काबुलको शैक्षिक केन्द्रमा आत्मघाती बम विस्फोट : कम्तीमा १८ को मृत्यु- विश्व - कान्तिपुर समाचार

काबुलको शैक्षिक केन्द्रमा आत्मघाती बम विस्फोट : कम्तीमा १८ को मृत्यु

एजेन्सी

काबुल — अफगानिस्तानको राजधानी काबुलमा रहेको एउटा शैक्षिक केन्द्रमा गराइएको आत्मघाती बम विस्फोटमा कम्तीमा १८ जनाको मृत्यु भएको छ ।

शनिबार दिउँसो निजी रुपमा सञ्चालित शैक्षिक केन्द्रमा आत्मघाती बम विस्फोट गराइएको अफगानिस्तानको आन्तरिक मन्त्रालयले जनाएको छ । उक्त केन्द्रमा सयौँ विद्यार्थी पढ्ने गर्थे ।

विस्फोटमा परी घाइते भएकालाई अस्पताल लगिएको छ भने मृतकको संख्या अझ बढ्न सक्ने बताइएको छ । विस्फोटको जिम्मा सामाजिक सञ्जालबाट चरमपन्थी समूह इस्लामिक स्टेटले लिए पनि आधिकारिक प्रमाण भने उपलब्ध गराएको छैन ।

त्यसअघि तालिबान समूहले आक्रमणमा आफ्नो संलग्नता नरहेको बताएको थियो । अफगान आन्तरिक मन्त्रालयका अनुसार एक जना आत्मघाती आक्रमणकारी शैक्षिक केन्द्रमा पस्न खोज्दा सुरक्षा गार्डले रोकेपछि बम विस्फोट गराएका थिए ।

प्रकाशित : कार्तिक ९, २०७७ ०७:१४
प्रतिक्रिया
पठाउनुहोस्

पन्जाबसामु हैदराबाद धराशायी

एजेन्सी

दुबई — इन्डियन प्रिमियर लिग (आईपीएल) मा किंग्स इलेभेन पन्जाबले शनिबार सनराइजर्स हैदराबादलाई १२ रनले हराएको छ । ‘लो स्कोरिङ’ खेलमा हैदराबाद नाटकीय पतनको सिकार भएको थियो ।

यो जितपछि १० अंकसहित पाँचौं स्थानमा रहेको पन्जाबले प्लेअफका लागि मिहिनेत गर्न सक्नेछ । हैदराबाद भने आठ अंकमा सीमित रहेर छैटौं स्थानमा रह्यो ।

जितका लागि १ सय २७ रन पछ्याएको हैदराबाद एक समय चार विकेट गुमाएर सय रनको स्थितिमा थियो । त्यसयता १४ रनमा बाँकी ६ विकेट गुमाई १९.५ ओभरमा १ सय १४ रन बनाएर अलआउट भयो ।

हैदराबादका लागि कप्तान डेविड वार्नर र जोनी बियरस्टोले ५६ रनको साझेदारी गरेका थिए । पछि पन्जाबका लागि अश्रदीप सिंह र क्रिस जोर्डनले तीन–तीन विकेट लिए । यसअघि पन्जाबले २० ओभरमा सात विकेट गुमाएर १ सय २६ रन बनाएको थियो ।

प्रकाशित : कार्तिक ९, २०७७ ०७:१०
पूरा पढ्नुहोस्
प्रतिक्रिया
पठाउनुहोस्
×