प्रदर्शनलाई समर्थन जनाएपछि इरानका दुई अभिनेत्री पक्राउ- विश्व - कान्तिपुर समाचार

प्रदर्शनलाई समर्थन जनाएपछि इरानका दुई अभिनेत्री पक्राउ

एजेन्सी

काठमाडौँ — इरानका दुई लोकप्रिय अभिनेत्रीहरू देशभर चलेको विरोध प्रदर्शनलाई समर्थन जनाएपछि पक्राउ परेका छन् । हेंगामेह घाजियानी र कातायोन रिआहीलाई प्रहरीले पक्राउ गरेको हो ।

गत सेप्टेम्बरदेखि इरानमा देशव्यापी बनेको प्रदर्शनमा ती दुई अभिनेत्रीले समर्थन जनाएका थिए । जहाँ धार्मिक रित अनुसार हिजाब नपहिरिएको आरोपमा पक्राउ परेकी २२ वर्षीया माशा अमिनीको हिरासतमै मृत्यु भएपछि देशव्यापी रुपमा प्रदर्शन हुँदै आएको छ।

स्थानीय मिडियाका अनुसार टेलिभिजन सिरिजमा चर्चित अभिनेत्री रिआहीलाई आइतबार इरानी सुरक्षा फौजले पक्राउ गरेको हो। टिभी सिरिज 'जोसेफ द प्रोफेट' र 'द टेन्थ नाइट' साथै 'द लास्ट सपर' जस्ता फिल्ममा अभिनय गरी चर्चा कमाएकी अभिनेत्री रिआहीले अमिनीको मृत्युपछि आफ्नो इन्स्टाग्राममा स्कार्फ बिनाको एउटा भिडियो पोस्ट गरेकी थिइन्।

यस्तै 'एज सिम्पल एज द्याट', 'डेज अफ लाइफ' जस्ता फिल्ममा अभिनय गरेकी अभिनेत्री घाजिआनीले पनि आफ्नो इन्स्टाग्राममा गत शनिबार स्कार्फ बिनाको भिडियो सार्वजनिक गरेकी थिइन् । इन्स्टामा उनले आफ्नो भिडियो राख्दै उक्त भिडियो नै आफ्नो अन्तिम हुनसक्ने लेखेकी थिइन् । 'यदि मलाई केही भयो भने, म मेरो अन्तिम स्वाससम्म सधैं इरानका जनताको साथ रहनेछु,' उनले लेखेकी थिइन् ।

घाजिआनी भिडियो सार्वजनिक गरेको भोलिपल्ट नै सुरक्षा फौजबाट पक्राउ परेकी हुन् । उनीहरूलाई इरानी सुरक्षा विरुद्ध गतिविधि गरेको र इरानी शासनविरुद्ध प्रोपगान्डा फैलाएको आरोप लगाइएको छ । मानवअधिकार संगठनका अनुसार इरानमा सेप्टेम्बरयता भएको प्रदर्शनको क्रममा सुरक्षा फौजको कारबाहीमा ४७ बालबालिकासहित ३७८ जना मारिएका छन् । प्रदर्शन दबाएका कारण पछिल्लो समय इरान अन्तर्राष्ट्रिय समुदायमा पनि आलोचित भएको छ ।

प्रकाशित : मंसिर ६, २०७९ १८:२६
प्रतिक्रिया
पठाउनुहोस्

नुवाकोट १ मा २ मतले माओवादीका उम्मेदवार अगाडि 

कान्तिपुर संवाददाता

काठमाडौँ — नुवाकोट क्षेत्र नम्बर १ मा सत्तारुढ गठबन्धनका तर्फबाट माओवादी केन्द्रका उम्मेदवार हितबहादुर तामाङ प्रतिस्पर्धीभन्दा जम्मा दुई मतले अगाडि परेका छन् । एमालेका उम्मेदवार बद्री मैनालीले सुरुदेखि अग्रता लिए पनि पछिल्लो समयमा माओवादीका तामाङले २ मतले उछिनेका हुन् ।

साँझ ६ बजेसम्मको मतपरिणाम अनुसार माओवादीका तामाङले ३ हजार ७९५ मत ल्याएका छन् भने एमालेका मैनालीले ३ हजार ७९३ मत ल्याएका छन् । तादीगाउँपालिका भवनमा जारी मतगणनामा राष्ट्रिय स्वतन्त्र पार्टीका प्रद्युम्न महत क्षेत्रीले १ हजार ४४ मत पाएर तेस्रो र राप्रपाका सुदर्शन सिटौलाले २०८ मत पाएर चौथो स्थानमा छन् ।


प्रकाशित : मंसिर ६, २०७९ १८:१७
पूरा पढ्नुहोस्
प्रतिक्रिया
पठाउनुहोस्
×