युक्रेनमाथि आक्रमण नरोक्न पुटिनको आदेश- विश्व - कान्तिपुर समाचार
कान्तिपुर वेबसाईट
AdvertisementAdvertisement

युक्रेनमाथि आक्रमण नरोक्न पुटिनको आदेश

एजेन्सी

मस्को — रुसी राष्ट्रपति भ्लादिमिर पुटिनले युक्रेनमाथि आक्रमण जारी राख्न आदेश दिएका छन् । युक्रेनी सहर लिसेचान्स्क कब्जा गरेपछि पुटिनले आफ्ना रक्षामन्त्रीलाई युक्रेनमाथिको आक्रमण नरोक्न र आफ्नो लक्ष्य प्राप्त गर्न आदेश दिएका हुन् । 

लिसेचान्स्क कब्जामा लिएपछि अब रुसी सेनाले लुहान्स्क क्षेत्रमाथि आफ्नो नियन्त्रण कायम गर्न सक्नेछ । पुटिनले रक्षामन्त्री सर्गेई सोइगुलाई लुहान्स्क कब्जा गर्ने अभियानमा भाग लिएका सैनिकले आराम गर्दै लडाइँको क्षमता विकास गर्नुपर्ने बताएका बीबीसीले जनाएको छ ।

‘पूर्वी र पश्चिमी क्षेत्रमा तैनाथलगायत अन्य सैन्य इकाइले पूर्वस्वीकृत योजनाअनुसार आफ्ना कार्यहरू पूरा गर्नुपर्छ,’ पुटिनले भनेका छन् । रुसी कब्जामा रहेको लुहान्स्कका गभर्नर सेर्ही हाइडाईले युक्रेनी सेना पछि हट्ने क्रममा कुनै पनि क्षति नभएको बताएका छन् । लिसेचान्स्क सहरमा आफ्नो नियन्त्रण गुमाएपछि युक्रेनी फौजले रुसी सेनालाई पश्चिमतर्फ अघि बढ्न रोक्नका लागि सैन्य सुदृढीकरण गरिरहेको उनको भनाइ छ ।

रुसी फौजले टाढैबाट आक्रमण गर्न सक्ने र सहर ध्वस्त हुने भएकाले आफूहरू पछि हटेको हाइडाईको दाबी छ । लुहान्स्क क्षेत्रमाथि रुसले नियन्त्रण कायम गर्नु निकै पीडादायी भएको जनाउँदै उनले युक्रेनी सेनाले एउटा लडाइँ हारे पनि पूरै युद्ध नहारेको जनाए । उनले रुससँग लड्नका लागि थप हातहतियार आवश्यक परेको भन्दै त्यसका लागि पश्चिमा देशलाई आग्रह गरे । युक्रेनी राष्ट्रपति भ्लोदिमिर जेलेन्स्कीले लिसेचान्स्क फिर्ता ल्याउने वाचा गरेका छन् ।

रुस–युक्रेन युद्ध सुरु भएको चार महिना नाघिसकेको छ । तर युद्ध रोकिने सम्भावना भने छैन । युक्रेनले उत्तर एट्लान्टिक सन्धि संगठन (नाटो) को सदस्यता लिने तयारी गरेपछि रुसले फेब्रुअरी २४ मा आक्रमण सुरु गरेको हो । रुसी आक्रमण सुरु भएयता करिब ५ हजार युक्रेनी सर्वसाधारणको ज्यान गएको र ५ हजारभन्दा बढी घाइते भएका संयुक्त राष्ट्रसंघले जनाएको छ ।

त्यस्तै, युद्धका कारण दुवै पक्षका हजारौं सुरक्षाकर्मीले ज्यान गुमाएका छन् । ६९ लाख युक्रेनी विस्थापित भइसकेका छन् । तीमध्ये ५८ लाखले शरणार्थीका लागि विभिन्न देशमा आवेदन दिएका छन् । २१ लाख स्वदेश फर्किसकेका राष्ट्रसंघीय शरणार्थी निकायले जनाएको छ । कम्तीमा ८० लाख युक्रेनी भने देशभित्रै विस्थापित भएको जनाइएको छ ।

प्रकाशित : असार २२, २०७९ ०७:०३
प्रतिक्रिया
पठाउनुहोस्

अमेरिकामा फेरि गोलीकाण्ड

स्वतन्त्रता दिवस मनाइरहँदा इलिनोयमा भएको गोलीकाण्डमा कम्तीमा ६ को मृत्यु, ३६ जना घाइते
एजेन्सी

हाइल्यान्ड पार्क — अमेरिकामा स्वतन्त्रता दिवसका अवसरमा आयोजित परेडका सहभागीमाथि गरिएको बन्दुक आक्रमणमा कम्तीमा ६ जनाको ज्यान गएको छ । ३६ जना घाइते छन् । गोलीकाण्डमा घाइते भएकामध्ये २४ जनाको अस्पतालमा उपचार भइरहेको अधिकारीहरूले जनाएका छन् । 

इलिनोय राज्यको हाइल्यान्ड पार्कमा भएको गोलीकाण्डपछि सर्वसाधारणलाई सुरक्षित स्थानतर्फ लैजाँदै सुरक्षाकर्मी । तस्बिर : एपी

इलिनोय राज्यको हाइल्यान्ड पार्कमा आयोजित परेडका सहभागीलाई लक्षित गरी एक बन्दुकधारीले उच्च क्षमताको राइफलबाट गोली प्रहार गरेका प्रहरीले जनाएको छ । स्थानीय समयअनुसार १० बजेर १५ मिनेटमा आक्रमण भएपछि परेड कार्यक्रम रद्द भएको थियो । गोली प्रहारबाट ५ जनाको घटनास्थलमै र अर्का एक जनाको उपचारका क्रममा नजिकैको अस्पतालमा मृत्यु भएको हो । सन्दिग्ध आक्रमणकारीलाई प्रहरीले पक्राउ गरेको छ । प्रहरीका अनुसाार २२ वर्षीय रोबर्ट ई क्रिमो तृतीयले आक्रमण गरेका हुन् । ती हतियारधारीलाई प्रहरीले ‘खतरनाक व्यक्ति’ भनेको छ । घटनाबारे थप अनुसन्धान भइरहेको जनाइएको छ ।

सन्दिग्ध बन्दुकधारीले परेड सुरु भएको केही मिनेटमै गोली चलाएका थिए । प्रहरीका अनुसार भर्‍याङको सहयोगले नजिकैको व्यावसायिक भवनको छतमा चढेर उनले अमेरिकाको झन्डा हल्लाइरहेका मानिसहरू र बालबालिकालाई ताकेर गोली प्रहार गरेका थिए ।

स्वतन्त्रता दिवस समारोहमा सांगीतिक र्‍यालीदेखि मनोरञ्जनात्मक कार्यक्रमहरू भइरहेका थिए । वर्षको सबैभन्दा रमाइलो मानिने दिनमा आतंक मच्चिएपछि त्यहाँ उपस्थित मानिसहरूले भागदौड गरेका थिए । त्यस क्रममा मानिसका विभिन्न समान र कुर्सीहरू सडकभरि छरपस्ट भएका थिए ।

सन् १७७६ मा ग्रेट ब्रिटेनबाट स्वतन्त्र भएको उपलक्ष्यमा अमेरिकी उपनिवेशहरूले हरेक वर्ष जुलाई ४ का दिन स्वतन्त्रता परेडको आयोजना गरी राष्ट्रिय बिदा मनाउने गर्छन् । ‘अकस्मात् आतिसबाजी भइरहेको जस्तो आवाज आयो,’ बन्दुकधारीले गोली प्रहार गरेको स्थानबाट बाटोपारि रहेका पूर्वचिकित्सक रिचार्ड कउफम्यानले भने । बन्दुकधारीले करिब २ सय राउन्ड गोली प्रहार गरेका उनको भनाइ छ । उक्त क्षेत्रमा यसअघि निकै कम मात्र गोली प्रहारका घटना भएका छन् । ‘मैले यहाँ निकै सुरक्षित ठान्थें तर अहिले ज्यान जोगाउन लुक्नुपरेको छ । यहाँ मानिसहरू रोइरहेका छन् र यो अनुभूति निकै दुःखद् छ,’ प्रत्यक्षदर्शी आनन्द पीले भने । अर्का प्रत्यक्षदर्शी नोएल हाराले खाजा खाइरहेका बेला आतंक मच्चिएको बताए ।

अमेरिकी राष्ट्रपति जो बाइडेनले हिंसात्मक घटनाले आफू निकै दुःखी भएको बताएका छन् । हाइल्यान्ड पार्क सहरकी मेयर न्यान्सी रोटरिङले ‘स्वतन्त्रता मनाउन जम्मा भएकाले शोक मनाउनुपरेको,’ बताइन् । बाइडेनले ‘बन्दुक हिंसाविरुद्ध लड्ने’ प्रतिबद्धता दोहोर्‍याएका छन् । इलिनोइसका गभर्नर जे रोबर्ट प्रित्ज्करले गोली प्रहारका घटना परम्पराजस्तै हुने गरेको भन्दै चिन्ता व्यक्त गरे ।

प्रकाशित : असार २२, २०७९ ०६:५७
पूरा पढ्नुहोस्
प्रतिक्रिया
पठाउनुहोस्
×