बेइजिङमा श्वेतचैत्य स्थापनाको ७५०औं वार्षिकोत्सव मनाइँदै

साप्ताहिक कार्यक्रमहरूमा नेपाल-चीन सांस्कृतिक आदानप्रदान सम्बन्धित गतिविधि रहेको नेपाली दूतावासका इकोनोमिक मिनिस्टर छविन्द्र पराजुलीले कान्तिपुरलाई बताए । महोत्सव अवधिमा श्वेतचैत्य परिसरमा कलाकृति प्रदर्शनीहरू, नेपाली काष्ठकला, हस्तकलाका साथै पेन्टिङहरू देखाइने, स्थलगत प्रत्यक्ष चित्रकला कोरिने, गोष्ठी सम्मेलन गरिने पनि उनले जानकारी दिए । महोत्सव अवधिमा ललितपुरको पाटन सङ्ग्रहालय र श्वेतचैत्य व्यवस्थापन कार्यालय बेइजिङबीच समझदारी (एमओयू)मा हस्ताक्षर गर्ने कार्यक्रम छ। श्वेतचैत्य निर्माणका सिलसिलामा प्रयोग भएको कलाशिल्प तथा नेपाली कलाशैलीद्वारा मठमन्दिर निर्माणलगायत डिजिटल भिडियो प्रदर्शनी गर्ने कार्यक्रम पनि राखिएको छ ।

^{हु थोङबाट देखिएको श्वेतचैत्य}

श्वेतचैत्य स्थापनाको ७५०औं वार्षिकोत्सव यसअघि नै आयोजना गर्ने तयारी भए पनि कोभिड १९ महामारीका कारण स्थगित गरिएको थियो । यो चैत्य १३औं शताब्दीमा युआन राजवंशकालमा बनिएर हालसम्म पनि संरक्षित ऐतिहासिक धरोहर हो । चीनमा रहँदा कलाकार अरनिकोले लगातार ४० वर्षजतिमा ऐतिहासिक सम्पदा निर्माण गरेर नेपाल-चीन मित्रताका प्रमाणहरू छाडेको चिनियाँ इतिहासकारहरु बताउँछन् । चीनका यी जातीय कवि ची ती माच्याका अनुसार युआन राजवंशकालका राजगुरु फाग्पाको चेलासमेत रहेका अरनिकोले नेपाल चीन मित्रतामा गहिरो प्रभाव छोडे। द पेपरको चिनियाँ संस्करणमा प्रकाशित छ कि राजगुरु फाग्पा स्वयंले विभिन्न जातीय समूहबीच सांस्कृतिक एकताका लागि भूमिका खेलेकोमा अरनिकोले तिब्बत, बेइजिङ र वुथाइशानमा बौद्ध मन्दिर बनाएर झनै ठूलो भूमिका खेले ।

^{अरनिकोको शालिकअघि फोटो खिचाउँदै नेपाली ।}

चीनको राजधानी बेइजिङको सी छङ् जिल्लास्थित फुछङमन् उत्तरी मार्गमा यो अवस्थित छ । करिब ५१ मिटर भएको तत्कालीन राजधानी तातुको सर्वाधिक अग्लो टावरलाई कलाकार अरनिकोले सन् १२७१ मा बनाउन सुरु गरेका थिए।

^{अरनिको शालिकमा लिखित जानकारी}