बंगलादेशमा डुंगा पल्टिँदा २४ जनाको मृत्यु

स्थानीय प्रहरीका अनुसार बोदा क्षेत्रस्थित कराटोआ नदी किनारमा रहेको हिन्दु मन्दिरबाट फर्कने क्रममा डुंगामा सवार यात्रुहरू दुर्घटनामा परेको हो । स्थानीय र उद्धारकर्मीहरूले आइतबार साँझसम्म २४ जनाको शव नदीबाट निकालेको बताइएको छ । मृत्यु हुनेमध्ये १२ जना महिला र ८ जना बालबालिकाहरू रहेको बताइएको छ ।

डुंगा पल्टिँदा कतिपय यात्रुहरू भने पौडी खेलेर बाहिर निस्कन सफल भएका थिए । यस्तै २५ यात्रुहरू अझै हराइरहेको स्थानीय प्रहरीले जनाएको छ । साथै १० जनाको जीवीत उद्धार गरिएको र उनीहरूलाई उपचारका लागि अस्पताल लगिएको स्थानीय मिडियाले जनाएका छन् ।

मुस्लिम वाहुल्य बंगलादेशमा हरेक वर्ष बोदेश्वरी मन्दिरमा हजारौं तीर्थालुहरूको भीड लाग्ने गर्छ । आइतबार हिन्दुहरूको महत्त्वपूर्ण पर्व दुर्गा पूजा सुरु भएको छ । जुन बंगलादेशसहित भारत र नेपालका अधिकांश स्थानमा मनाइन्छ ।