नाटक ‘पुतलीको घर’ मार्फत पुनरागमन हुँदै गुरुकुल- कला - कान्तिपुर समाचार
कान्तिपुर वेबसाईट
AdvertisementAdvertisement

नाटक ‘पुतलीको घर’ मार्फत पुनरागमन हुँदै गुरुकुल

कान्तिपुर संवाददाता

काठमाडौँ — नाटक ‘पुतलीको घर’मार्फत आरोहण गुरुकुलले औपचारिक पुनरागमन गर्न लागेको छ । गुरुकुल बन्द भएको एक दशकपछि थापागाउँस्थित कुञ्ज नाटकघरमा ‘पुतलीको घर’ मञ्चनसँगै गुरुकुल पुनः सञ्चालनमा आउन लागेको हो । 

यही पुस ३० गतेदेखि माघ २२ गतेसम्म हेनरिक इब्सनको नाटक ‘अ डल्स हाउस’ नेपाली रुपान्तरण ‘पुतलीको घर’ नियमित मञ्चन हुने रंगकर्मी तथा गुरुकुलका संस्थापकमध्येकी एक निशा शर्माले बताइन् ।

नाटकको नेपाली अनुवाद तथा निर्देशन रंगकर्मी सुनील पोखरेलले गरेका हुन् । गुरुकुलले यो नाटक यसभन्दा अघि देश तथा विदेशमा गरी २१६ औं पटक मञ्चन गरिसकेको छ ।

नाटकघरका लागि स्थायी थिएटर बनाउने जग्गाको अभावमा बानेश्वर हाइटस्थित रहेको गुरुकुललाई सञ्चालन गरेको ९ वर्षपछि सन् २०११ मा बन्द गर्नुपरेको थियो ।

काठमाडौं महानगरपालिकाले एक वर्षको भाडा प्रदान गर्ने सहमति भएपछि कुञ्जको एउटा हल एक वर्षका लागि गुरुकुलको नाममा सञ्चालन हुने सम्झौता भएको गुरुकुलका संस्थापक पोखरेलले बताए ।

पोखरेलका अनुसार औपचारिक पुनरागमनकै दिन कुञ्जमा चित्र, कविता र नाटक प्रस्तुत हुनेछन् । कुञ्जमै ‘ताराबाजी लै लै’, ‘जात सोध्नु जोगीको’, ‘अग्निको कथा’ लगायत पाँचवटा नाटकहरू सम्भव भएसम्म पुरानै कलाकारको अभिनयमा गुरुकुलले मञ्चन गर्ने उनले बताए ।

‘पुतलीको घर’ नाटकमा शर्मा लगायत कमलमणी नेपाल, शेखर चापागाईं, अञ्जु देउजाको समेत अभिनय रहेको छ । नेपालको सट्टामा पोखरेलले समेत सुरुको केही दिन अभिनय गर्नेछन् ।

पुराना नाटकहरूलाई नयाँ पुस्ताले र अग्रजले पुनः हेरेर आजको दिनमा गुरुकुलको काम तथा योगदानलाई मूल्यांकन गरिदिऊन् भन्ने शर्मा र पोखरेलको आशा छ ।

प्रकाशित : पुस २७, २०७८ १३:४४
प्रतिक्रिया
पठाउनुहोस्

एमालेको प्रदेश अधिवेशन सर्‍यो

कान्तिपुर संवाददाता

काठमाडौँ — कोरोना महामारीको तेस्रो लहर सुरु भएको भन्दै नेकपा एमालेले प्रदेश अधिवेशन माघको अन्तिम साताका लागि सारेको छ ।

एमाले केन्द्रीय कार्यालयका सचिव भीष्म अधिकारीले प्रदेश अधिवेशन माघको २८ र २९ का लागि सारिएको बताए ।

‘कोभिडको तेस्रो लहर सुरु भएका कारण माघ ८ गते हुने भनिएको प्रदेश अधिवेशन माघ २८ र २९ का लागि सारिएको छ,’ अधिकारीले भने, ‘पार्टी केन्द्रले यस विषयमा निर्देशन जारी गरिसकेको छ ।’ अधिवेशन सार्नुको अर्को कारण कतिपय जिल्लामा अधिवेशन हुन नसकेको कारण समेत रहेको अधिकारीले बताए ।

मंसिरको अन्तिम साता भएको एमाले केन्द्रीय बैठकले माघ ८ गते एकैदिन प्रदेश अधिवेशन गर्ने निर्णय गरेको थियो ।

प्रकाशित : पुस २७, २०७८ १३:४१
पूरा पढ्नुहोस्
प्रतिक्रिया
पठाउनुहोस्
x
×