ललितपुरका सीडीओ भन्छन्- 'निषेधाज्ञा उल्लंघन गरेर उच्छृङ्खल समूहले अराजकता निम्त्याए'
काठमाडौँ — उपत्यकामा जारी निषधाज्ञा अवज्ञा गर्दै बिहीबार पुल्चोकमा जात्रा सञ्चालन गरिएपछि युवा समूह र सुरक्षाकर्मीबीच झडप भयो । झडपमा केही प्रदर्शनकारी र ४ प्रहरी घाइते भए ।
एकातिर संक्रमण नियन्त्रणका लागि आममानिसलाई घरबाहिर निस्कन दिइएको छैन भने अर्कातिर रथ सञ्चालनका लागि भिड जम्मा हुँदा पनि प्रशासनले सुइको नपाउनु वा संयोजन हुन नसक्नु स्वयं प्रशासनकै लापबाही र हेलचेक्राइँ मानिएको छ । निषेधाज्ञाका बेला कसरी जात्रा सञ्चालन गर्ने समूह जम्मा भए ? प्रशासन र प्रहरीले किन बेलैमा जानकारी पाएन ? यसै सन्दर्भमा ललितपुरका प्रमुख जिल्ला अधिकारी नारायणप्रसाद भट्टसँग कान्तिपुरकर्मी मातृका दाहालले गरेको संक्षिप्त कुराकानी :
प्रशासनको आदेश विपरित जात्रामा यतिधेरै भिड कसरी जम्मा भयो ?
उपत्यकाका तीनवटै प्रशासनले कोरोना महामारी विरुद्ध भदौ ३ गतेबाटै निषेधाज्ञा जारी गरेको छ । अत्यावश्यक बस्तु तथा सेवा र अनुमतिबाहेकका कुनै पनि कामकारबाही गर्न पाइँदैन । तर बिहीबार बिहानैबाट प्रशासनको आदेशविपरित उत्शृङखल समूह जम्मा भएर हाललाई स्थगन गरिएको रातो मत्स्येन्द्रनाथको जात्रा सञ्चालन गर्ने तयारीमा जुटेका रहेछन् । यसमा स्थानीयको साथ र समर्थन थिएन । प्रहरीले थाहा पाउने बितिक्कै यसलाई रोक्यो । रोक्ने क्रममा झडपको स्थिति पनि आयो । प्रशासन यो घटनाप्रति संवेदनशील र सजग बनेको छ ।
सर्वसाधारणलाई हिँडडुल गर्न निषेध छ तर मानिस त धेरै नै जम्मा भए त ?
विगतमा जात्रा/महोत्सव आयोजना गर्दै आएका गुठी र स्थानीय समुदाय महामारीका कारण यसपटक स्थगनकै पक्षमा थिए । तर एउटा समूह नै सक्रिय भएको रहेछ । जो उपत्यकाका विभिन्न स्थानमा आन्दोलन र भिडभाड गरेर स्थितिलाई भड्काउन उद्दत छ । त्यस्ता गतिविधि नियन्त्रणमा लिन्छौं । खोकनामा होस् वा वालुवाटार क्षेत्र वा पुल्चोककमा जात्रा सञ्चालन, यही समूह सक्रिय भएको देखियो । त्यस्ता समूहका गतिविधि पूर्ण रुपमा निस्तेज पारिन्छ ।
ललितपुर महानगरका मेयर, ज्यापू समाजलगायतसँग के–के छलफल भयो ?
महामारीका बेला भिडभाड गर्ने पक्षमा उहाँहरु नै हुनुहुन्न । मेयरसाब आफैं जिल्ला कोभिड–संकट व्यवस्थापन केन्द्रको सदस्य हुनुहुन्छ । ज्यापु समाजका प्रतिनिधिहरु पनि यस घटनाप्रति दुःखी हुनुहुन्छ । अर्को कुरा जात्रा/महोत्सव, आन्दोलन वा विरोधका जुनसुकै गतिविधि गर्दा प्रशासन र प्रहरीलाई जानकारी गराइन्छ । तर मत्स्येन्द्रनाथको जात्रामा यस्तो कुनै सहमति लिने वा जानकारी गराउने केही भएन । यो त स्थानीय प्रशासन ऐन–२०२८ को दफा ६ (३) र संक्रामक रोग ऐन २०२० को दफा २ अनुसार लगाइएको निषेधाज्ञाको पनि उल्लंघन हो । निषेधित आदेशमा जात्रा/महोत्सव, भिडभाडलगायत कुनैपनि गतिविधि गर्न पाइदैन । गरेको खण्डमा दण्डको भागिदार हुनुपर्ने छ ।
निषेधाज्ञा पालना गर्न नसक्नु तपाईहरुको कमजोरी होइन ?
कमीकमजोरी को–कसको भयो भन्दा पनि हामीले स्थिति नियन्त्रणमा लिइसकेका छौं । जनस्वास्थ्यमा खलल पार्ने उत्शृङखल समूहका गतिविधि नियन्त्रणमा आइसकेको छ । यस्ता गतिविधि अब दोहोरिदैन । यसप्रति सचेत छौं ।
यो घटनापछि कर्फ्यु लगाइँदैछ भन्ने पनि सुनियो ?
अहिले यसै पनि निषेधाज्ञा छ । अत्यावश्यक कामबाहेक कोही पनि बाहिर घुमफिर गर्न पाउँदैनन् । यद्यपि कर्फ्यु स्थिति हेरेर लगाउन सकिने कुरा हो । अहिले नै यसमा जानुपर्ने अवस्था छैन ।
प्रकाशित : भाद्र १८, २०७७ १८:१२