सातामा ५ अर्बको कारोबार
काठमाडौँ — यो साता पाँच अर्ब रुपैयाँ बराबरको सेयर कारोबार भएको छ । गत साताको तुलनामा कारोबार रकम ९० प्रतिशतले बढी हो । गत साता २ अर्ब ६२ करोड रुपैयाँ बराबरको सेयर कारोबार भएको थियो ।
नेप्से परिसूचक निरन्तर रूपमा बढेसँगै कारोबार रकम पनि बढिरहेको छ । यो सँगै सातामा दैनिक औसत कारोबार रकम पनि बढेर अर्ब रुपैयाँ पुगेको छ । गत साताको तुलनामा यो करिब ५३ प्रतिशतले बढी हो ।
साताको कुल कारोबारमध्ये बैंकिङ समूह (२७ वटा वाणिज्य बैंक) को हिस्सा करिब साढे ६७ प्रतिशत छ । सो अवधिमा वाणिज्य बैंकहरूको मात्र १ करोड ११ लाख २६ हजार कित्ता सेयर कारोबार भएको छ ।
पछिल्ला एक महिनायता बजारमा वाणिज्य बैंकको सेयरमा लगानीकर्ताको आकर्षण बढदो छ । कुल कारोबारमा वाणिज्य बैंकको हिस्सा बढदै जानुले पनि यही संकेत गर्छ । गत साता कुल कारोबारमा बैंकिङ समूहको सेयर हिस्सा ६५.११ प्रतिशत थियो ।
सामान्य अवस्थामा कुल कारोबारमा बैंकिङ समूहको हिस्सा करिब ५० प्रतिशत हाराहारी रहँदै आएको छ । यो साता यस्तो हिस्सा ६५ प्रतिशतभन्दा धेरै हुनुले पनि बैंकिङ समूहको सेयरमा लगानीकर्ताको आकर्षण बढेको पुष्टि हुने जानकारहरू बताउँछन् ।कुल कारोबारमा बैंकिङपछि बिमा समूहले धेरै हिस्सा ओगटेको छ ।
पाँच दिनको कारोबारमा बिमा कम्पनीका ५४ करोड ८८ लाख रुपैयाँ बराबरको सेयर किनबेच भए । यो कुल साप्ताहिक सेयर कारोबारको करिब ११ प्रतिशत हो । गत साता यस्तो हिस्सा थोरैले कम हो । बिमापछि धेरै हिस्सा ओगटनेमा लघुवित्त र विकास बैंक समूह छन् ।
यो साता करिब ५१ हजार कारोबारबाट १ सय ९१ कम्पनीका १ करोड ६३ लाख ६६ हजार कित्ता सेयर किनबेच भए । ती किनबेचबाट करिब ५ अर्ब रुपैयाँ बराबरको सेयर कारोबार भएको थियो ।
प्रकाशित : वैशाख १५, २०७६ ०८:४२
