इजरायल र प्यालेस्टिनी लडाकु समूहबीच युद्धविराम- विश्व - कान्तिपुर समाचार
कान्तिपुर वेबसाईट
AdvertisementAdvertisement

इजरायल र प्यालेस्टिनी लडाकु समूहबीच युद्धविराम

युद्धविराम उल्लंघन भए कडा प्रतिवाद गर्ने इजरायलको चेतावनी
एजेन्सी

जेरुसेलम — तीन दिनसम्म चलेको हिंसात्मक संघर्षपछि इजरायल र प्यालेस्टिनी विद्रोही समूहबीच युद्धविराम भएको छ । दुईपक्षीय हिंसामा कम्तीमा ५१ जनाले ज्यान गुमाएका जनाइएको छ । मृत्यु हुनेमध्ये १५ जना बालबालिका रहेका प्यालेस्टिनी स्वास्थ्य मन्त्रालयले जनाएको छ ।

प्यालेस्टिनी इस्लामिक जिहाद (पीआईजे) का लडाकुले आइतबार मध्यरातबाट युद्धविराम लागू भएको बताएका छन् । इजरायली प्रधानमन्त्री याइर लापिडले पनि युद्धविरामको पुष्टि गरेका बीबीसीले जनाएको छ । गाजामा मानवीय संकट उत्पन्न हुने चिन्ताबीच दुई पक्षले युद्धविराम सहमति गरेका हुन् । युद्धविरामपछि प्यालेस्टाइनमा खुसी मनाइएको छ । इजिप्टका मध्यस्थकर्ताहरूको सहयोगमा दुई पक्षबीच युद्धविराम भएको हो । इस्लामिक जिहादका प्रवक्ताले आफ्ना मानिसमाथि इजरायली आक्रमण रोक्न पहल गरेको भन्दै इजिप्टको प्रशंसा गरेका छन् । युद्धविराम उल्लंघन भएको खण्डमा आफूसँग कडा प्रतिवाद गर्ने अधिकार रहेको इजरायलले चेतावनी दिएको छ ।

सन् २०२१ मा ११ दिनसम्म चलेको द्वन्द्वपछि अहिले भएको हिंसा सबैभन्दा ठूलो हो । गाजाको स्वास्थ्य मन्त्रालयले भने इजरायली सेनाको हवाई आक्रमणमा ५१ जना प्यालेस्टिनी मारिएका र ३ सय जनाभन्दा बढी घाइते भएका जनाएको छ ।

युद्धविराम हुनुअघि इजरायली सेनाले गाजास्थित पीआईजेलाई लक्षित गरी हवाई आक्रमण गरेको थियो । त्यसको जवाफमा गाजाबाट दर्जनौं रकेट प्रहार गरिएको भए पनि आइरन डोम क्षेप्यास्त्र प्रतिरक्षा प्रणालीले निस्तेज पारेको इजरायलले जनाएको छ । शुक्रबारयता प्यालेस्टिनी भूभागबाट कम्तीमा ६ सयवटा क्षेप्यास्त्र प्रहार गरिएको इजरायली अधिकारीको दाबी छ ।

इजरायली सुरक्षा फौजले सोमबार राति पीआईजे प्रमुख भनिएका बसिम सादीलाई पक्राउ गरेपछि दुई पक्षबीच तनाव बढेको हो । उनी पक्राउ परेको जेनिन क्षेत्रबाट इजरायलमाथि पछिल्लो समय दुई पटक आक्रमण भएको थियो ।

त्यसलगत्तै इजरायलले गाजा क्षेत्रमा गरेको हवाई आक्रमणमा पीआईजे समूहका वरिष्ठ कमान्डरहरू तैसिर जबारी र खलिद मन्सुर मारिएका थिए । इजरायलले प्यालेस्टिनी क्षेत्रबाट आफ्नो भूभागमा हुने आक्रमणका लागि मन्सुर मुख्य जिम्मेवार रहेको बताउँदै आएको थियो ।

दुई जना कमान्डरको मृत्युपछि पीआईजे थप आक्रामक बनेको हो । पीआईजे समूहबाट ‘तत्काल खतरा’ देखिएका कारण ‘ब्रेकिङ डन’ नामक कारबाही चलाउन बाध्य भएको इजरायलको दाबी छ । इजरायल र प्यालेस्टाइनबीच लामो समयदेखि द्वन्द्व जारी छ । दुई पक्षबीच सन् २०२१ को मे महिनामा भएको ११ दिन लामो युद्धमा कम्तीमा २ सय प्यालेस्टिनी र १२ जना इजरायलीले ज्यान गुमाएका थिए ।

इरानले समर्थन गरेको पीआईजे गाजामा रहेका शक्तिशाली लडाकु समूहमध्येको एक हो । सिरियाको राजधानी दमास्कसमा मुख्यालय रहेको समूहले इजरायलविरुद्ध क्षेप्यास्त्रलगायतका आक्रमण गर्दै आएको छ । सन् २०१९ को नोभेम्बरमा इजरायलद्वारा पीआईजे कमान्डर मारिएपछि सुरु भएको युद्ध ५ दिनसम्म चलेको थियो । युद्धका क्रममा ३४ जना प्यालेस्टिनीले ज्यान गुमाएका थिए भने १ सय ११ प्यालेस्टिनी र ६३ इजरायली घाइते भएका थिए ।

प्रकाशित : श्रावण २४, २०७९ ०७:१६
प्रतिक्रिया
पठाउनुहोस्

ताइवान वरपर सैन्य अभ्यास बढाउँदै चीन

एजेन्सी

बेइजिङ — चीनले ताइवान वरपरको क्षेत्रमा नयाँ ठूलो सैन्य अभ्यास गर्ने भएको छ । चिनियाँ सेनाको पूर्वी कमान्डले अब पन्डुब्बी आक्रमण र समुद्रमा छापा मार्ने कामको बृहत् अभ्यास गर्ने जनाएको छ ।

अमेरिकी सभामुख नान्सी पेलोसी नेतृत्वको टोलीले ताइवानको भ्रमण गरेपछि रुष्ट चीनले ताइवान वरपरको क्षेत्रमा चार दिन लामो सैन्य अभ्यास गरेको थियो । चिनियाँ सेनाले पाँचवटा प्रत्यक्ष (वास्तविक गोलीगठ्ठाको प्रयोग) सहितका अभ्यास आइतबार अन्त्य गरेको थियो ।

चीनले आफ्नो देशमाथि अतिक्रमण गर्ने तयारीका लागि सैन्य अभ्यास गरेको ताइवानको आरोप छ । अभ्यासका क्रममा चिनियाँ विमान र पानीजहाजहरू ताइवानी भूभागमा भने प्रवेश नगरेको एक ताइवानी अधिकारीले जनाएका छन् । तर सैन्य अभ्यासका क्रममा चिनियाँ सेनाले ताइवानको जलक्षेत्रमाथि एक क्षेप्यास्त्र प्रहार गरेको थियो ।

अमेरिका, अस्ट्रेलिया र जापानले चीनको सैन्य अभ्यासको निन्दा गरेका छन् । ताइवान स्ट्रेटको अवस्था परिवर्तन गर्ने उद्देश्यले चीनले बृहत् सैन्य अभ्यास गरेको उनीहरूको दाबी छ । ताइवान र चीनबीचको १८० किलोमिटरमा फैलिएको जलक्षेत्र ताइवान स्ट्रेट हो । सैन्य अभ्यासका क्रममा चिनियाँ विमान र पानीजहाजले पटकपटक ताइवान स्ट्रेटको मध्यवर्ती रेखा भने पार गरेका थिए । तर ताइवानी रक्षा मन्त्रालयले त्यसको विरोध गर्दै ताइवान स्ट्रेटको मध्यवर्ती रेखा सन् १९५० को दशकयता अस्तित्वमा रहेको कुरा तथ्य भएको जनाएको छ । अमेरिकाले पनि चिनियाँ कदमको विरोध गर्दै पेलोसीको भ्रमणलाई लिएर चीनले जलवायु परिवर्तन, सैन्य वार्ता र अन्तर्राष्ट्रिय अपराध नियन्त्रण गर्ने प्रयासका विषयमा सहकार्य तोडेको आरोप लगाएको छ ।

प्रकाशित : श्रावण २४, २०७९ ०७:१५
पूरा पढ्नुहोस्
प्रतिक्रिया
पठाउनुहोस्
x
×