने निर्णय गरेपछि आयात रोकिएको छ । पछिल्लो समय व्यवसायीहरूले स्वच्छता र स्वस्थ्यताको प्रमाणपत्र बनाएर फाटफुट रूपमा माछा आायत गरिरहे पनि विगतको तुलनामा निकै कम छ ।

भन्सार कार्यालयले गत आर्थिक वर्षमा ३२ करोड ४७ लाख रुपैयाँ राजस्व संकलनको लक्ष्य राखेको थियो । ३२ करोड ५३ लाख रुपैयाँ संकलन भएको थियो । जसमध्ये लिलामबाट मात्रै ४ करोड २३ लाख रुपैयाँ संकलन भएको थियो । यस वर्ष लिलामबाट १ करोड ६२ लाख रुपैयाँ संकलन भएको छ ।

‘यो वर्ष पनि लिलाम गर्नुपर्ने वस्तु धेरै छन् तर प्राविधिक रिपोर्ट नआएकाले रोकिएको छ,’ भन्सार अधिकृत अधिकारीले भने, ‘लिलाम गर्न सकेको भए लक्ष्यअनुसार राजस्व संकलन हुन्थ्यो ।’

लक्ष्य पूरा नभए पनि गत वर्षको तुलनामा करिब २४ प्रतिशत बढी राजस्व संकलन भएको उनको भनाइ छ । कञ्चनपुर भन्सारका अनुसार भारतबाट आयात हुनेमा कपडा, खाद्यान्न, तरकारी तथा फलफूललगायतका प्रमुख वस्तुहरू रहेका छन् ।

प्रकाशित : श्रावण १, २०७६ ०९:५१
ADVERTISEMENT
प्रतिक्रिया
पठाउनुहोस्

निर्मला हत्या प्रकरण : पत्रकार भण्डारीले अदालतको अवहेलना गरेको ठहर

तीन दिनभित्र आत्मालोचना वा १ घण्टा कैद र १ रुपैयाँ जरिवानाको फैसला
भवानी भट्ट

काठमाडौँ — अदालतको मानहानी विषयमा परेको मुद्दामा जिल्ला अदालत कञ्चनपुरले मानसखण्डा दैनिकका सम्पादक तथा प्रकाशक खेम भण्डारीलाई आत्मालोचना वा एक घण्टा कैद सजाय सुनाएको छ । जिल्ला बार एसोसिएसनले तीन महिनाअघि दायर गरेको मुद्दामा सोमबार जिल्ला अदालतले उक्त फैसला सुनाएको हो ।

जिल्ला अदालतका रजिष्ट्रार हरिकृष्ण अवस्थीका अनुसार जिल्ला न्यायाधीश डा. राजेन्द्रकुमार आचार्यको इजलाशले यस्तो फैसला गरेको हो । ‘अदालतको अवहेलना गरेको ठहर भएको छ,’ अवस्थीले भने, ‘तर यसमा विभिन्न अप्सन दिइएको छ ।’ उनका अनुसार अदालतको अवहेलना भएको विषयमा भण्डारीले ३ दिनभित्र आत्मालोचना गर्ने वा १ घण्टा कैद र १ रुपैयाँ जरिवाना हुन सक्ने फैसला आएको छ ।

पत्रकार भण्डारीले पुनरावेदन गर्ने समयभित्र आत्मालोचना वा सजाय भुक्तान गर्ने समय रहेको बताए । बलात्कारपछि हत्या गरिएकी १३ वर्षीया निर्मलाको घटनामा यातना र प्रमाण नष्टको अरोपमा मुद्दा लागेका तत्कालीन प्रहरी अधिकारीको विषयमा अदालतले मागेको एमिकस क्युरीको विषयमा जिल्ला बारले विष्टको नातेदार पठाउन खोजेको भन्दै पत्रकार भण्डारीले आफू सम्पादक रहेको पत्रिका मानसखण्डमा समाचार प्रकाशित गर्नुका साथै आफ्नो फेसबुक वालमा समेत राखेका थिए । बारले एमिकसमा पठाएका व्यक्तिले पनि प्रहरी अधिकारीलाई जोगाउने खालको धारण राखेको मानसखण्ड दैनिकमा छापिएको थियो ।

‘पत्रकार भण्डारीले आत्मालोचनासँगै फेसबुकमा लेखेका स्टाटससमेत हटाउने र उक्त कुरा आफ्नो पत्रिकामा प्रकाशित गरेर आत्मालोचना गर्नुपर्ने फैसला आएको हो,’ अवस्थीले भने, ‘त्यसो नभए एक घण्टा कैद र एक रुपैयाँ जरिवाना हुनेछ ।’ भण्डारीले भने अदालतको फैसलालाई सम्मान गर्दै यसविरुद्ध पुनरावेदन जाने बताएका छन् । उनले आफूले अदालतको गरिमा जोगाउन समाचारसँगै फेसबुक वालमा लेखेका कुरा नहटाउने जनाएका छन् । ‘अदालतको फैसलाको सम्मान गर्छु, तर गल्ती नगरी आत्मालोचना गर्दैन,’ उनले भने, ‘जिल्ला अदालतको फैसलामा पुनरावेदन गर्छु ।’

जिल्ला बार अध्यक्ष प्रकाश पाण्डेले अदालतको फैसला आफूले अध्ययन गरिनसकेकाले अहिल्यै धारणा बनाइनसकेको बताए । उनले फैसला आएपछि बारको बैठक बसेर आधिकारिक धारणा बनाउने बताए । ‘हामीले अदालतको मानहानी भएको देखेर मुद्दा दायर गरेका हौं, त्यही अनुसार फैसला भयो,’ उनले भने, ‘फैसला अध्ययनपछि आधिकारिक धारण राखिनेछ ।’

प्रकाशित : असार ३१, २०७६ २१:०३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×