‘बीसौँ वर्ष राजनीतिमा लागेकाले केही गर्न सकेनन्‚ अब हामी गर्छौं’- कुराकानी - कान्तिपुर समाचार
अन्तर्वार्ता

‘बीसौँ वर्ष राजनीतिमा लागेकाले केही गर्न सकेनन्‚ अब हामी गर्छौं’

कान्तिपुर संवाददाता

गुल्मी — २०७० सालमा तत्कालीन गुल्मी क्षेत्र नं. २ बाट संविधानसभा सदस्यमा निर्वाचित नेपाली कांग्रेस नेता चन्द्रकान्त भण्डारीले यसपटक पनि सोही स्थानबाट उम्मेदवारी दिएका छन् । 

उनै भण्डारीसँग चुनावी सरगर्मी‚ उनले गुल्मीवासीका लागि गरेका सम्झनलायक काम र अबको एजेन्डाका विषयमा कान्तिपुरका लागि गगनशिला खड्काले लिएको अन्तर्वार्ता:

तपाईं यो पटक पनि चुनावी मैदानमा हुनुहुन्छ । खास केका लागि तपाईंको उम्मेदवारी हो ?

मुलुकलाई रिफर्म गर्नुपर्ने भएको छ । मुलुकमा २०औं वर्ष राजनीतिक नेतृत्व गरेका व्यक्तिहरूले गर्न नसकेको त्यो रिफर्म कसले गर्न सक्छ त भन्दा नयाँ पुस्ताको नेतृत्व गर्ने व्यक्तिले नै गर्ने हो । अब हामीले काम गरेर पर्फर्म देखाउनुपर्छ । त्यो पर्फर्म देखाएपछि समाजमा ट्रान्स्फर्म हुन्छ भन्ने मान्यतालाई पुष्टि गर्नका लागि म चुनावी मैदानमा छु ।

तपाईं यसअघि पनि एकपटक सांसद भइसक्नुभएको छ ? त्यतिबेला सम्झनलायक त्यस्तो के काम गर्नुभयो ?

पहिलो कुरा २०७० सालमा गुल्मेली जनताले मलाई संविधान निर्माणका निम्ति पठाउनुभएको थियो । पहिलोपल्ट संविधान निर्माण गर्नका लागि पठाएका साथीहरूले संविधान निर्माण गर्न सक्नुभएन र हामी गएर संविधान बनायौँ ।

दोस्रो कुरा मैले पहिलो पटक तत्कालीन गुल्मी क्षेत्र नं. २ को सांसदको हिसाबले प्राप्त गरेको अवसरलाई अधिकतम प्रयोग गर्नुपर्छ भनेर गुल्मीलाई नमुना जिल्ला बनाउन सक्छु भन्ने सपना बोकेको थिएँ । त्यो सपना कहाँबाट पूरा गर्न सक्छु भन्ने लाग्यो भने हामी गुल्मेलीहरूले धेरै नै पीडा भोगेको सडक हो बुटवल–तम्घास सडक । जुन खण्डअन्र्तगत पर्ने सिद्धबाबामा हाम्रा धेरै दाजुभाइ–दिदीबहिनीले ज्यान गुमाएका छन् । त्यो पीडालाई कम गर्नका लागि मैले गुल्मेली जनतालाई सालझण्डी, दर्गाफाँट तम्घास सडक उपहार दिन्छु भनेर प्रतिबद्धता गरेको थिएँ । म सांसदका रुपमा निर्वाचित भएर गइसकेपछि त्यो सडकलाई प्राथमिकतामा राखेर सालझण्डी सडक सुरु गर्‍यौं । अनगिन्ती सडक र पुलहरू त्यतिबेला मेरो कार्याकालमा सुुरु गर्‍यौँ । खानेपानीका योजनाहरू पनि सुुरु गर्‍यौं । लिफ्टको पानी नै ल्यायौँ । सीमान्तीकृत बस्तीहरूमा करिब ४ सय घरहरू बनायौँ । गुल्मीको छुट्टै पहिचानका निम्ति रिडीमा तीनमुखे निर्माण गर्‍यौँ ।

तपाईंले मतदातामा राखेका चुनावी एजेन्डाहरू के–के हुन् ?

पहिलो कुरा त यो भ्रष्टाचारको अन्त्य गरेर कानुनले काम गर्नुपर्‍यो । कानुनले आत्मसमर्पण गर्नुभएन, नेतासँग, नेतृत्वसँग र कर्मचारीहरूसँग । कानुन स्वार्थ उन्मुख हुनुभएन । नेपालमा किसानहरूको मुख्य समस्या भनेको अहिले बाँदरले दु:ख दिइरहेको छ । त्यो समस्या समाधानका लागि पहल गर्नेछु । अर्को कुरा राजाको पालादेखि जनताका समस्या भनेको सामान्य आधारभूत आवश्यकता पनि पूरा भएका छैनन् ।

खानेपानी, बिजुली, सडक, खाना, नाना, छाना, स्वास्थ्य, शिक्षा, युवाहरू खाँडी मुलुक जानुपर्ने समस्या छन् । यसको जड के हो त ? यसको समाधान के हो त ? यी समस्याहरू समाधान गर्ने नै मेरा एजेन्डा हुन् ।

प्रकाशित : मंसिर १, २०७९ २०:३३
प्रतिक्रिया
पठाउनुहोस्

मौन अवधिमा आचारसंहिता उल्लंघन नगर्न काउन्सिलको ध्यानाकर्षण

लोककल्याणकारी विज्ञापनमा कडाइ हुने
कान्तिपुर संवाददाता

काठमाडौँ — प्रेस काउन्सिल नेपालले निर्वाचनको स्थिर समय (मौन अवधि)मा आचारसंहिता पालनामा ध्यान दिन आमसञ्चार माध्यमलाई ध्यानाकर्षण गराएको छ । आचारसंहिता उल्लंघन गरे तत्काल कारबाही गर्ने र त्यसलाई लोककल्याणकारी विज्ञापन वितरणमा समेत कडाइ गर्ने काउन्सिलले जनाएको छ ।

स्थिर समय सुरु हुनुभन्दा अघिसम्म सम्पन्न भएका राजनीतिक दलका कार्यक्रम, समाचार, तस्बिर, चुनाव चिह्न अङ्कित झन्डा/ब्यानर, श्रव्यदृश्यलगायत सामग्री समेटी सञ्चारमाध्यमबाट प्रकाशन/प्रसारण हुँदासमेत निर्वाचन आचारसंहिता उल्लंघन हुने हुँदा त्यस्तो कार्य नगर्न/नगराउन हुन सम्बद्ध सबै पक्षसँग अनुरोध गरिन्छ‚’ काउन्सिलका सहप्रवक्ता एवं सूचना अधिकारी रामशरण बोहोराद्वारा जारी विज्ञप्तिमा उल्लेख छ ।

मतदान हुने दिनको अघिल्लो ४८ घण्टादेखि मतदानको दिन मतदान केन्द्र बन्द नहुन्जेलसम्म प्रचारप्रसारजन्य सामग्री, विज्ञापनलगायत राजनीतिक दल वा उम्मेदवारको पक्ष वा विपक्षमा टक सो, टिप्पणी, विश्लेषण, प्रश्नोत्तरजस्ता कार्यक्रम प्रकाशन/प्रसारण/सम्प्रेषण गर्न पाइने छैन भन्ने निर्वाचन आचारसंहितामा उल्लेख छ ।

'कतिपय सञ्चार माध्यमबाट मौन अवधि सुरु भएपछि पनि सो अघिको मिति राखेर सामग्री सम्प्रेषण गर्ने गरेको जनगुनासा आउने गरेको उल्लेख गर्दै काउन्सिलले सूक्ष्म ढङ्गबाट अनुगमन गरिरहेकाले त्यसतर्फ समेत सजगता अपनाउन आग्रह गरेको छ ।

‘स्थिर समय (मौन अवधि)मा आचारसंहिता उल्लंघन भएमा पत्रकार आचारसंहिता, २०७३ (पहिलो संशोधन, २०७६) र निर्वाचन आचारसंहिता, २०७९ को व्यवस्थाबमोजिम तत्कालै कारबाही प्रक्रिया अवलम्बन गरिनेछ‚’ विज्ञप्तिमा भनिएको छ, ‘निर्वाचनका सन्दर्भमा देखिएका आचारसंहिता उल्लंघनका विषयलाई सञ्चार माध्यमको मूल्याङ्कन/वर्गीकरण एवं लोककल्याणकारी विज्ञापनको भुक्तानीका लागि समेत आधारका रूपमा अभिलेखीकरण एवं सिफारिस गरिनेतर्फ समेत यसै विज्ञप्तिमार्फत् जानकारी गराइन्छ ।’

प्रकाशित : मंसिर १, २०७९ १९:५७
पूरा पढ्नुहोस्
प्रतिक्रिया
पठाउनुहोस्
×