टेक्ससमा ट्रकभित्र मृत भेटिएकामध्ये २२ जना मेक्सिकन भएको पुष्टि- विश्व - कान्तिपुर समाचार
कान्तिपुर वेबसाईट
AdvertisementAdvertisement

टेक्ससमा ट्रकभित्र मृत भेटिएकामध्ये २२ जना मेक्सिकन भएको पुष्टि

कान्तिपुर संवाददाता

काठमाडौँ — मेक्सिकोका राष्ट्रपति आन्ड्रेस म्यानुएल लोपेस ओब्राडोरले अमेरिकाको टेक्ससस्थित सान एन्टोनियोमा ट्रकभित्र मृत भेटिएकामध्ये कम्तीमा २२ जना आफ्ना नागरिक भएको बताएका छन् । मंगलबार पत्रकार सम्मेलन गर्दै उनले मृत्यु भएकामध्ये कम्तीमा २२ जना मेक्सिकोका नागरिक भएको बताएका हुन् ।

उनले जम्मा ५० जना मृत भेटिएकोसमेत बताएका छन् । तर सीएनएन, बीबीसी, गार्जियनलगायतका अन्तर्राष्ट्रिय सञ्चारमाध्यमले ४६ जनाको मृत्यु भएको बताएका छन् । मृत्यु भएका सबै गैरकानुनी रूपमा अमेरिका छिर्न खोज्ने आप्रवासी भएको बताइएको छ । गर्मीका कारण 'हिट स्ट्रोक'बाट उनीहरूको मृत्यु भएको हुन सक्ने अनुमान गरिएको छ ।

त्यस्तै मेक्सिकोका विदेशमन्त्री मार्सेलो एबर्रार्डका अनुसार ग्वाटेमालाका ७ जना, २ जना होन्डुरसका नागरिक रहेका छन् । त्यस्तै अन्य मृतकको भने पहिचान हुन बाँकी रहेको उनले जानकारी दिएका छन् । उनले ट्विटरमा घटनाबारे जानकारी दिँदै भनेका छन्, 'अमेरिकी अधिकारीहरूबाट प्राप्त जानकारीअनुसार ५० जनाको मृत्यु भएको छ । त्यसमध्ये २२ मेक्सिकन, ७ ग्वाटेमालाका र २ जना होन्डुरसका रहेका छन् । अरुको पहिचान हुन बाँकी छ । हामी शोकमा छौँ । यो ठूलो क्षति हो । घटनाको अनुसन्धानका लागि हामी अमेरिकालाई सहयोग गर्छौं ।'

ट्रकबाट ४ जना बालबालिकासहित १६ जनालाई जीवितै उद्धार गरी अस्पताल भर्ना गरिएको छ । उनीहरू गर्मीबाट थकित र हिट स्ट्रोक भएको अवस्थामा भेटिएको समेत अन्तर्राष्ट्रिय सञ्चारमाध्यमले जनाएका छन् । यसअघि मेक्सिकोका विदेशमन्त्री मार्सेलो एबर्रार्डले अस्पताल लगिएकामध्ये २ जना ग्वाटेमालाका नागरिक भएको बताएका थिए ।

गैरकानुनी रूपमा अमेरिका छिर्ने आप्रवासीहरू मेक्सिकोको बाटो रोज्ने गरेका छन् । उनीहरू एजेन्टको सहारामा जोखिम मोल्दै अमेरिका छिर्ने गरेका छन् । यही विषयले अमेरिका र मेक्सिकोबीचको सम्बन्धसमेत चिसिने गरेको छ । यसअघि पनि सन् २०१७ मा पनि सान एन्टोनियोको वालमार्टमा एउटा ट्रकमा १० जनाको शव भेटिएको र सन् २००३ मा पनि सान एन्टोनियोकै दक्षिणी क्षेत्र स्वेल्टरिङमा १९ जना मृत फेला परेका थिए ।

सम्बन्धित समाचार

प्रकाशित : असार १४, २०७९ १९:२७
प्रतिक्रिया
पठाउनुहोस्

खाद्यले भन्यो : डीएफटीक्यूसी जार/बोत्तलको पानी मात्रै प्रयोग गर्नू 

कान्तिपुर संवाददाता

काठमाडौँ — खाद्य प्रविधि तथा गुण नियन्त्रण विभागले प्रशोधित पिउने पानीको बोत्तल  र जारको लेबलमा डीएफटीक्यूसी नम्बर हेरेर मात्रै उपभोग गर्न आग्रह गरेको छ । विभागले अनुमति दिएका जार र बाेत्तलकाे लेबलमा डीएफटीक्यूसी नम्बर उल्लेख गरिएको हुन्छ । वर्षायाममा झाडापखाला रोगका विभिन्न हानीकारक शुक्ष्म जीवाणुहरुको संक्रमण बढ्ने र त्यस्तो पानीको प्रयोगबाट रोगको संक्रमण सम्भावना रहेको जनाउँदै विभागले डीएफटिक्यूसी नम्बर हेरेर मात्रै पानी उपभोग गर्न अनुरोध गरेको हो ।

त्यस्तै बिर्को शिलन्बन्दी भएको पिउने पानी उपभोग गर्न विभागले आग्रह गरेको छ । ‘दुषित पानीको प्रयोगले रोगको संक्रमण हुने सम्भवना छ, स्वच्छ तथा सफा पानीको प्रयोग गर्न सबैमा अनुरोध गर्दछाैं,’ विभागले मंगलबार जारी गरेको विज्ञप्तिमा भनिएको छ, ‘प्रशोधित पिउने पानी उत्पादन तथा बिक्री वितरण गर्न प्रशोधित पिउने पानी उत्पादन सम्बन्धी निर्देशिका २०७४ बमोजिम प्रावधानहरु पुरा गरी खाद्य ऐन नियम अनुसार अनुज्ञापत्र लिई नवीकरण अद्यावधिक गरेर उत्पादन र बिक्री गर्न उद्योगीलाई सूचित गरेका छौं । अन्यथा खाद्य ऐन नियम अनुसार कारबाही हुन्छ ।’

विभागले खाद्य अनुज्ञापत्र नलिई उत्पादन बिक्री गरेको जानकारी भए विभाग वा मातहतका कार्यलयमा सूचना उपलब्ध गराई दिन समेत आग्रह गरेको छ । उपत्यकामा हैजा देखिएपछि खाद्य प्रविधिले पानीमा निगरानी बढाएको छ । हैजाको बिरानी बढ्न थालेपछि विज्ञहरुले पानी र खानेकुरामा विशेष सावधानी अपनाउन आग्रह गरिरहेका छन् । सोही क्रममा विभागले पनि सूचना प्रकाशित गरेर विभिन्न मापदण्ड अपनाएर मात्रै पानी उत्पादन गर्न उद्योगीहरुलाई निर्देशन दिएको छ । विभागका महानिर्देशक मतिना जोशी बैद्यले पानी उद्योगमा अनुगमन तीब्र बनाइएको बताइन् । ‘पानी क्षेत्रमा अनुगमन बढाएका छौं,’ उनले भनिन्, ‘गुणस्तरमा खेलवाड देखिए कानुन बमोजिम कारबाही हुन्छ ।’

प्रकाशित : असार १४, २०७९ १९:२५
पूरा पढ्नुहोस्
प्रतिक्रिया
पठाउनुहोस्
×