युक्रेनमाथि आक्रमण नरोक्न पुटिनको आदेश

लिसेचान्स्क कब्जामा लिएपछि अब रुसी सेनाले लुहान्स्क क्षेत्रमाथि आफ्नो नियन्त्रण कायम गर्न सक्नेछ । पुटिनले रक्षामन्त्री सर्गेई सोइगुलाई लुहान्स्क कब्जा गर्ने अभियानमा भाग लिएका सैनिकले आराम गर्दै लडाइँको क्षमता विकास गर्नुपर्ने बताएका बीबीसीले जनाएको छ ।

‘पूर्वी र पश्चिमी क्षेत्रमा तैनाथलगायत अन्य सैन्य इकाइले पूर्वस्वीकृत योजनाअनुसार आफ्ना कार्यहरू पूरा गर्नुपर्छ,’ पुटिनले भनेका छन् । रुसी कब्जामा रहेको लुहान्स्कका गभर्नर सेर्ही हाइडाईले युक्रेनी सेना पछि हट्ने क्रममा कुनै पनि क्षति नभएको बताएका छन् । लिसेचान्स्क सहरमा आफ्नो नियन्त्रण गुमाएपछि युक्रेनी फौजले रुसी सेनालाई पश्चिमतर्फ अघि बढ्न रोक्नका लागि सैन्य सुदृढीकरण गरिरहेको उनको भनाइ छ ।

रुसी फौजले टाढैबाट आक्रमण गर्न सक्ने र सहर ध्वस्त हुने भएकाले आफूहरू पछि हटेको हाइडाईको दाबी छ । लुहान्स्क क्षेत्रमाथि रुसले नियन्त्रण कायम गर्नु निकै पीडादायी भएको जनाउँदै उनले युक्रेनी सेनाले एउटा लडाइँ हारे पनि पूरै युद्ध नहारेको जनाए । उनले रुससँग लड्नका लागि थप हातहतियार आवश्यक परेको भन्दै त्यसका लागि पश्चिमा देशलाई आग्रह गरे । युक्रेनी राष्ट्रपति भ्लोदिमिर जेलेन्स्कीले लिसेचान्स्क फिर्ता ल्याउने वाचा गरेका छन् ।

रुस–युक्रेन युद्ध सुरु भएको चार महिना नाघिसकेको छ । तर युद्ध रोकिने सम्भावना भने छैन । युक्रेनले उत्तर एट्लान्टिक सन्धि संगठन (नाटो) को सदस्यता लिने तयारी गरेपछि रुसले फेब्रुअरी २४ मा आक्रमण सुरु गरेको हो । रुसी आक्रमण सुरु भएयता करिब ५ हजार युक्रेनी सर्वसाधारणको ज्यान गएको र ५ हजारभन्दा बढी घाइते भएका संयुक्त राष्ट्रसंघले जनाएको छ ।

त्यस्तै, युद्धका कारण दुवै पक्षका हजारौं सुरक्षाकर्मीले ज्यान गुमाएका छन् । ६९ लाख युक्रेनी विस्थापित भइसकेका छन् । तीमध्ये ५८ लाखले शरणार्थीका लागि विभिन्न देशमा आवेदन दिएका छन् । २१ लाख स्वदेश फर्किसकेका राष्ट्रसंघीय शरणार्थी निकायले जनाएको छ । कम्तीमा ८० लाख युक्रेनी भने देशभित्रै विस्थापित भएको जनाइएको छ ।