दिल्ली सरकारको विज्ञापनमा सिक्किमलाई अलग देशका रुपमा उल्लेख गरिएपछि...- विश्व - कान्तिपुर समाचार
कान्तिपुर वेबसाईट
AdvertisementAdvertisement

दिल्ली सरकारको विज्ञापनमा सिक्किमलाई अलग देशका रुपमा उल्लेख गरिएपछि...

सुरेशराज न्यौपाने

नयाँदिल्ली — भारतको दिल्ली राज्य सरकारले बिहीबार निकालेको एउटा विज्ञापनमा सिक्किमलाई नेपाल र भुटानजस्तै बेग्लै मुलुकका रुपमा उल्लेख गरिएको विषयलाई लिएर बबाल मच्चिएको छ । दिल्ली सरकारअन्तर्गत सिभिल डिफेन्स कर्पले स्वयंसेवकका लागि विज्ञापन गरेको थियो ।

उक्त विज्ञापनमा आवेदनका लागि आवश्यक पर्ने पूर्वयोग्यतामा भारतीय नागरिक वा सिक्किम, भुटान वा नेपालको नागरिक र दिल्लीको बासिन्दा हुनुपर्ने उल्लेख थियो । विज्ञापनमा सिक्किमलाई भुटान र नेपालजस्तै बेग्लै मुलुकका रुपमा उल्लेख गरिएका कारण दिल्ली सरकारको व्यापक आलोचना भएको छ । विज्ञापनलाई लिएर विवाद चर्किँदै गएपछि दिल्ली सरकारले जिम्मेवार अधिकारीलाई निलम्बनसमेत गरेको छ ।

उक्त विज्ञापन प्रकाशित भएपछि सिक्किम सरकारले तत्काल आपत्ति जनाउँदै त्यसबाट अत्यन्त चोट पुगेको भन्दै त्यसलाई तत्काल हटाउन माग गरेको थियो । सिक्किम सरकारका मुख्यसचिव एससी गुप्ताले दिल्ली सरकारलाई पत्र लेख्दै सिक्किमका जनताले भारतीय नागरिक भएकोमा गर्व गर्ने गरेको भन्दै विज्ञापनले उनीहरुलाई अत्यन्त चोट पुगेको जनाएका थिए । ‘१६ मे १९७५ मा भारतको २२ औं राज्यका रहँदै आएका सिक्किमका जनताका जसले महान भारतको नागरिक हुनुमा गर्व गर्छन् । यो विज्ञापनले उनीहरुलाई अत्यन्त चोट पुऱ्याएको छ त्यसैले उक्त विज्ञापन फिर्ता गर्न अनुरोध गर्छौं,’ पत्रमा लेखिएको थियो । साथै सिक्किमका मुख्यमन्त्री प्रेमसिहं तामाङ (गोले)ले पनि विज्ञापनमा भएको गल्ती भत्सर्नायोग्य भएको भन्दै त्यसलाई खारेज गर्न माग गरेका थिए ।

विज्ञापनलाई लिएर विवाद सिर्जना भएपछि दिल्लीका मुख्यमन्त्री अरविन्द केजरीवालले ट्वीटमार्फत् विज्ञापनलाई हटाइएको र जिम्मेवार अधिकारीलाई निलम्बन गरिएको बताएका छन् । ‘सिक्किम भारतको अभिन्न अंग हो । यस्ता त्रुटि सहन सकिँदैन । विज्ञापन हटाइएको छ र जिम्मेवार अधिकारीमाथि कारबाही गरिएको छ,’ केजरीवालले ट्वीटमा भनेका छन् । विज्ञापनलाई लिएर दिल्लीका उपराज्यपाल अनिल बैजलले पनि ट्वीट गर्दै विज्ञापनलाई तत्कालै रोक्नुपर्ने र त्यसले भारतको भौगोलिक अखण्डताको अपमान गरेको भन्दै असन्तुष्टि व्यक्त गरेका थिए ।

साथै भारतीय जनता पार्टीले अरविन्द केजरीवाल नेतृत्वको दिल्ली सरकारले सार्वजनिक रुपमा माफी माग्नुपर्ने माग गरेको थियो । त्यसको जवाफमा केजरीवाल नेतृत्वको आम आद्मी पार्टीले दिल्ली सरकार अहिलेको कठिन परिस्थितिमा अन्य राज्यहरुसँग मिलेर काम गर्न चाहेको तर भाजपा र कांग्रेस राजनीति गर्न व्यस्त रहेको आरोप लगाएको थियो ।

प्रकाशित : जेष्ठ ११, २०७७ ११:४५
प्रतिक्रिया
पठाउनुहोस्

कोरोनाले विदेशमा ११५ नेपालीको मृत्यु, १२ हजारभन्दा बढी संक्रमित

कृष्ण ज्ञवाली

काठमाडौँ — विश्वव्यापी रूपमा फैलिएको कोरोना संक्रमणका कारण शनिबारसम्म विदेशमा रहेका १ सय १५ नेपालीको मृत्यु भएको छ । तिनमा १९ जना महिला छन् । 

गैरआवासीय नेपाली संघ (एनआरएनए)का अनुसार पछिल्लो साता मात्रै १९ नेपालीले ज्यान गुमाएका छन् । पछिल्लो साता यूएईमा ९, साउदी अरबमा ५, बेलायतमा २, अमेरिकामा १, कतारमा एक र कुवेतमा एक नेपालीको ज्यान गएको हो ।

संघको स्वास्थ्य समितिका अनुसार हालसम्म सबैभन्दा बढी बेलायतमा ६५ नेपालीको मृत्यु भएको छ । बेलायतको पनि यूएसीमा १८ नेपालीको कोरोनाले ज्यान गएको समितिका संयोजक सञ्जीव सापकोटाले जानकारी दिए । त्यस्तै अमेरिकामा मृतक नेपालीको संख्या १६ पुगेको छ ।

विदेशमा मृत्यु भएका नेपालीमध्ये आधाभन्दा बढी ५० वर्ष कटेकाहरू छन् । ५३ प्रतिशत व्यक्ति ५० देखि ९० वर्षसम्मका छन् । मृतकहरूमा ४० देखि ५० वर्षका २३ प्रतिशत र ४० वर्षभन्दा कमका १६ प्रतिशत छन् । बाँकी ८ प्रतिशतको भने उमेर नखुलेको समितिले जनाएको छ ।

संघले विदेशमा रहेका संक्रमित नेपालीको संख्या पनि निकालेको छ । १२ हजार २ सय ३६ संक्रमितमध्ये मध्यपूर्वी मुलुकमा ७२ प्रतिशत छन् । अमेरिकामा १३, युरोपमा १० र एसियाली मुलुकमा ५ प्रतिशत नेपाली संक्रमित छन् । तुलनात्मक रूपमा सुरक्षित देखिएको अस्ट्रेलियामा एक प्रतिशतभन्दा कम संक्रमित छन् । अफ्रिकी मुलुकमा रहेका नेपालीमा कोरोना संक्रमण नदेखिएको संघले जनाएको छ । ‘संक्रमितमध्ये चार हजारभन्दा बढी नेपाली निको भइसकेका छन् । उनीहरूमा भाइरस देखिएको छैन,’ सापकोटाले भने ।

संघका अनुसार अत्यधिक प्रभावित मुलुकमध्ये बेलायत र अमेरिकामा पछिल्लो साता संक्रमण दर कम हुँदै गएको छ । तर मध्यपूर्वी मुलुकमा संक्रमण बढेसँगै थप नेपाली संक्रमित हुँदै गएका छन् । रुस, रोमानिया र भारतका नेपालीमा नयाँ संक्रमण देखिएको छ ।

चीनबाट सुरु भएको संक्रमण विश्वव्यापी भएपछि संघले अध्यक्ष कुमार पन्तको संयोजकत्वमा एउटा समिति गठन गरेको थियो । स्वास्थ्य, आर्थिक, विद्यार्थी, श्रमिक, महिलालगायत उपसमितिले पीडितका लागि राहत संकलन गरिरहेका छन् । पीडितको सहयोग र राहत वितरणका लागि ४९ देशमा २ हजार १ सयभन्दा बढी स्वयंसेवक परिचालन गरिएको संघले जनाएको छ । हालसम्म ४० हजारभन्दा बढीलाई राहत वितरण गरिएको छ । ६२ हजार जनालाई परामर्श दिइएको संघले जनाएको छ । राहत कोषमा करिब आठ करोड रुपैयाँ संकलन भएको संघका कोषाध्यक्ष महेश श्रेष्ठले बताए । संघले विभिन्न १० देशका नेपालीलाई आर्थिक सहयोग गरेको हो ।


प्रकाशित : जेष्ठ ११, २०७७ ११:४२
पूरा पढ्नुहोस्
प्रतिक्रिया
पठाउनुहोस्
×