नाट्य महोत्सवमा उरुग्वेको नाटक ‘रियो’ मञ्चन

नाटकको कथामा जब दुई जना मानिसलाई उक्त खडेरी पर्ने क्षेत्रबारे पत्ता लगाउन पठाइन्छ, तिनीहरूको यात्राले मानवताका धेरै पक्षहरू नाटकमा खुलाउँदै जान्छन् ।

मंगलबार केदारनाथ पौडेलले लेखन तथा निर्देशन रहेको चौथो दिन साँझ ६ बजे मञ्चन भएको नेपाली प्रयोगात्मक प्रस्तुति ‘इम्ब्रिओनिक’ समेत प्रस्तुत गरियो । त्यस्तै नम्रता कलाकार केसीको कोरियोग्राफीमा ‘पाइतालाका यात्रा’ शीर्षकमा नृत्यनाटिका प्रस्तुति पनि गरिएको थियो । चरिया नाचबाट सुरु भएको प्रस्तुतिमा हिमाल हुँदै तराईसम्म हाम्रो पाइला टेकेर यात्रा गर्ने कथालाई समेटिएको थियो । प्रस्तुतिमा सांस्कृतिक पहिचान र संस्कृतिका विविध पक्षहरू समेटिएका थिए ।

महोत्सवको छैठौं दिन बुधबार श्रीलंका र इटालीको दुई नाटकहरु मञ्चनसँगै नाटकको पुस्तक विमोचन र सांगीतिक प्रस्तुतिहरू हुँदै छन् । दिउँसो २ बजे श्रीलंकाको नाटक ‘राजा मन वहला’, इटालीको इभान हास्टिङ निर्देशित नाटक ‘स्याडो लिवेरेसन’ दिउँसो २ र साँझ ६ बजे मण्डला स्टुडियोमा मञ्चन हुँदै छ ।

त्यस्तै महोत्सवमा बुधबार मध्याह्न १२ बजे नारायण वाग्लेको उपन्यासमा आधारित नाटक ‘पल्पसा क्याफे’को पुस्तक विमोचन हुँदै छ । सुरज सुवेदीले नाट्य रुपान्तरण गरेको सो नाटक केही महिनाअघि मण्डला नाटकघरमा मञ्चन गरिएको थियो । विमोचनलगत्तै ‘नाटकमा शब्दको आकृति : कस्तो देखिन्छ, कस्तो लेखिन्छ ?’ शीर्षकमा प्यानल डिसकसन हुनेछ । जसमा साहित्यकारहरू नयनराज पाण्डे, उपेन्द्र सुब्बा, रंगकर्मीहरू विमल सुवेदी, दिया मास्केसँग र लेखक, पत्रकार बसन्त बस्नेतले वार्ता गर्नेछन् ।

‘सामाजिक रुपान्तरणका लागि रंगमञ्च : विविधताको उत्सव’ को रुपमा मनाइरहेको महोत्सवमा मंसिर १७ गतेसम्म जारी रहनेछ । १८ नाटकको २५ मञ्चन हुने महोत्सवमा नेपालसहित भारत, भुटान, श्रीलंका, रुस, इटाली, स्पेन, बेलायत, बेलारुस, इजिप्ट, संयुक्त राज्य अमेरिका, उरुग्वे र अर्जेन्टिनाका नाटकहरु समावेश छन् ।