कोभिड खोप पासविरुद्ध युरोपका विभिन्न सहरमा विरोध प्रदर्शन- विश्व - कान्तिपुर समाचार

कोभिड खोप पासविरुद्ध युरोपका विभिन्न सहरमा विरोध प्रदर्शन

ददी सापकोटा

काठमाडौँ — कोरोना भाइरस महामारी अन्त्य गर्ने आशामा सरकारले लगाएको खोप पास र अन्य नियमहरूको विरोधमा शनिबार हजारौं मानिसहरूले युरोपेली राजधानीहरूमा प्रदर्शन गरेका छन् ।

ग्रीसको एथेन्स, फिनल्यान्डको हेलसिन्की, बेलायतको लन्डन, फ्रान्सको पेरिस, लियोँ र मार्सेई, नेदरल्यान्ड्सको आम्टरडम, स्विडेनको स्टकहोम, स्विजरल्यान्डको बर्न, बेल्जियमको ब्रसेल्स लगायतका शहरमा खोप पासविरोधी प्रदर्शनहरू भएका छन् ।

पेरिसमा मार्चले सयौं प्रदर्शनकारीहरूलाई आकर्षित गरेको छ । उनीहरूले सोमबारदेखि जारी गरिएको नयाँ कोभिड-१९ पासको परिचयको विरोध गरेका हुन् । घरेलु उडान, खेलकुद कार्यक्रम, बार, सिनेमा घर र अन्य मनोरञ्जन स्थलहरूमा प्रतिबन्ध लगाउँदा खोप लिन अस्वीकार गर्नेहरूको जीवनलाई गम्भीर रूपमा प्रतिबन्धित गरेको आरोप प्रदर्शनकारीले लगाएका छन् ।

फ्रान्सेली मिडियाका अनुसार प्रदर्शनकारीहरूले लियों, मार्सेई, बोर्दो, लिल लगायतका अन्य शहरहरूमा पनि सयौंको संख्यामा प्रदर्शन गरेका थिए ।

त्यस्तै, स्विडेनको स्टकहोल्म शहरस्थित मध्यभागमा खोप पासको विरोध गर्दै मार्च पास गरिएको छ । 'फ्रिडम मुभमेन्ट'द्वारा आयोजित खोप पासविरुद्धको प्रदर्शनका लागि प्रदर्शनकारीहरू विभिन्न सहरका मुख्य चोकमा भेला भएका थिए । स्विडेनमा ५० भन्दा बढी व्यक्तिहरू इन्डोर कार्यक्रमहरूमा भाग लिन खोप लगाएको प्रमाणपत्र आवश्यक पर्दछ । प्रदर्शनकारीहरूले यसको तीव्र रुपमा विरोध गरेका छन् ।

फ्रान्सेली मिडियाले रिपोर्ट गरेअनुसार नाजी समर्थक 'नव-नाजी नोर्डिक प्रतिरोध आन्दोलन' का प्रतिनिधिहरूले ब्यानरसहित प्रदर्शनमा भाग लिएका थिए । नाजीका समर्थकहरुले विगतमा स्विडेनमा हिंसात्मक घटनाहरू गराएकाले प्रदर्शनमा त्यस समूहलाई प्रहरीले नजिकबाट निगरानी गरेको जनाइएको छ ।

स्वीडेनको दोस्रो ठूलो सहर गोटेबोर्गमा पनि खोप पासविरोधी प्रदर्शन भएको छ ।

फिनल्यान्डको प्रहरीलाई उद्धृत गर्दै फ्रान्सेली मिडियाहरूले जनाएअनुसार शनिबार झन्डै ४ हजार मानिसले राजधानी हेलसिङ्कीको मध्य भागस्थित बिच सडकमै विरोध प्रदर्शन गरेका थिए । 'वर्ल्ड वाइड डेमोन्स्ट्रेसन' नामक समूहले उक्त प्रदर्शन आयोजना गरेको थियो ।

फिनिस सरकारले प्रतिबन्धहरूमा कार्यक्रमहरू सीमित गर्ने वा केहि निषेध गर्ने, विश्वविद्यालयका कक्षाहरू अनलाइनमार्फत गर्ने, रेस्टुरेन्ट सेवा सीमित गर्ने र मानिसहरूलाई उच्च जोखिम हुने र भिडभाडयुक्त ठाउँहरू बन्द गर्ने नियम बनाएको थियो । रेस्टुरेन्ट र कार्यक्रमहरुमा प्रवेशको लागि खोप पास चाहिने बनाइएको छ ।

युरोपमा हेल्थ पास कि खोप पास ?
ओमिक्रोन भेरियन्ट युरोपमा द्रूत रूपमा फैलिँदै गर्दा हेल्थ पासलाई खोप पासमा बदल्ने कि नबदल्ने भन्नेमा युरोपेली मुलुकहरूमा मतभिन्नता देखिएको छ । फ्रान्सेली सरकारले आफ्नो कोभिड-१९ स्वास्थ्य पासलाई भ्याक्सिन पासमा रूपान्तरण गरेको छ । खोप वा रोगबाट निको भएको प्रमाण देखाउनुपर्ने नियमले कतिपय सार्वजनिक स्थानहरूमा मानिसहरूको पहुँच सीमित गरेको छ । यो प्रणाली धेरै युरोपेली देशहरूमा पहिले नै लागू गरिएको त छ तर यसले विवादहरू पनि निम्त्याएको देखिन्छ ।

फ्रान्सेली सरकारले लागू गरेको नयाँ खोप पास प्रणालीअन्तर्गत खोप वा कोभिड-१९ बाट निको भएको प्रमाण देखाउने व्यक्तिहरूले मात्र पास पाउन सक्नेछन् । यो प्रावधानलाई सरकारले गत सोमबारबाट लागू गरेको छ । जर्मनी, अस्ट्रिया र चेक गणतन्त्रलगायत धेरै युरोपेली देशहरूमा पहिले नै परीक्षण भइरहेको छ ।

अस्ट्रियाले नोभेम्बरको अन्तमा देशभरि तालाबन्दी गरेपछि कडा स्वास्थ्य उपायहरू लागू गर्‍यो । गत डिसेम्बर १२ देखि लकडाउन खुकुलो हुन थालेपछि देशव्यापी रुपमा टूजी नियम लागू भएको छ । खोप लगाएका वा गत ६ महिनायता निको भएका व्यक्तिहरूले मात्र रेस्टुरेन्ट, होटल, पसल, सामुदायिक केन्द्रहरू र खेलकुद हलहरूमा प्रवेश गर्न सक्छन् ।

इस्टोनिया, लातभिया, चेक गणतन्त्र, आयरल्याण्ड र माल्टा लगायत धेरै युरोपेली देशहरूले राष्ट्रिय खोप पासको बाटो रोजेका छन् । तर‚ खोप पास लिने उमेर माल्टा र इस्टोनियामा १२ वर्ष, अस्ट्रियामा १५, फ्रान्स र जर्मनीमा १८ वर्षा छ भने केहि देशले १२ वर्षको उमेरबाट नै यो आवश्यक बनाएका छन् ।

बालबालिकालाई खोप
फ्रान्सले डिसेम्बर २२ मा ५ देखि ११ वर्षका बालबालिकाहरूलाई खोप दिन थालेको थियो । फ्रान्सको सार्वजनिक स्वास्थ्य सेवाका अनुसार फ्रान्सको ५ देखि ११ वर्षका ५८ लाख योग्य बालबालिकाको जनसंख्याको एक दशमलब आठ प्रतिशतले पहिलो मात्रा पाएका छन् । हालसम्म शून्य दशमलव चार प्रतिशतले मात्रै पूर्ण खोप लगाएका छन् । फ्रान्सेली स्वास्थ्य मन्त्रालयको तथ्याङ्कअनुसार लगभग एक लाख ७५ हजार बालबालिकाले पहिलो खोप लगाएका छन् ।

इटालीका ५ देखि ११ वर्ष उमेर समूहका ३६ लाख मध्ये २६ प्रतिशतले एक मात्रा र ६ दशमलव ४५ प्रतिशतले दुई मात्रा पाएका छन् । स्पेनले मंगलबारसम्म आफ्ना ३४ लाख बालबालिकामध्ये ४५ प्रतिशतलाई एक मात्रा दिएको थियो ।

त्यस्तै पोर्चुगलले ६ लाखभन्दा बढी योग्य युवाहरूलाई खोप लगाएको छ । आयरल्यान्डले आफ्ना चार लाख ८० हजार बालबालिकामध्ये १० प्रतिशतभन्दा बढीलाई खोप लगाएको छ ।

प्रकाशित : माघ ९, २०७८ ०९:५८
प्रतिक्रिया
पठाउनुहोस्

जर्मनीका विभिन्‍न सहरमा कोभिड नियमविरुद्ध हजारौंको विरोध प्रदर्शन

ददी सापकोटा

पेरिस — जर्मनीको ह्याम्बर्ग र डसेलडोर्फलगायतका धेरै प्रमुख सहरहरूमा हजारौं मानिसहरूले सरकारले लगाएको कोरोना भाइरस नियमहरू विरुद्ध शनिबार प्रदर्शन गरेका छन् । महामारी अस्वीकार गर्नेहरूद्वारा भाइरस-सम्बन्धित नियमहरूसँग बढ्दो असन्तुष्टि देखिएको छ । क्रिसमसको मुखैमा अनावश्यक तरिकाले कोरोना भाइरस नियन्त्रणका नाममा नियमहरु लादेको भन्दै जर्मनीमा हजारौं प्रदर्शनकारीहरू सरकारी कोरोना भाइरस उपायहरूको विरोध गर्न सडकमा उत्रिएका हुन् ।

खासगरी खोप र जर्मन सरकारको कोरोना भाइरस नीतिहरूका विरोधीहरूले शनिबार धेरै जर्मन सहरहरूमा प्रदर्शन गरेका छन् । जर्मन सञ्चारमाध्यमहरुका अनुसार उत्तरी बन्दरगाह सहर ह्याम्बर्गमा हजारौं मानिसहरू सडकमा उत्रिएका थिए । त्यसपछि सहरको केन्द्र हुँदै धेरै चोकहरूमा मार्च गरेका छन् ।

जर्मन प्रहरीले लगभग ८ हजार सहभागीहरू दर्ता भएको उल्लेख गरेको छ । तर प्रदर्शनी आयोजकहरुले लाखौं मानिसले भाग लिएको दाबी गरेका छन् । "अनिवार्य खोप चाहिंदैन !, हाम्रा बालबालिकाको हात नबाँधियोस्, स्वतन्त्र हुन पाउनुपर्छ, हाम्रा बालबालिका तिम्रा हिरो होइनन् फाइजर" प्रदर्शनकारीहरुले जर्मन भाषामा लेखिएका प्लेकार्डहरू बोकेका थिए ।

डुसेलडोर्फको पश्चिमी सहरमा प्रहरीले अनुमानित ४ हजार प्रदर्शनकारीहरू सहरको केन्द्र हुँदै मार्च गरेको बताइएको छ । करिब एक हजार व्यक्तिले प्रहरीमा आफ्नो नाम दर्ता गराएका थिए । कोरोना भाइरसको नियमविरुद्ध प्रदर्शनीमा भाग लिनेका विरुद्ध पनि करिब दुई सय जनाले विरोध गरेको प्रहरीले उल्लेख गरेको छ ।

देशको शीर्ष खोप निकायले गरेको सिफारिसहरूलाई मान्यता दिँदै जर्मनीमा बालबालिकाका लागि खोपहरू सुरु गरिंदै छ । तर, अभिभावकहरू यस विषयमा विभाजित छन् । कोहि खोपका पक्षमा छन् भने कतिपय अभिभावकले यसको विरोध गरेका छन् । सरकारले अनिवार्य खोप नीति लागू गर्ने चर्चा चलेपछि खोप विरोधीहरुसमेत यो नितिका विरुद्ध उत्रिएका छन् ।फ्रान्कफर्ट एम मेनको वित्तीय केन्द्रका साथै दक्षिणपश्चिमी सहर कार्लस्रुहे र फ्राइबर्गमा पनि प्रदर्शनहरू भएका थिए ।

प्रहरीले करिब ३५ सय मानिसहरूले फ्राइबर्गको बीचमा नारा जुलुस गरेको उल्लेख गरेको छ । जुलुसमा सहभागीहरुले अनिवार्य गरिएको मास्क नलगाएका हुनाले उनीहरुले साना साना समूहमा जुलुस निकालेका थिए ।

अर्को सहर कार्लस्रुहेमा करिब ९०० मानिसहरू सडकमा उत्रिएका थिए । उनीहरुले विशेष गरी नर्स र अन्य स्वास्थ्यकर्मीहरूलाई अनिवार्य खोपको विरोध गरेका थिए । ओस्नाब्रुक, लोअर स्याक्सनीमा पनि मानिसहरूले "आधारभूत अधिकारहरुका विषयमा वार्ता हुन्न" भन्दै नारा लगाएका थिए ।

उत्तरी राज्य मेक्लेनबर्ग-भोर्पोमेर्नको राजधानी श्वेरिनमा प्रतिबन्धको विरूद्ध भएको प्रदर्शनमा करिब १ हजार ९ सय मानिसहरू सहभागी भएको भनाइ प्रहरीको छ । प्रदर्शनकारीहरूले सहरको केन्द्र हुँदै शान्तिपूर्ण र्‍याली गरेको बताइएको छ ।

सामाजिक एकताको लागि आह्वान

केन्द्रीय राज्य थुरिंगियाको ग्रीज सहरका संस्थाहरूले जारी विरोधको सामना गर्नुपर्ने भन्दै सामाजिक एकता र सम्मानको लागि संयुक्त आह्वान गरेका छन् । जर्मनीमा स्वास्थ्य नियम लागू भएसँगै हरेक हप्ता जस्तै विरोध प्रदर्शनहरु हुँदै आएका छन् । गत शनिबार साँझ आयोजना गरिएको यस्तै विरोध कार्यक्रममा १४ प्रहरी अधिकारीहरू घाइते भएको डीडब्ल्यू न्युजले उल्लेख गरेको छ ।

यसैबीच, बर्लिनका अधिकारीहरूले प्रदर्शनमा प्रतिबन्ध लगाएका छन् । प्रदर्शनकारीहरूले मास्क लगाउने र सामाजिक दूरी कायम गर्ने लगायतका कोरोना भाइरस नियमहरू उल्लंघन गरेको भन्दै प्रतिबन्ध लगाउनुपरेको दाबी गरेको छ । तर, प्रहरीको निषेधाज्ञालाई तोड्दै जर्मनीमा धेरै पटक प्रदर्शन र भेलाहरु हुँदै आएका छन् ।

पूर्वी जर्मन राज्य सक्सोनीमा 'क्वेर्डेनकर' समूहले आयोजना गरेको प्रदर्शन प्रहरीले बन्द गरिदिएको छ । तर मानिसहरूले ड्रेसडेन सहरका धेरै भागहरूमा प्रदर्शन गरेका छन् । ब्रान्डेनबर्ग राज्यको राथेनोमा करिब ३६० प्रहरी अधिकारीहरूले मास्क लगाउनुपर्ने नियम तोडेको भन्दै शुक्रवार साँझ विरोध प्रदर्शन रोकिदिएका थिए ।

जर्मनीमा युरोपेली योजना अनुसार तुलनात्मक रूपमा खोप लगाउनेको दर कम छ । कुल जनसंख्याको ७० प्रतिशतले मात्र भाइरस विरुद्ध खोप लगाएको छ । यसमा दुबै मात्रा लगाउनेहरुको संख्या अझै कम रहेको बताइन्छ । जर्मनीमा महामारी सुरु भएदेखि करिब ६० लाख ७६ हजारमा कोरोना संक्रमित भैसकेको छ । करिब एक लाख आठ हजारको कोरोनाकै कारण मृत्यु भइसकेको छ ।

प्रकाशित : पुस ४, २०७८ ०७:४६
पूरा पढ्नुहोस्
प्रतिक्रिया
पठाउनुहोस्
×