राजस्थानमा चर्कियो हिन्दु–मुस्लिम तनाव- विश्व - कान्तिपुर समाचार
कान्तिपुर वेबसाईट
AdvertisementAdvertisement

राजस्थानमा चर्कियो हिन्दु–मुस्लिम तनाव

पैगम्बर मोहम्मदबारे नेताले दिएका अभिव्यक्तिलाई समर्थन गरेको आरोपमा एक हिन्दुको हत्या
एजेन्सी

जइपुर — भारतको राजस्थान राज्यको उदयीपुर जिल्लामा एक व्यक्तिको हत्या गरिएपछि धार्मिक तनाव उत्पन्न भएको छ ।

भारतको राजस्थानमा भएको हत्याको विरोधमा बुधबार राजधानी नयाँदिल्लीमा प्रदर्शन गरिँदै। तस्बिर : एपी

दुई मुस्लिम युवकले उदयीपुर जिल्लाका लुगा सिलाउने काम गर्दै आएका कन्हैया लालको हत्या गरेका हुन् । लालको हत्याका समयमा उनीहरूले खिचेको भिडियोसमेत अनलाइनमा राखेका छन् । राजस्थान प्रहरीले भिडियोमा देखिएका दुई युवालाई पक्राउ गरिएको जनाएको छ ।

इस्लाम धर्मगुरु पैगम्बर मोहम्मदबारे भारतीय नेताका विवादास्पद टिप्पणीलाई समर्थन गरेपछि प्रतिशोधस्वरूप ती व्यक्तिको हत्या गरिएको उनीहरूको दाबी छ । घटनापछि विरोध चर्केपछि राज्य सरकारले धेरै मानिसहरूलाई एकै स्थानमा भेला हुन रोक लगाएको छ । त्यसका साथै राजस्थानमा इन्टरनेट सेवा बन्द गरिएको भारतीय सञ्चारमाध्यमले जनाएका छन् ।

त्यसैगरी सामाजिक सञ्जालमा सार्वजनिक अर्को एक भिडियोमा उनीहरूले उक्त हत्याबारे गौरवपूर्ण रूपमा कुरा गरेका छन् । भिडियोमा ती युवकले खुँडा नचाउँदै प्रधानमन्त्री नरेन्द्र मोदीलाई धम्की दिएका छन् । राजस्थानका एक प्रहरी अधिकारीले हत्याको भिडियो ‘हेर्नका लागि निकै डरलाग्दो’ रहेको भन्दै प्रसारण नगर्न सञ्चारमाध्यमलाई आग्रह गरेका छन् ।

राजस्थानका मुख्यमन्त्री अशोक गेहलटले जनतालाई शान्त र संयमित रहन आह्वान गरेका छन् । भारतको केन्द्र सरकारले घटनाबारे अनुसन्धान गर्न नेसनल इन्भेस्टिगेटिभ एजेन्सी (एनआईए) लाई आदेश दिएको छ । एनआईए प्रतिआतंकवादको विषयमा अनुसन्धान गर्ने देशको प्रमुख निकाय हो ।

भारतीय सञ्चारमाध्यमका अनुसार हत्या गर्नुअघि ती दुई युवक ग्राहकका रूपमा कन्हैया लालको पसलमा प्रवेश गरेका थिए । लुगा सिलाउन अर्डर गरेका उनीहरूले नापजाँच गर्ने क्रममा कन्हैयालाई आक्रमण गरेका थिए ।

कन्हैयाले आफ्नो सामाजिक सञ्जालमा भारतीय जनता पार्टी (भाजपा) का पूर्वप्रवक्ता नूपुर शर्माको समर्थन गर्दै पोस्ट गरेका थिए । शर्माले गत महिना पैगम्बर मोहम्मदबारे विवादास्पद अभिव्यक्ति दिएकी थिइन् । शर्माको टिप्पणीपछि दर्जनौं इस्लाम देश र भारतबीच कूटनीतिक विवाद निम्तिएको थियो । कतिपय देशले कूटनीतिक विरोध जनाएपछि भाजपाले शर्मालाई पार्टीबाट निलम्बन गरेको थियो । शर्माको अभिव्यक्तिपछि भारतमा धार्मिक प्रदर्शनहरू भएका थिए । विरोधका क्रममा सार्वजनिक सम्पत्तिमा तोडफोड गरिनुका साथै हिंसा भड्केको थियो ।

हत्या हुनुभन्दा तीन साताअघि धार्मिक भावनामाथि आघात पुर्‍याएको आरोपमा प्रहरीले कन्हैयालाई पक्राउ गरेको थियो । रिहा भएलगत्तै भने कन्हैयाले आफूलाई ज्यान मार्ने धम्की आएको भन्दै प्रहरीसँग सुरक्षा माग गरेका थिए । प्रहरीले केही हिन्दु र मुस्लिम अगुवाहरूसँग बैठक गरी शान्ति कायम गर्ने प्रयास गरेको थियो । एक प्रहरी अधिकारीका अनुसार बैठकपछि कन्हैयाले तत्काल कसैलाई कारबाही गर्न आवश्यक नभएको बताएका थिए ।

कन्हैयाको हत्याको भारतका प्रमुख राजनीतिक नेताहरूले भर्त्सना गरेका छन् । भाजपा नेतृ तथा राजस्थानकी पूर्वमुख्यमन्त्री बसुन्धरा राजेले घटनाप्रति कंग्रेस पार्टी जिम्मेवार रहेको दोष लगाएकी छन् । हत्याको विरोधमा भाजपाका नेताहरूले भारतीय राजधानी नयाँदिल्लीमा र्‍याली गर्ने बताएका छन् ।

कंग्रेस नेता राहुल गान्धीले कन्हैयाको हत्याले आफू स्तब्ध भएको जनाएका छन् । आक्रमणकारीलाई तत्काल कारबाही गरिनुपर्ने उनको माग छ । कपितय मुस्लिम संस्थाहरूले पनि हत्याको भर्त्सना गरेका छन् ।

अल इन्डिया मुस्लिम पर्सनल ल बोर्डले घटनाप्रति निन्दा गर्दै भारतीय कानुन र इस्लाम धर्मग्रन्थविरुद्धको कार्य भएको जनाएको छ । ‘कानुन हातमा लिन कसैलाई पनि छुट छैन । कसैको हत्या गर्ने काम भर्त्सनायोग्य कार्य हो,’ बोर्डद्वारा जारी विज्ञप्तिमा उल्लेख छ ।

एआईएमआईएम पार्टीका प्रमुख असदुद्दीन ओवैसीले घटनाको कडा निन्दा गर्दै भनेका छन्, ‘उदयीपुरमा भएको क्रूर हत्या निन्दनीय छ । यस्तो हत्याको कसैले पनि समर्थन गर्न सक्दैन । हाम्रो पार्टीले सधैं यस्तो हिंसाको विरोधमा रहेको छ । कसैलाई पनि कानुन हातमा लिने अधिकार छैन ।’ उनले विधिको शासन कायम राख्न र अपराधीलाई कडा सजाय दिन सरकारसँग माग गरेका छन् ।

जम्मू–कश्मीरका पूर्वमुख्यमन्त्री

ओमार अब्दुल्लाहले पनि घटनाको निन्दा गर्दै कुनै पनि सभ्य समाजमा यस्ता घटनालाई स्थान दिन नहुने बताएका छन् । घटनाबारे अनुसन्धान गरी दोषीलाई कडा कारबाही गरिनुपर्ने उनको भनाइ छ ।

त्यस्तै पूर्वक्रिकेटर इरफान पठानले घटनाको निन्दा गर्दै लेखेका छन्, ‘तपाईं कुन धर्म मान्नुहुन्छ, त्यसले केही फरक पर्दैन । एक निर्दोषको ज्यान लिनु भनेको पूरै मानवतालाई क्षति पुर्‍याउनु हो ।’

प्रकाशित : असार १६, २०७९ ०७:२८
प्रतिक्रिया
पठाउनुहोस्

बदलिँदै छ अस्ट्रेलिया

अस्ट्रेलिया बहुसांस्कृतिक मुलुक बन्दै, कुनै धर्म नमान्ने जनसंख्या ४० प्रतिशत, हिन्दु र इस्लाम धर्म मान्नेको संख्या बढ्दै
नारायण खड्का

अस्ट्रेलिया — अस्ट्रेलियाले ५ वर्षपछि मंगलबार राष्ट्रिय जनगणनाको नतिजा सार्वजनिक गर्‍यो । जनगणनामार्फत अस्ट्रेलियाले आफ्नो देशको जनसंख्या करिब २ करोड ६० लाख रहेको तथ्यांक मात्र दिएन कि परम्परागत शैली बदल्दै गएको विवरणसमेत सार्वजनिक गर्‍यो ।

अस्ट्रेलियाले सफल बहुसांस्कृतिक राष्ट्रका रूपमा विकसित हुँदै गएको आफ्नो परिचयलाई मंगलबार निकालेको जनगणनाको विवरणपछि पुष्टि गर्‍यो । त्यसका साथै कोरोना भाइरसको संक्रमणपछि पनि आर्थिक क्षेत्रमा पाएको सफलता, सामान्य कामदारको औसत साताको आम्दानी, झन्डै ४० प्रतिशत जनता नास्तिक रहनु, २ सय ५० बढी वंशज तथा पुर्खाको सूचनालाई समावेश गरिनु र ३ सय ५० भाषालाई जनगणनामा समेटेर अस्ट्रेलियाले विविधताको परिचय दिएको हो ।

धर्मप्रति आस्था राख्ने कम हुनु, आदिवासीको संख्यामा वृद्धि हुनु, विविधता थपिनुलगायत विषयका अस्ट्रेलिया परिवर्तन हुँदै गएको देखिएको बीबीसीले जनाएको छ । त्यसबाहेक पनि धेरै कुराले अस्ट्रेलियालाई अन्य विभिन्न मुलुकका तुलनामा पृथक बनाएको छ । कुनै पनि धर्मविशेषलाई प्राथमिकता नदिने भए पनि क्रिस्चियन धर्म अपनाउने कम हुँदै गएका छन् भने हिन्दु तथा इस्लाम धर्म मान्ने जनसंख्या बढ्दै गएको छ । अझ रोचक त अस्ट्रेलियाका ४० प्रतिशत जनताले जनगणनामा कुनै पनि धर्म नमान्ने बताएका छन् ।

करिब १ सय २१ वर्षअघि मात्र संघीय राज्यका रूपमा उदाएको अस्ट्रेलियामा मुख्यतः आप्रवासी नै बसोबास गर्दै आएका छन् । विशेषगरी गोरो छालाका नागरिकको बाहुल्य रहेको भए पनि आगामी वर्षहरूमा त्यो कमजोर हुने देखिएको छ । यस वर्षको मतगणना हेर्ने हो भने यहाँ रहेका आधा अभिभावक विदेशमा जन्मिएका छन् भने एक चौथाइभन्दा बढी जनसंख्या विदेशमा जन्मिएका छन् । अस्ट्रेलियामा आप्रवासीले आफ्नो संख्या बढाउनु मात्र हैन कि त्यससँगै आफ्नो भाषा तथा धर्मलाई समेत सँगसँगै प्रभावकारी रूपमा अघि बढाइरहेका छन् । तथ्यांक हेर्ने हो भने पनि चीनको मुख्य भाषा मन्डारिन अंग्रेजीपछिको दोस्रो भाषा बनेको छ भने झन्डै ३ लाख ७० हजार अरबिक भाषी बसोबास गर्छन् भने २ लाख ४० हजारले पन्जाबी बोल्ने गरेका छन् । कोरोना भाइरसका कारण झन्डै दुई वर्ष आफ्नो अन्तर्राष्ट्रिय सीमा बन्द गरेको भए पनि अस्ट्रेलियालाई १० लाख बढीले आफ्नो घरका रूपमा स्विकारे । अस्ट्रेलियाको औसत हरेक साताको आम्दानी १७ सय ४८ डलर (करिब १ लाख ४५ हजार रुपैयाँ) छ । जसमा पनि पुरुषले २ हजार २५ डलर र महिलाले १८ सय डलर कमाउँछन् । यसले अस्ट्रेलियामा अहिले पनि तलबमा लैंगिक विभेद भने अहिले पनि कायम रहेको देखाएको छ । कोरोनाका कारण अर्थतन्त्रमा नराम्रो असर परेको भए पनि बेरोजगार दर दशकौंको कम अर्थात् ३.९ प्रतिशतमा अस्ट्रेलियाले कायम राख्यो ।

अत्यन्तै राम्रो स्वास्थ्य संरचना र सुविधा भए पनि यहाँका ८० लाख बढी जनता दीर्घरोगका कारण पीडित छन् जसमध्ये करिब २२ लाख जनता मानसिक रोगका कारण पीडित छन् । अर्कोतिर अस्ट्रेलियाले आदिवासीलाई अत्यन्तै महत्त्व मात्र दिने गरेको छैन कि सेवा तथा सुविधासमेत तुलनात्मक रूपमा अलि बढी दिने गरेको छ । यस पटकको जनगणनामा ५ वर्षअघिको भन्दा २५ प्रतिशतले आदिवासीको जनसंख्या बढेको तथ्यांक छ । करिब १६ प्रतिशत अस्ट्रेलियाली जनता एकल परिवारका रूपमा बस्ने गरेका छन्, जुन संख्या करिब १० लाख ७० हजार हो । विश्वमै घर खरिद गर्नका लागि कठिन देश बन्दै गए पनि ६६ प्रतिशतले आफ्नै घरमा बस्छन् तर पनि घर सम्पूर्ण रूपमा खरिद गर्ने नागरिक भने जम्मा ३० प्रतिशत मात्र रहेका छन् । अस्ट्रेलियाको तथ्यांक विभागका सहायक तथ्यांकविद् थेरेसा डिकिन्सनले हालै सार्वजनिक तथ्यांक महत्त्वपूर्ण भएको बताएकी छन् ।

अस्ट्रेलिया विकसित मुलुक मात्र नभएर विश्वकै सफल बहुसांस्कृतिक देशका रूपमा चिनिन्छ । यहाँको राज्य तथा केन्द्र सरकारले विभिन्न धर्म तथा कलासंस्कृतिका समुदायले गर्ने कार्यक्रमलाई सहयोगसमेत गर्ने गरेको छ । ५ वर्ष लगाएर तयार गरिएको र गत मंगलबार सार्वजनिक जनगणनाले अस्ट्रेलियाले आप्रवासी, उनीहरूको कलासंस्कृति, भाषा, धर्मले बहुसांस्कृतिक पहिचानलाई अझ बढाउने मात्र नभएर त्यस्ता परिवर्तनले देश विकास हुने प्रमाणसमेत दिएको छ ।

*यसअघि प्रकाशित जनसंख्याको तथ्यांक त्रुटि भएकोमा क्षमयाचनासहित सच्याइएको छ ।- सम्पादक

प्रकाशित : असार १६, २०७९ ०७:२६
पूरा पढ्नुहोस्
प्रतिक्रिया
पठाउनुहोस्
×