सुरु भयो नेपाल अन्तर्राष्ट्रिय नाट्य महोत्सव- कला - कान्तिपुर समाचार
कान्तिपुर वेबसाईट
AdvertisementAdvertisement

सुरु भयो नेपाल अन्तर्राष्ट्रिय नाट्य महोत्सव

कान्तिपुर संवाददाता

काठमाडौँ — नेपाल अन्तर्राष्ट्रिय नाट्य महोत्सव २०७९ (निटफेस्ट २०२२) सुरु भएको छ । ‘सामाजिक रुपान्तरणका लागि रंगमञ्च : विविधिताको उत्सव’ भन्ने नाराका साथ काठमाडौं थापागाउँस्थित मण्डला थिएटरमा शुक्रबारदेखि महोत्सवको थालनी गरिएको हो ।

महोत्सवमा संस्कृति, पर्यटन तथा नागरिक उड्डयनमन्त्री जीवनराम श्रेष्ठ, भारतका सुप्रसिद्ध रंगकर्मी तथा अभिनेत्री शबाना आजमी, काठमाडौं महानगरपालिकाका प्रमुख बालेन्द्र शाहलगायत रंगकर्मीहरू तथा नाट्यप्रेमीहरू सहभागी थिए ।

महोत्सवको सफलताको कामना गर्दै मन्त्री श्रेष्ठले महोत्सवबाट नेपाल र विश्वको सांस्कृतिक विविधतालाई प्रभावकारी बनाउने धारणा राखे । हाम्रो देश नेपाल आफैंमा विविधताले भरिपूर्ण छ,’ उनले भने, ‘यहाँको सौन्दर्यमा विभिन्न जातजातिको भाषा, धर्म, परम्पराहरूको हिस्साले भरिएको छ । ती हिस्साहरूमा हाम्रा पूर्खाको जीवनपद्धति र पहिचान मिसिएको छ ।’

कला, साहित्य, संगीत, नाट्य क्षेत्रले हाम्रो पहिचानलाई जीवन्त राख्ने बताउँदै उनले महोत्सवले सांस्कृतिक आदानप्रदानका साथै विभिन्न देशसँग मानवीय र कूटनीतिक सम्बन्ध बनाउन सघाउ पुर्‍याउने ठहर गरे । नेपालको सामाजिक तथा राजनीतिक परिवर्तनमा नाट्य क्षेत्रको भूमिका समेत रहेको उल्लेख गरे । उनले नेपालको कला तथा संस्कृति क्षेत्रलाई विस्तार गर्ने यस्ता खाले कार्यक्रमको निरन्तरताका लागि सहकार्य र सहयोग गर्न संस्कृति मन्त्रालयको ढोका सदैव खुल्ला रहने प्रतिबद्धता जाहेर गरे । नाट्य क्षेत्र विकास र विस्तारका लागि भनेर महानगरले समेत अहिलेसम्म नीति तथा कार्यक्रम नछुटाएको अहिलेको परिस्थितिमा आगामी वर्षदेखि बजेट नीतिमा रंगमञ्चलाई समेत समावेश गरिने महानगरका प्रमुख शाहले प्रतिबद्धता व्यक्त गरे । कालो कोट पाइन्टमा सजिएका प्रमुख शाहको प्रशंसा गर्दै आजमीले सामाजिक रुपान्तरण र विविधिताको उत्सवका रुपमा भएको महोत्सवमा आफू सहभागी भएकोमा निकै उत्साहित भएको बताइन् । ‘सामाजिक रुपान्तरण र विविधिता आजको आवश्यकता हो । कला, थिएटरमा परिवर्तन ल्याउने शक्ति हुन्छ,’ उनले भनिन् । थिएटरकै मानिसहरू एकबद्ध भएर नाट्य क्षेत्रको विकासका लागि मन्डलामा बनेको संरचना हेर्दै उनले खुसी प्रकट गर्दै समूहलाई बधाई दिइन् । महोत्सवमा सात नाटकहरूको संग्रह ‘इन्द्रधनुष’ को समेत विमोचन गरिएको थियो ।

९ दिनसम्म चल्ने महोत्सवमा हरेक दिन बिहान ८ बजेदेखि साँझ ७:३० बजेसम्म १२ देशका १८ नाटकको ३० मञ्चनसहित कार्यशाला, मास्टर क्लास, अन्तरक्रिया तथा विमर्शहरू हुनेछन् । महोत्सवमा विश्वभरिबाट २०० भन्दा बढी नाट्य कलाकारहरू तथा विभिन्न देशका नाट्य टोली, निर्देशकहरू काठमाडौं आइसकेका छन् । महोत्सवको दोस्रो दिन शनिबार भने अभिनेत्री आजमीबाट रंगमञ्चकै सेरोफेरोमा रहेर साँझ ७:३० बजे मन्डलामा मास्टर क्लास हुनेछ ।

महोत्सवमा नेपालसहित भारत, भुटान, श्रीलंका, रुस, इटाली, स्पेन, बेलायत, बेलारुस, इजिप्ट, संयुक्त राज्य अमेरिका, उरुग्वे र अर्जेन्टिनाका नाटकहरू समावेश छन् ।

प्रकाशित : मंसिर ९, २०७९ १८:५२
प्रतिक्रिया
पठाउनुहोस्

सशस्त्र प्रहरी महानिरीक्षक र अमेरिकी राजदूतबीच भेटवार्ता

कान्तिपुर संवाददाता

काठमाडौँ — सशस्त्र प्रहरी महानिरीक्षक राजु अर्याल र अमेरिकी राजदूत डिन आर थम्पसनबीच शिष्टाचार भेटवार्ता भएको छ । शुक्रबार सशस्त्र प्रहरी बल मुख्यालय हल्चोकमा महानिरीक्षक अर्याल र राजदूत थम्पसनबीच भेटवार्ता भएको हो ।  

राजदूत भएर आएपछि थम्पसनको महानिरीक्षक अर्यालसँग भएको यो पहिलो भेट हो । भेटका अवसरमा महानिरीक्षक अर्याल र राजदूतबीच दुई देशको सम्बन्ध र आपसी हितका विषयमा कुराकानी भएको सशस्त्र प्रहरीका सहायक प्रवक्ता डीएसपी शैलेन्द्र थापाले जानकारी दिए ।

प्रकाशित : मंसिर ९, २०७९ १८:३३
पूरा पढ्नुहोस्
प्रतिक्रिया
पठाउनुहोस्
×