बैंकको ब्याज विरुद्ध ताप्लेजुङका व्यवसायी आन्दोलित

आनन्द गौतम

ताप्लेजुङ — बैंकको ब्याजदर विरुद्ध ताप्लेजुङका व्यवसायी आन्दोलित भएका छन् । बिहीबार पत्रकार सम्मेलन गर्दै उद्योग वाणिज्य संघका अध्यक्ष तारानाथ घिमिरेले व्यवसायीहरूलाई बैंकले नाङ्गो बनाएकाले आन्दोलन गर्न बाध्य भएको बताए । ८ प्रतिशतमा सम्झौता गरेको ऋणको ब्याज १८ प्रतिशतसम्म पुर्‍याएको उनको दाबी छ । 

उद्योग वाणिज्य सङ्घ ताप्लेजुङका प्रतिनिधिहरू बैंकको ब्याज विरुद्धको आन्दोलनको घोषणा गर्दै । बैंकले टाट पल्टाएको भन्दै व्यवसायीहरू आन्दोलित भएका छन् । तस्बिर: आनन्द गौतम / कान्तिपुर 

‘पहिला नेपाल बैंक मात्रै थियो पछि वाणिज्य बैंकहरु धमाधम थपिए, उनीहरू घरघरमा आएर ऋण लिइदिन अनुरोध गरे,’ घिमिरेले थपे,‘उनीहरूको प्रतिस्पर्धाले सात र आठ प्रतिशत ब्याजमा सम्झौता गरे अहिले दोब्बर भन्दा बढी बढाएर व्यवसाय नै टाट पल्टाइदिएका छन् ।’ ऋण अनुसार मूल्याङ्कन गरेको व्यावसायिक योजनाले फेल खाएपछि धेरै व्यवसायी समस्यामा परेको उनले सुनाए । बैंकले बिना जानकारी ब्याज बढाउने र त्यही अनुसार असुल्ने गरेको व्यवसायीको गुनासो छ ।

धेरै व्यवसायी निजी बैंकसँग आबद्ध भएकाले ब्याजदर घटाएर एकरुपता गर्न माग गरेका छन् । ‘वार्षिक १० लाख रुपैयाँ तिर्ने योजनाका आधारमा ऋण लिएकाले २० लाखसम्म ब्याज तिर्नुपरेपछि कसरी कारोबार गर्न सकिन्छ,’ उपाध्यक्ष नारान थापाले भने, ‘आवाज त पहिलापनि उठाएका थियौँ, तर अब सङ्गठित आवाज सुरु गरेका हौँ ।’ ब्याजदर नघटाए थप आन्दोलित हुने व्यवसायीको अडान छ ।

सदरमुकाम फुङलिङमा नेपाल बैंक, एनएमबी, जनता, सिद्धार्थ, सेन्चुरी, ग्लोबल आईएमई, लक्ष्मी र प्राइम बैंक रहेका छन् । थप बैंक आउने तयारीमा छन् । नौ वटा स्थानीय तह रहेको जिल्लाका ६ वटा गाउँपालिकामा पनि बैंकहरु पुगेका छन् ।

प्रकाशित : फाल्गुन ९, २०७५ १५:०७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

अन्तिम प्रतिवेदन बुझाउन एकता कार्यदलले माग्यो थप एक हप्ताको समय

समय थप्ने बारे भोली छलफल हुने
कान्तिपुर संवाददाता

काठमाडौँ — नेपाल कम्युनिष्ट पार्टी (नेकपा)ले पार्टीको बिहीबार बिहान प्रधानमन्त्री निवासमा बसेको सचिवालय बैठकमा एकता कार्यदलले थप अन्तिम प्रतिवेदन बुझाउन थप एक हप्ताको सयम माग गरेपछि सांगठनिक एकिकरणका विषयमा कुनै निर्णय भएन ।

तस्बिरः याम पाण्डेको फेसबुकबाट साभार ।

एकता कार्यदलले सांगठनिक एकीकरणको प्रस्ताव बुझाउन ढिलाई गरेकै कारण एकतासम्बन्धी विषयमा विवाद यथावत रहेको छ । बालुवाटारमा बसेको पार्टीको सचिवालय बैठकमा कार्यदलका संयोजक तथा गृहमन्त्री रामबहादुर थापाले एक साता समय थप गर्न माग गर्दै हालसम्म कार्यदलले गरेको कामको प्रतिवेदन बुझाएका थिए । पूर्ण प्रतिवेदन तयार पार्न थप एक साता लाग्ने जानकारी उनले दिएका थिए ।

बैठकमा कार्यदलका अन्य सदस्यले पनि बाँकी काम सम्पन्न गर्न केही समय थप्न सचिवालयसँग माग गरेका थिए । कार्यदलका सदस्य योगेश भट्टराईले पार्टी एकता ढिलाइ भइरहेकाले छिटो सम्पन्न गर्नका लागि आफूहरुले एक हप्ताको समय माग गरेको बताए ।

पार्टी प्रवक्ता नारायणकाजी श्रेष्ठका अनुसार बैठकले कार्यदलको म्याद थप गर्ने/नगर्ने भन्ने विषयमा निर्णय नभएकोले शुक्रबार पुन: बैठक बस्ने जानकारी दिए।

गत जेठ ३ गते तत्कालीन नेकपा (एमाले) र नेकपा (माओवादी केन्द्र) बीच पार्टी एकता भई नेकपा गठन भएपछि सचिवालय, स्थायी समिति, केन्द्रीय समिति र प्रदेश समिति गठन भए पनि जिल्ला तथा जनवर्गीय सङ्गठनको एकता हुनसकेको छैन । स्थायी समितिले कार्यदल नै गठन गरेर साङ्गठनिक एकता टुङ्गो लगाउने बताए पनि कार्यदलमा सबै विषयमा सहमति हुन नसक्दा एकता प्रक्रिया लम्बिँदै गइरहेको छ ।

गृहमन्त्री थापा संयोजक रहेको कार्यदलमा महासचिव विष्णु पौडेल, स्थायी समिति सदस्यहरू शंकर पोखरेल, सुरेन्द्र पाण्डे, वर्षमान पुन, लेखराज भट्ट, योगेश भट्टराई, बेदुराम भुसाल, रघुवीर महासेठ सदस्य छन्।

प्रकाशित : फाल्गुन ९, २०७५ १४:५२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×