फ्रान्समा बढ्दै कोरोना संक्रमित
काठमाडौँ — फ्रान्स सरकारले कोरोना संक्रमण नियन्त्रणका लागि लगाएको प्रतिबन्धहरू सोमबारबाट हटाउने तयारी गरिरहेकै बेला संक्रमितको संख्या बढ्न थालेको छ । फ्रान्समा केहि हप्तायता कोरोनाका संक्रमितको संख्यामा कमी आउन थालेपछि सरकारले लगाएका प्रतिबन्धहरू सोमबारबाट हटाउने तयारी गरिरहेको थियो । तर‚ कोभिड संक्रमण पुनः बढ्दै गएको फ्रान्सको सार्वजनिक स्वास्थ्य निकायले जनाएको छ ।
शुक्रबार एकै दिन फ्रान्समा ७३ हजारभन्दा बढीमा कोरोना संक्रमण देखिएको छ । तर‚ अघिल्लो हप्ता प्रतिदिन संक्रमितको संख्या ६० हजार थियो । फ्रान्सस्थित स्वास्थ्य निकायका अनुसार यो हप्तादेखि नयाँ संक्रमितको संख्या हप्तामा २० प्रतिशतको दरले बढेको छ । संक्रमणदर फेरि उकालो लागिरहेका बेला स्वास्थ्य प्रतिबन्धहरू हटाउने सरकारको तयारीप्रति स्वास्थ्यकर्मीहरूले चिन्ता व्यक्त गरेका छन् ।
युक्रेनमा युद्ध भएकाले धेरै आवतजावत बढेको, जाडो बिदापछि स्कूल खुलेकाले शैक्षिक क्षेत्रमा अभिभावक विद्यार्थी र शिक्षक जम्मा भएको र फ्रान्समा राष्ट्रपतिको निर्वाचन नजिकिएकाले राजनीतिक भिड जम्मा हुनुलाई स्वास्थ्यकर्मीहरूले कोरोना संक्रमणको कारण मानेका छन् ।
हाल फ्रान्समा कोरोनाका विभिन्न स्वरुपमध्ये ओमिक्रोनको फैलावट अन्यभन्दा ३० प्रतिशत बढी रहेको स्वास्थ्य सेवा निकायले जनाएको छ ।त्यसो त, पछिल्लो समयमा जर्मनी, बेलायत र नेदरल्यान्ड्समा पनि कोरोना संक्रमण बढेको फ्रान्सेली सञ्चार माध्यमहरूले उल्लेख गरेका छन् ।
प्रकाशित : फाल्गुन २९, २०७८ १९:२१
