कान्तिपुर वेबसाईट
AdvertisementAdvertisement

कहाँ छन् उत्तर कोरियाली नेता किम जोङ उन ?

एजेन्सीहरु

काठमाडौँ — उत्तर कोरियाली ‘सर्वोच्च नेता’ किम जोङ उनको स्वास्थ्य अवस्थाबारे विभिन्न हल्ला फैलिइरहेका बेला उनले प्रयोग गर्ने रेलको स्याटेलाइट तस्बिर सार्वजनिक भएको छ । 

उत्तर कोरियाली मामिलामा विशेष अध्ययन गर्दै आएको वेबसाइट थर्टीएटनर्थडटओआरजीले किमले प्रयोग गर्ने रेलको स्याटेलाइट तस्बिर सार्वजनिक गरेको हो । उत्तर कोरियाको पूवी किनारमा गत हप्तादेखि रेल पार्किङ गरेर राखिएको उसले दाबी गरेको छ । थर्टी एट नर्थले रेलको तस्बिर सार्वजनिक गरे पनि किमको स्वास्थ्य अवस्थाका बारेमा भने केही खुलाएको छैन । उसले पनि दक्षिण कोरियाली सरकारले यसअघि दाबी गरेजस्तै नेता किम प्योङयाङभन्दा बाहिर रहेको संकेत गरेको छ ।

गत १५ अप्रिलमा आफ्ना हजुरबुवा तथा उत्तर कोरियाका सबैभन्दा ठूला नेता मानिने किम इल सुङको जन्मजयन्ती समारोहमा सरिक नभएपछि उनको स्वास्थ्य अवस्थाका बारेमा विभिन्न अड्कलबाजी गरिएको छ । त्यस्तै गत शनिबार उत्तर कोरियाली सेनाको स्थापना दिवसमा पनि उनी सहभागी नभएको समाचार सार्वजनिक भएको छ ।

त्यस्तै दक्षिण कोरियाको राजधानीबाट सञ्चालिच डेली एनकेको एक रिपोर्टमा किम प्योङयाङको उत्तरी क्षेत्रको रिसोर्ट काउन्टी अफ् ह्याङसनमा उपचाररत रहेको बताएको थियो । अप्रिल १२ मा किमको मुटुको शल्यक्रिया गरिएको र त्यसपछि उनको अवस्था बिग्रेको अपुष्ट समाचार डेली एनएकेले प्रकाशित गरेको थियो । त्यस्तै केही समाचार संस्थाले कोरोना भाइरसको संक्रमणबाट बच्न किम जोङ उन वोनसान गएको पनि बताएका छन् । अहिलेसम्म किम जोङ उनले अप्रिल १५ को समारोह नछुटाएको र त्यसमा अनुपस्थित भएको भन्दै उनको स्वास्थ्य अवस्था बिग्रिएको आशंका गरे पनि अहिलेसम्म आधिकारिक रुपमा कसैले पुष्टि गर्न सकेका छैनन् ।

उत्तर कोरियाली नागरिकले ‘भगवान’ सरह मान्ने नेता किमको स्वास्थ्य अवस्था बिग्रिएको वा केही भवितव्य आइलागेको भए उत्तर कोरियाली नागरिकमात्रै होइन, मुलुककै भविष्यमाथि गम्भीर संकट आइलाग्ने आकलन गरिएको छ । उनी उत्तर कोरियामा शासन गर्ने उनको परिवारका तेस्रो पुस्ता हुन् । सन् २०११ मा बुवा किम जोङ इलको निधनपछि उनले उत्तर कोरियाली सत्ता सम्हालेका थिए । उनको जन्ममिति आधिकारिक रुपमा सार्वजनिक नगरिए पनि उनी सन् १९८४ मा जन्मिएको आकलन गरिएको छ । जनवरी ८ मा उत्तर कोरियामा उनको जन्मदिन भव्यताका साथ मनाइने गरिएको छ ।

उत्तर कोरियाले आफ्ना नेतृत्वको बारेमा पहिलेदेखि नै एकदमै न्यून मात्रामा सूचना सार्वजनिक गर्ने गरेको छ । त्यसैले पनि किमको वास्तविक अवस्था के हो भन्नेबारे यसै भन्न सकिने अवस्था छैन । उत्तर कोरियामाथि जासुसी गर्ने दक्षिण कोरियाली खुफिया एजेन्सीले समेत मिश्रित प्रकारको सूचना प्राप्त गर्ने गरेको छ । सन् २०११ मा किम जोङ इलको मृत्यु हुँदा पनि दुई दिनसम्म उत्तर कोरियाबाहिर कमैलाई मात्र थाहा थियो । उत्तर कोरियाली सञ्चारमाध्यमले दुई दिनपछि सार्वजनिक गरेको समाचारपछि मात्रै उनको मृत्युबारे बाहिरी दुनियाँले थाहा पाएको थियो ।

अमेरिकी अधिकारीहरु पनि उत्तर कोरियाली सर्वोच्च नेताहरुका बारेमा पहिलेदेखि नै यस्ता हल्ला फैलिने गरेकाले यसै भन्न नसकिने बताउँछन् । अमेरिकाका पूर्व राष्ट्रिय सुरक्षा सल्लाहकार ड्यानी रसेलका अनुसार किम, उनका बुवा किम जोङ इल र हजुरबुवा किम इल सुङका बारेमा पनि यस्तै अफवाह फैलाइएको थियो, तर पछि ती सबै गलत प्रमाणित भएका थिए ।

विगतमा उत्तर कोरियासँगको वार्तामा महत्वपूर्ण भूमिकासमेत खेलेका रसेल भन्छन्, ‘म सरकारी सेवामा रहँदा विभिन्न खुफिया स्रोतबाट उत्तर कोरियाका नेताका बारेमा कथित दुर्घटना, बिरामी भएको र हत्या प्रयास भएको सूचना आउँथे ।’

दक्षिण कोरियाको राष्ट्रपति कार्यालयले पनि गत हप्ता किमले उत्तर कोरियालाई सामान्य रुपमा चलाएको र शंकास्पद गतिविधि नभएको स्पस्ट पारेको थियो । साथै पहिचान नखुलाइ सरकारी अधिकारीहरुलाई उद्धृत गर्दै दक्षिण कोरियाली सञ्चारमाध्यमले किम वोनसानमा रहेको खुलाएका थिए । त्यस्तै गत शुक्रबार दक्षिण कोरियाली स्रोतको हवाला दिँदै रोयटर्सले किमलाई केही नभएको र छिट्टै नै सार्वजनिक हुने समाचार प्रकाशित गरेको थियो ।

त्यस्तै अमेरिकी राष्ट्रपति डोनाल्ड ट्रम्पले पनि बिहीबार ह्वाइट हाउसमा आयोजित नियमित पत्रकार सम्मेलनका क्रममा किमको स्वास्थ्य अवस्थाका बारेमा सार्वजनिक भएका समाचार गलत हुन सक्ने बताएका थिए । ट्रम्पले पत्रकार सम्मेलनमा भनेका थिए, ‘मलाई लाग्छ यी रिपोर्ट सही होइनन् ।’ तर ट्रम्पले उत्तर कोरियाली अधिकारीहरुसँग आफू सम्पर्कमा रहेको वा नरहेको बारे भने केही जानकारी दिएनन् ।

‘चीनबाट चिकित्सकको टोली पठाइयो’

केही अन्तर्राष्ट्रिय सञ्चारमाध्यमले किम जोङ उनको स्वास्थ्य अवस्थाबारे बुझ्न र उपचारका लागि चीनले बिहीबार चिकित्सकसहितको टोली पठाएको बताएका छन् । उत्तर कोरिया गएको चिकित्सकसहितको टोली चिनियाँ कम्युनिस्ट पार्टीका अन्तर्राष्ट्रिय सम्बन्ध हेर्ने विभागका वरिष्ठ नेताको नेतृत्वमा गएको रोयटर्सले उल्लेख गरेको छ । चीनले उत्तर कोरिया मामिला हेर्ने विभागका उच्च नेतृत्व पठाएको रोयटर्सले उल्लेख गरेको छ । घटनाको संवेदनशीलतालाई मध्यनजर गर्दै उत्तर कोरिया जाने टोलीको पहिचान खुलाउन स्रोतले नमानेको रोयटर्सले बताएको छ । चिनियाँ अधिकारीले पनि केही दिनअघि उत्तर कोरियाली नेता किमको स्वास्थ्य अवस्था ठीक भएको बताएका थिए ।

उत्तर कोरियाली सञ्चारमाध्यम के भन्छन् ?

विभिन्न अन्तर्राष्ट्रिय सञ्चारमाध्यममा नेता किमको स्वास्थ्य अवस्थाका बारेमा विभिन्न अफवाह फैलिए पनि उत्तर कोरियाली सरकारी सञ्चारमाध्यमले भने यसबारेमा आधिकारिक रुपमा केही जानकारी दिएका छैनन् । उत्तर कोरियाली सरकारी सञ्चार माध्यम कोरियन सेन्ट्रल न्युज एजेन्सी(केसीएनए) ले पछिल्लो पटक शनिबार नेता किमले रुसी कम्युनिस्ट पार्टीका अध्यक्ष जीए झुगानोवबाट शुभकामना सन्देश प्राप्त गरेको उल्लेख गरेको छ ।

रुसी कम्‍युनिस्ट पार्टीका अध्‍यक्ष झुगानोवले किमलाई पठाएको सन्देश

रुसी कम्युनिस्ट पार्टीका अध्यक्ष झुगानोवले पठाएको सन्देश किमले अप्रिल २४ मा ग्रहण गरेको केसीएनले उल्लेख गरेको छ । अध्यक्ष झुगानोवले के अवसरमा सन्देश पठाए भनेर उल्लेख गरिएको छैन । तर सन्देशमा रुस र उत्तर कोरियाबीच इतिहासदेखिको सम्बन्ध रहेको उल्लेख गरिएको केसीएनएले जनाएको छ ।

किम जोङ उनले सिरियाली राष्ट्रपति बसर अल असदलाई पठाएको भनिएको सन्देश

त्यस्तै अप्रिल २२ मा उत्तर कोरियाली नेता किम जोङ उनले सिरियाका राष्ट्रपति बसर अल असदलाई धन्यवाद ज्ञापन गरेको पनि केसीएनएले उल्लेख गरेको छ । किम इल सुङको जन्मजयन्तीका अवसरमा असदले पठाएको सन्देशप्रति किमले धन्यवादसहित जवाफी सन्देश पठाएको केसीएनएले जनाएको छ । केसीएनएले दिएको जानकारी मान्ने हो भने किम जोङ उन अप्रिल २४ सम्म सक्रिय नै छन् । ती सन्देश किमले नै पठाएको र प्राप्त गरेको भनेर केसीएनएले उल्लेख गरेको छ ।

त्यस्तै केसीएनएले किम इल सुङको १०८औं जन्मजयन्तीमा विभिन्न देशबाट किम जोङ उनलाई सन्देश प्राप्त भएको र त्यसको नेता किमले धन्यवादसहित जवाफी सन्देश पठाएको उल्लेख गरेको छ ।

तर किम जोङ उनको स्वास्थ्य अवस्था बिग्रिएको हो वा उनी कुनै ग्रामीण भेगमा छन् भन्ने कुरा उत्तर कोरियाली सञ्चारमाध्यमले सार्वजनिक नगरेसम्म पत्याउने कुनै आधार चाहिँ छैन । प्रकाशित : वैशाख १४, २०७७ १३:३२

प्रतिक्रिया
पठाउनुहोस्

विश्‍वका धेरै देशमा पीपीई अभाव, प्लास्टिक र रेनकोटको भर

व्यक्तिगत सुरक्षा कवचको अभाव भएपछि बेलायत, स्पेन, इटाली, भारतलगायत देशका अस्पतालमा जोखिम मोलेर कोरोना संक्रमितको उपचार गर्दै स्वास्थ्यकर्मी
एजेन्सीहरु

लन्डन — कोरोना भाइरस (कोभिड–१९) संक्रमितको संख्या लगातार बढ्दै गएपछि उपचारमा संलग्न विश्वका कतिपय देशका स्वास्थ्यकर्मीलाई व्यक्तिगत सुरक्षा कवच (पीपीई) अभाव भएको छ ।

बेलायतका कतिपय अस्पतालले सघन उपचार कक्षका शय्याहरू थपिरहेका छन् । तर त्यसमा कार्यरत चिकित्सक, नर्सलगायत स्वास्थ्यकर्मीका लागि भने उनीहरूले पर्याप्त ध्यान दिएका छैनन् । फलस्वरूप स्वास्थ्यकर्मीहरू जोखिम मोलेरै संक्रमितको उपचारमा संलग्न छन् ।
बेलायतका केही अस्पतालका सघन उपचार कक्षका चिकित्सकले देशमा केही स्वास्थ्यकर्मीहरूले सुरक्षा साधनको अभाव झेलिरहेको बताएका छन् । बीबीसीका अनुसार केही स्वास्थ्यकर्मीले उनीहरूको अस्पतालमा उपकरण अभाव भए पनि मिडियासँग कुरा नगर्न चेतावनी दिइएको जनाएका छन् ।
बेलायतको मिडल्यान्डस्थित एक अस्पतालकी चिकित्सकले आफ्नो परिचय गोप्य राख्ने सर्तमा कोभिड–१९ ले संक्रमितले सघन उपचार कक्ष भरिएको एक अस्पतालबारे बताइन् । अस्पतालका सबै शल्यक्रियाहरू पछि सारिएका छन् भने क्यान्सर क्लिनिकसमेत रद्द गरिएको छ । उनका अनुसार अस्पतालमा आवश्यकताअनुसार कर्मचारी छैनन् र भेन्टिलेटर तथा सामान्य एन्टिबायोटिक्स्को पनि अभाव छ ।
प्रत्येक सिकिस्त बिरामीहरू दिनमा १३ घण्टासम्म हेरिरहेका नेसनल हेल्थ सर्भिस (एनएचएस) का स्वास्थ्यकर्मीहरूले पीपीईको अभावमा रेनकोट, प्लास्टिकका फोहोर राख्ने झोला, प्लास्टिकका एप्रोन र स्की खेल्दा लगाइने चस्माको सहारा लिएका छन् ।
बेलायत हाल लकडाउनको अवस्थामा छ । अत्यावश्यक सेवामा खटिने मानिसलाई सकभर दुई मिटरको दूरी राख्न भनिएको छ । आममानिसलाई सामाजिक दूरी कायम गर्न अनुरोध गरिएको छ । तर संक्रमितको परीक्षण तथा उपचारमा प्रत्यक्ष खटिने स्वास्थ्यकर्मी भने असुरक्षित छन् ।
जटिल अवस्थाका भाइरसको संक्रमितको उपचार हुने सघन उपचार कक्षका नर्सहरूलाई कुनै सुरक्षा प्रदान नगर्ने टोपी लगाएर काम गर्न भनिएको ती चिकित्सकको भर्ना छ । ‘त्यसकारण हामी प्लास्टिकका झोला वा एप्रनले टाउको छोप्न बाध्य छौं,’ उनी भन्छिन् ।
बेलायत सरकारले सुरक्षा सामग्री वितरण प्रणालीमा कमजोरी भएको स्वीकार गर्दै राष्ट्रिय वितरण टोलीले स्वास्थ्य उपकरणहरू सबै अस्पतालमा तत्काल पुर्‍याउने बताएको छ । एनएचएसले भने पीपीईबारे हालसम्म कुनै प्रतिक्रिया दिएको छैन । उसले गतसाता १० लाखभन्दा बढी मास्क वितरण गरिएको जनाएको छ ।
ती चिकित्सकका अुनसार त्यसरी वितरण गरिएका मास्कमा पनि प्रयोग गर्ने म्याद थपिएको थियो । जनस्वास्थ्य कार्यालयले मौज्दात रहेका कतिपय सामग्री राम्ररी परीक्षण गरी बाँडिएको जनाएको छ । तर यसमा कतिपय चिकित्सक भने विश्वस्त छैनन् ।

इन्‍डोनेसियाली चिकित्सकहरु रेनकोट लगाएर कोरोना संक्रमितको उपचारमा खटिँदै तस्बिर : रोयटर्स
हालसम्म कति स्वास्थ्यकर्मीहरू कोभिड–१९ को संक्रमणका कारण अस्पताल भर्ना भए भन्ने एनएचएससँग पनि तथ्यांक छैन । तर भाइरसका कारण ब्रिटेनमा केही स्वास्थ्यकर्मीको भने मृत्यु भइसकेको छ ।
त्यसैगरी, स्पनेको मड्रिड र बार्सिलोनाका सघन उपचार कक्षमा खटिएका स्वास्थ्यकर्मीलाई पनि पीपीई अभाव छ । स्पेनमा मार्च अत्यसम्म ९ हजार ४ सय स्वास्थ्यकर्मी कोभिड–१९ बाट संक्रमित भएका छन् ।
इटालीको सबैभन्दा बढी प्रभावित क्षेत्र लोम्बार्डी, राजधानी रोमका चिकित्सकले पनि पीपीई तथा सुरक्षित मास्कको अभाव भएको गुनासो गर्दै आएका जनाइएको छ । इटालीमा गत सातासम्म ६ हजार ४ सयजना स्वास्थ्यकर्मी कोभिड–१९ बाट संक्रमित भइसकेका छन् ।
भारतमा पनि अभाव
भारतमा पनि पीपीईको अभाव भएपछि कोभिड–१९ संक्रमितको उपचार संलग्न चिकित्सकले प्लास्टिक, रेनकोट तथा हेल्मेट लगाउने गरेका छन् ।
समाचार संस्था रोयटर्सका अनुसार राजधानी नयाँदिल्ली, मुम्बई, कोलकातालगायत सहरका दर्जनौं चिकित्सक सुरक्षित मास्क तथा पीपीईबिना नै कोभिड–१९ संक्रमितको उपचारमा अग्रपंक्तिमा खटिएका छन् ।
कोलकाताको बेलियाघाटा आईडी अस्पतालमा कोरोना उपचारमा खटाइएका डाक्टरहरूले आफूहरूलाई प्लास्टिकका रेनकोट दिइएको जनाएका छन् । उपचारका क्रममा उनीहरूले ती रेनकोट लगाएका तस्बिरहरूसमेत सार्वजनिक भएका छन् ।
कतिपय चिकित्सकहरूले यस्तो अवस्थामा आफूहरूले काम गर्न नसक्ने बताए । एक चिकित्सकले भने, ‘हामी ज्यानको बाजी लगाएर काम गर्न सक्दैनौं ।’ अस्पतालका प्रमुख मेडिकल सुपरिटेन्डेन्ट डा.आसिस मन्नाले भने यसबारे कुनै प्रतिक्रिया दिएनन् ।
त्यसैगरी, हरियाणाको ईएसआई अस्पतालका चिकित्सक सन्दिप गार्गले आफूसँग एन–९५ मास्क नभएकाले हेल्मेट लगाउने गरेको बताए । उनले भने, ‘मैले सर्जिकल मास्क र हेलमेट लगाउने गरेको छु । यसको भाइजरले मेरो अनुहार पनि छेक्छ ।’
प्रधानमन्त्री नरेन्द्र मोदीले स्वास्थ्यकर्मीलाई पीपीईलगायत सुरक्षा सामग्रीको अभाव देखिएको जनाउँदै दक्षिण कोरिया र चीनबाट ल्याउने बताएका थिए । तर हालसम्म पनि त्यस्ता सामग्री भने ल्याइएको छैन । विश्व स्वास्थ्य संगठन (डब्लूटीओ) का अनुसार कोभिड–१९ संक्रमित बिरामीको उपचारमा संलग्न चिकित्सकले अनिवार्य रूपमा पीपीई लगाउनुपर्छ । यसबारे आफ्नो प्रश्नमा भारतीय स्वास्थ्य मन्त्रालयले कुनै जवाफ नदिएको समाचार संस्था रोयटर्सले जनाएको छ ।
मास्क र सेनिटाइजरको पनि अभाव
कतिपय देशमा मास्क तथा सेनिटाइजरको समेत अभाव भएको छ । गत साता जर्मनीले आफ्नो देश ल्याउन लागिएका २ लाख मास्क अमेरिकाले बाटैमा कब्जा गरेको जनाएको थियो । बर्लिनस्थित एक स्थानीय सरकारले मगाएका ‘एफएफपी–२’ मास्क बैंककमा जफत गरिएको थियो । बर्लिनका आन्तरिक मामिलामन्त्री आन्द्रियास गिजेलले ती मास्क अमेरिकातर्फ लगिएको दाबी गरेका थिए ।
अमेरिकी राष्ट्रपति डोनाल्ड ट्रम्पले कोरियाली युद्धकालीन कानुन ‘डिफेन्स प्रोडक्सन एक्ट’ लागू गर्दै मेडिकल सामग्रीको उत्पादन तथा आपूर्ति गर्ने अमेरिकी कम्पनीलाई घरेलु माग धान्न बाध्य पारेका थिए । जसका कारण अमेरिकी अधिकारीले ती मास्क बाटैबाट कब्जा गरेका हुन् ।
ट्रम्पका अनुसार अमेरिकी अधिकारीहरूले कम्तीमा करिब २ लाख ‘एन–९५’ मास्क, १ लाख ३० हजार सर्जिकल मास्क तथा ६ लाख पन्जा जफत गरिसकेका छन् । जर्मनमन्त्री गिजेलले विश्वव्यापी संकटका बेला अमेरिकाले गरेको जबरजस्ती उचित नभएको बताउँदै आएका छन् ।
त्यसैगरी, युरोपेली देशका अन्य नेताहरूले पनि मास्क तथा मेडिकल सामग्री अभाव भएको बताउने गरेका छन् । फ्रान्सको ले–दे–फ्रान्स क्षेत्रका सभापति भेलेरी पेक्रेसेंले मास्क अभाव भए पनि बढी मूल्य तिरेर खरिद गरेको जनाएका छन् । युरोपमा महामारी फैलिएसँगै मास्क तथा अत्यावश्यक मेडिकल सामग्रीको भाउ अकासिएका उनको भनाइ छ ।
डेनमार्कले गत साता चीनबाट ४ लाख मेडिकल मास्क तथा कोभिड–१९ परीक्षण किट मगाएको थियो । तर ती बीच बाटोबाटै अन्यत्र पुर्‍याइएपछि आफ्नो देशमा अभाव कायमै रहेको डेनमार्कको भनाइ छ । संक्रमण फैलिएसँगै पीपीई, मास्क, परीक्षण किट लगायतका मेडिकल सामग्री अभाव भएपछि इटाली र स्पेनले चीनसँग मगाएका थिए । तर ती गुणस्तरहीन भएपछि फिर्ता गरेका थिए ।

प्रकाशित : चैत्र २९, २०७६ ०९:३८
पूरा पढ्नुहोस्
प्रतिक्रिया
पठाउनुहोस्
×