धरापमा जोन्सनको राजनीति- विश्व - कान्तिपुर समाचार
कान्तिपुर वेबसाईट
AdvertisementAdvertisement

धरापमा जोन्सनको राजनीति

बेलायतमा पहिलो लकडाउन भएका बेला प्रधानमन्त्री कार्यालयमा मदिरा पार्टी गरेको समाचार बाहिरिएपछि राजीनामा दिन पार्टीभित्रबाटै दबाब
नवीन पोखरेल

लन्डन — बेलायती प्रधानमन्त्री बोरिस जोन्सन फेरि विवादमा तानिएका छन् । कोभिड–१९ का कारण गरिएको लकडाउनका बेला सन् २०२० मे २० मा प्रधानमन्त्री कार्यालय डाउनिङ स्ट्रिट गार्डेनमा आयोजित मदिरा पार्टीमा सहभागी भएको समाचार बाहिरिएसँगै उनी विवादमा तानिएका हुन् ।

बेलायती सञ्चारमाध्यमका अनुसार प्रधानमन्त्री जोन्सन करिब २५ मिनेट पार्टीमा बसेका थिए । प्रधानमन्त्रीले उक्त जमघट कामकै लागि भएको र महामारीका बेला कडा परिश्रम गरेका कर्मचारीलाई धन्यवाद दिन गरिएको भन्दै प्रतिवाद गरेका छन् । प्रधानमन्त्रीले लकडाउन उल्लंघन गर्दा आमनागरिकमा देखिएको आक्रोश आफूले बुझेको भन्दै बुधबार बेलायती संसद् ‘हाउस अफ कमन्स’ मा क्षमा मागे पनि यो मुद्दा सजिलै पार लाग्ने देखिएको छैन । सत्तारूढ टोरी पार्टीकै वरिष्ठ नेताहरूले राजीनामा मागेपछि प्रधानमन्त्री जोन्सन यतिखेर चौतर्फी घेराबन्दीमा परेका छन् ।

स्कटिस टोरी नेता डग्लस रोस, सांसदहरू विलियम रेग, क्यारोलिन नोक्स, रोजर गेललगायतले जोन्सनलाई पद छाड्न भनेका बीबीसीले उल्लेख गरेको छ । नेता रोसले जोन्सनसँग आफूले गरेको ‘वार्ता असहज मोडमा पुगेको’ बताएका छन् । उनले टोरी नेतृत्व छान्ने ‘१९२२ कमिटी’ लाई पत्र लेखेर जोन्सनलाई प्रधानमन्त्रीमा समर्थन नगर्न आग्रह गर्ने जनाइसकेका छन् ।

‘उनी (जोन्सन) प्रधानमन्त्री हुन् । उनको सरकारले ती नियम लागू गरेको हो । त्यसकारण उनले यसको जिम्मेवारी लिनुपर्छ,’ रोसको भनाइ छ । यदि ५४ जना कन्जरभेटिभ सांसदले प्रधानमन्त्रीविरुद्ध १९२२ कमिटीलाई पत्र लेखे भने यसले नेतृत्व चुनौतीका लागि प्रक्रिया अगाडि बढाउन सक्छ ।

प्रतिपक्ष दल लेबरका नेता सर किम स्टारमरले पार्टीमा जोन्सनको उपस्थिति ‘हास्यास्पद’ भन्दै राम्रो काम गर्न र राजीनामा दिन माग गरेका छन् । जोन्सनले धेरै महिनादेखि छलकपट गरेको टिप्पणी पनि स्टारमरको छ । लिबरल डेमोक्रेटिक पार्टीका नेता सर इड डेभीले पनि जोन्सनलाई बाहिरिन भनेका छन् । डेभीले मेट्रो पोलिटन प्रहरीलाई पत्र लेखेर जोन्सन सहभागी पार्टीको अनुसन्धान गर्न आग्रह गरेका छन् ।

उता स्कटिस नेसनल पार्टीका नेता इयान ब्ल्याकफोर्डले प्रधानमन्त्रीलाई पदबाट हटाउन दबाब दिन सत्तारूढ टोरी सांसदहरूलाई आग्रह गरेका छन् । मन्त्रिपरिषद् सदस्यहरूले भने छानबिन प्रतिवेदन नआइन्जेल पर्खन सांसदहरूलाई अपिल गरेका छन् ।

छानबिन प्रतिवेदनले दोषी ठहर गरे नैतिकताका आधारमा राजीनामा दिन प्रधानमन्त्रीमथि दबाब पर्ने निश्चित छ । प्रधानमन्त्री जोन्सन र विवाद पर्याय जस्तै भएको छ । यसअघि सन् २०२० को डिसेम्बरमा सिंगो देश लकडाउनमा रहेका बेला प्रधानमन्त्री कार्यालय १० डाउनिङ स्ट्रिटमा कर्मचारीहरूका लागि क्रिसमस पार्टी आयोजना गरिएको मुद्दामा पनि उनी विवादमा तानिएका थिए ।

प्रधानमन्त्रीले उक्त पार्टी आयोजना गर्दा कुनै नियम भंग नगरिएको दाबी गरेका थिए । केही साताअघि जोन्सनले नयाँ भेरिएन्ट संक्रमण नियन्त्रणका लागि कोभिड पास सम्बन्धमा आफ्नै दलका सय जना सांसदबाट संसद्मा विद्रोहको सामना गर्नुपरेको थियो ।

यसबाहेक उनकै दलका एक जना सांसद ओवेन प्याटरसनले छुट्टै पारिश्रमिक लिएर एउटा निजी कम्पनीका लागि काम गरेको सार्वजनिक भएको थियो । उनको बचाउ गर्न खोजेको भन्दै प्रधानमन्त्रीको चौतर्फी आलोचना भयो । ओवेनले पदबाट राजीनामा दिइसकेका छन् ।

महारानी एलिजाबेथ द्वितीयले शासन गरेयता बेलायतमा १४ जना प्रधानमन्त्री भइसकेका छन् । तर एकपटक प्रधानमन्त्री पदबाट बहिर्गमन भएको नेता पुनः उही पदमा भने पुगेका छैनन् ।


प्रकाशित : पुस ३०, २०७८ ०८:४१
प्रतिक्रिया
पठाउनुहोस्

श्रीमतीको हत्या गर्ने ७ वर्षपछि पक्राउ

मनोज पौडेल

कपिलवस्तु — कृष्णनगर नगरपालिका ६, स्थित श्रीनगरमा पत्नीलाई बीभत्स तरिकाले हत्या गरेर शव जलाएर फरार श्रीमान् ७ वर्षपछि पक्राउ परेका छन् ।सीमावर्ती भारतको उत्तर प्रदेश, सिद्धार्थनगर जिल्लास्थित ग्राम धन्सा घर भएका ३० वर्षे सिकन्दर भन्ने मुलायम चमारलाई प्रहरीले पक्राउ गरेको हो ।

‘७/८ महिनादेखि उनको गतिविधि सुक्ष्म रुपले ट्रयास गर्दै बसेका थियौं,’ नायब उपरीक्षक धर्मराज भण्डारीले भने, ‘लुकिछिपी नेपाल आउँदै छन् भन्ने जानकारी आयो ।’ उनीसँग नम्बर प्लेट नभएको आर वान ५ मोटरसाइकल, दुई थान मोबाइल र उत्तर प्रदेश प्रान्तीय रक्षक दल महानिर्देशनालयको परिचय पत्र बरामद गरिएको पनि प्रहरीले जनाएको छ ।

०७१ फागुन ३० गते सिकन्दर ससुराली आएका गिए । ज्वाइँ आएपछि ससुरा सुखराम चमारले सक्दो खातिरदारी गरे । खाना खुवाएर मच्छरदानी राखेर छोरी ज्वाइँलाई ओछ्यान लगाइदिएर उनी गोठमा सुत्न गए । मुलायमले राति सँगै सुतेकी श्रीमती किस्लावती चमारको हात, खुट्टा काटेर तरिकाले हत्या गरे । किस्लावतीका बाँया हात र ख्ट्टा दुवै चुँडिएका थिए । कसैले थाहा नपाउन् भनेर मुलायमले घरदेखि ३ सय मिटर टाढा रहेको झिन्कन आरखको रहरको खेतमा शव लगेर गाडे । जलाउने प्रयास पनि गरे ।

छोरी–ज्वाइँ एक्कासि हराएपछि सुखराम अत्तालिए । सोधखोज गर्न लागे । खेतबारी चहार्न थाले । अर्को दिन चैत १ गते उनलाई भारतबाट फोन आयो । ससुराली गएका ज्वाइँ त घर फर्किसके । त्यही गाउँमा बिहे भएकी उनकी जेठी छोरीले ज्वाइँ घर फर्किसकेको तर बैनी नआएको जानकारी बाबुलाई गरेकी थिइन् । त्यसपछि बाबुको मनमा चिसो पस्यो ।

फेरि खेतबारीमा खोज्न थाले । दिउँसो गाउँलेले एउटा कुकुरले मान्छेको खुट्टा लिएर गइरहेको देखे । त्यसपछि हल्ला भयो । प्रहरी गएर हेर्दा घटनास्थल फेला पर्‍र्यो । शव जलाउने प्रयास गरेर जल्न नसकेपछि माटोले पुरेर छाडिएको थियो । शव क्षतविक्षत अवस्थामा थियो । बाबुले छोरीको दाहसंस्कार गरे । आरोपी पक्राउ हुन नसक्दा घटना सामसुम रहयो ।

हत्या आरोपी सिकन्दर पक्राउ परेपछि जिल्ला प्रहरी कार्यालय आएका ससुरा सुखरामको खुटा समातेर आफूलाई बचाउन अनुनयविनय गरेको बताए । तर, यस्तो क्रुर र अमानवीय हत्यारालाई हदैसम्मको कारबाही गर्नु पर्ने माग सुखरामले गरे ।

हत्या घटनाको दुई दिनपछि सिकन्दरलाई भारतबाटै गाउँलेले नेपाल बुझाउन ल्याउँदै थिए । गाउँलेले साइकलमा ल्याउँदै थिए । बीच बाटोबाटै एक जनाको मोटसाइकल खोसेर उनी भागेका थिए । उनले विवाह गरेको दुई वर्ष मात्र भएको थियो । ‘विवाहपछि उनी भारतमै अर्कै महिलासँगको सम्बन्धमा रहेछन्,’ एसपी कार्कीले भने, ‘त्यसैकारण यहाँ उनले योजना बनाई हत्या गरे ।’ श्रीमतीको हत्यापछि मुलायमले भारतमै अर्को विवाह गरेका थिए ।

प्रकाशित : पुस ३०, २०७८ ०८:३५
पूरा पढ्नुहोस्
प्रतिक्रिया
पठाउनुहोस्
x
×