अफगानिस्तान बाढीले ३१ को मृत्यु, कैयौं बेपत्ता- विश्व - कान्तिपुर समाचार

अफगानिस्तान बाढीले ३१ को मृत्यु, कैयौं बेपत्ता

एजेन्सी

काबुल — अफगानिस्तानको उत्तरी क्षेत्रमा आएको बाढीका कारण कम्तीमा ३१ जनाको मृत्यु भएको छ । पर्वान प्रान्तमा मंगलबार आएको बाढीमा परी १७ जना घाइते भएका अधिकारीहरूले जनाएका छन् ।

बख्तर समाचार समितिले मृतकको संख्या बढ्न सक्ने जनाएको छ । बाढीमा परी अझै पनि दर्जनौं मानिस हराइरहेका खामा प्रेसले जनाएको छ । भीषण बाढीका कारण पर्वान–बम्यान राजमार्गसमेत अवरुद्ध भएको छ ।

स्थानीय सञ्चारमाध्यमका अनुसार बाढीका कारण दर्जनौं घर र सयौं एकडमा लगाइएको बालीनाली समेत नष्ट भएको छ । भारी वर्षा र बाढीले पूर्वमा नान्गाहार प्रान्त र उत्तरमा पन्जसिर प्रान्तलगायत अन्य धेरै अफगान प्रान्तहरूलाई असर गरेको छ ।

‘स्थिति निकै भयावह बनेको छ । अर्को यस्तै विपद् रोक्न हामीले राष्ट्रिय र अन्तर्राष्ट्रिय सहयोगका लागि आग्रह गरेका छौं,’ कापिसा प्रान्तका सूचना तथा सञ्चार निर्देशक करिमुल्लाह वासिकले भने । अफगानिस्तानको नुरिस्तान प्रान्तमा दुई साताअघि आएको बाढीले ४० जनाभन्दा बढीको मृत्यु भएको थियो ।

प्रकाशित : भाद्र १, २०७९ ०६:५७
प्रतिक्रिया
पठाउनुहोस्

रुसको रोस्तोभमा आगलागी : ६० घर नष्ट

एजेन्सी

मस्को — रुसको रोस्तोभमा मंगलबार भएको आगलागीमा कम्तीमा ६० घर जलेर नष्ट भएका छन् । जंगलमा फैलिएको आगलागी अनियन्त्रित भएसँगै नजिकैको बस्तीमा असर पुगेको अधिकारीहरूले जनाएका छन् ।

आगलागीमा कुनै मानवीय क्षति नभएपनि कैयौं विस्थापित भएका अन्तर्राष्ट्रिय सञ्चार माध्यमहरूले जनाएका छन् । आगलागीले कम्तीमा तीनवटा गाउँ प्रभावित भएका आपतकालीन व्यवस्था मन्त्रालयले जनाएको छ । विस्थापितलाई राहत तथा सहयोगको आवश्यकता रहेको बताइएको छ ।

प्रभावितलाई अत्यावश्यक सेवा तथा सामग्री उपलब्ध गराउने कार्य भइरहेको अधिकारीहरूको भनाइ छ । आगलागी नियन्त्रणका लागि दुई अग्नि नियन्त्रक विमान, एउटा हेलिकोप्टर र ३ सयभन्दा बढी अग्नि नियन्त्रक खटिरहेका जनाइएको छ ।

प्रकाशित : भाद्र १, २०७९ ०६:५६
पूरा पढ्नुहोस्
प्रतिक्रिया
पठाउनुहोस्
x
×