राष्ट्रिय ग्रिडमा जोडियो खलंगा, ८ जिल्लामा पुग्न बाँकी 

कान्तिपुर संवाददाता

काठमाडौँ — दार्चुलाको सदरमुकाम खलंगामा नेपाल विद्युत् प्राधिकरणले राष्ट्रिय प्रसारण लाइन पुर्‍याएको छ । प्राधिकरणले बलाँच-खलंगा ३३ केभी प्रसारण सञ्चालनमा ल्याएसँगै खलंगा नेपालकै विद्युत् प्रणालीमा आबद्ध भएको छ । 

अब ८ जिल्ला राष्ट्रिय ग्रिडमा जोडिन बाँकी भएको प्राधिकरणले जनाएको छ । बाजुरा, हुम्ला, कालीकोट, मुगु, डोल्पा, रुकुम र सोलुखुम्बु राष्ट्रिय ग्रिडमा जोडिन बाँकी छ । यीमध्ये तीन जिल्ला बाजुरा, रुकुम र सोलुखुम्बुलाई यसै वर्ष राष्ट्रिय ग्रिडमा जोड्ने प्राधिकरणको तयारी छ ।

खलंगामा यसअघि भारतको उत्तराखण्डबाट विद्युत् ल्याइएको थियो । राष्ट्रिय ग्रिडमा जोडिएसँगै दार्चुलामा भोल्टेजको समस्या समाधान हुने प्राधिकरणले जनाएको छ । प्राधिकरणले खलंगामा विद्युत्आपूर्तिका लागि उत्तराखण्डको लाली, जोलजीवी र हुटी विन्दुबाट ११ केभी लाइनमार्फत विद्युत् आयात गरिरहेको थियो ।

प्राधिकरणले विद्युत् आयात गरेबापत उत्तराखण्ड पावर कर्पोरेसन लिमिटेडलाई मासिक रूपमा करिब २५ लाख रुपैयाँ भुक्तानी गर्दै आएको थियो । खलंगा क्षेत्रमा करिब ८ हजार ग्राहक छन् ।

बलाँच-खलंगा ३३ केभी प्रसारण लाइनअन्तर्गतको दार्चुलाको थालीगाडमा निर्माणाधीन ३३/११ केभी सबस्टेसनको काम असारभित्र सकिने प्राधिकरणले जनाएको छ ।

प्रसारण लाइन निर्माण गर्न ८७ लाख ५० हजार रुपैयाँमा २०७२को चैतमा ठेक्का सम्झौता गरिएको थियो । प्रसारण लाइनको लम्बाइ २५ किलोमिटर छ । सबस्टेसन निर्माणका लागि ६ करोड ८९ लाख रुपैयाँमा २०७३ को कात्तिकमा ठेक्का सम्झौता भएको थियो ।

प्राधिकरणले ३० मेगावाटको चमेलिया जलविद्युत् केन्द्रबाट र बलाँच सबस्टेसनमा जोडिने निजी क्षेत्रका आयोजनाबाट उत्पादित विद्युत् ३३ केभी प्रसारण लाइनमार्फत खलंगातर्फ पठाउनेछ ।

चमेलिया जलविद्युत् आयोजनाले निर्माण गरेको बलाँच सबस्टेसनमा ८.५ मेगावाटको अपी, ८५ मेगावाटको माथिल्लो चमेलिया, १६ मेगावाटको मध्यचमेलिया, ६५ मेगावाटको कलंगा गाड, २५ मेगावाटको छत्तिगाड आयोजना जोडिनेछन् । त्यहाँ जोडिएको विद्युत् १३१ किलोमिटर बलाँच-अत्तरिया (कैलाली) प्रसारण लाइनमार्फत राष्ट्रिय ग्रिडमा
प्रवाह हुनेछ ।

प्रकाशित : जेष्ठ २, २०७६ ०९:२०
प्रतिक्रिया
पठाउनुहोस्

कर्णालीमा पुल निर्माण तीव्र

ज्योति कटुवाल

दैलेख — कर्णाली राजमार्गमा रहेका विभिन्न खोलामा लामो समयपछि २५ पुल निर्माणको कामलाई तीव्रता दिइएको छ । विश्व बैंकको सहयोगमा सडक विभागले पुल निर्माणको कामलाई तीव्रता दिएको हो । 

कर्णाली राजमार्गमा कुवाखोला, कालेखोला, पालतडा, कानेखोला, दहीखोला, पातलेखोला, मट्टेखोला, रतिखोला, छेडाखोला, लोहाखोलालगायत पुलको काम धमाधम भइरहेको छ । कतिपय खोलाका पुल सम्पन्न भई उद्घाटनको तयारीमा छन् ।

सडक डिभिजन कार्यालय सुर्खेतका इन्जिनियर देवेन्द्र भट्टराईका अनुसार भौगोलिक कठिनाइका कारण केही पुल निर्माणमा ढिला भएको हो । उनका अनुसार तीन चरणमा विभाजन गरेर पुल निर्माणको काम भइरहेको हो । ‘भौगोलिक विकटता, सामान ढुवानीमा समस्यालगायत कारणले पुल निर्माणमा ढिलाइ भएको हो,’ उनले भने, ‘दैलेख-सुर्खेतको सिमानासम्म बन्न लागेका पुलमा जेठभित्रै सवारी साधन गुड्नेछन् । उनका अनुसार जुम्ला-कालीकोट सडकखण्डअन्तर्गत सात पुल निर्र्माणाधीन अवस्थामा छन् ।

पुल निर्माणको जिम्मा लिएका अधिकांश ठेकेदार लामो समयदेखि सम्पर्कविहीन भएपछि लामो समयसम्म पुल निर्माणको काम रोकिएको थियो । सडक डिभिजन कार्यालय सुर्खेतका अनुसार दैलेख-सुर्खेत-जुम्ला सडकमा एक सय ३२ किलोमिटर पुल बनाउन थालिएको हो । एमएस/जयबुद्ध/नेपाल मेघा बुल्डर जेभीले बोटखोला पुलको काम ९० प्रतिशत सम्पन्न गरेको छ । दुई करोड ६८ लाख रुपैयाँमा सम्झौता गरिएको कम्पनीले जेठसम्म निर्माणको काम सक्नेगरी काम भइरहेको जनाएको छ ।

त्यस्तै कुमाले खोला पुलको काम पनि ९० प्रतिशत सम्पन्न भएको छ । दुई करोड २८ लाखको लगानीमा निर्माण हुन लागेको पुल ५० को काम अन्तिम चरणमा रहेको एमएस रोशन श्याम/शंकर जेभीले जनाएको छ । दुवै पुलका लागि २०७४ सालमा सम्झौता गरिए पनि दोस्रो पटक म्याद थपेर निर्माण पूरा गर्न लागिएको हो ।

प्रकाशित : जेष्ठ २, २०७६ ०९:१८
पूरा पढ्नुहोस्
प्रतिक्रिया
पठाउनुहोस्