स्विट्जरल्यान्ड ल्याइँदै गरेको कीटनाशक जेल इटालीद्वारा कब्जा

ददि सापकोटा

पेरिस — आफूले ल्याउँदै गरेका कीटाणुनाशक पदार्थ इटालीले जफत गरेको स्विट्जरल्यान्डले आरोप लगाएको छ । इटालीले दुई देशबीचको सिमानामा एउटा ट्रक अवरुद्ध गरेर कीटाणुनाशक पदार्थ कब्जा गरेको स्विट्जरल्यान्डका विदेशमन्त्री इग्नाजियो कासिसले आरोप लगाए ।

इटालीले सार्वभौम राष्ट्रमाथि हस्तक्षेपको प्रयास गरेको पनि उनले बताए । स्विस वाणिज्य यातायात संघले कीटाणुनाशक पदार्थ जफत गर्ने इटालीको कदमलाई ‘स्टेट थ्रेट’ को संज्ञा दिएको स्विस इन्फोले जनाएको छ ।


आफ्ना सामान स्विट्जरल्यान्ड भित्रिँदै गर्दा दुई देशबीचको सीमा क्षेत्र डोमोडोसलामामा इटालीले सामानसहितको ट्रकलाई गत सातादेखि रोकेर राखेको विश्वभरिबाट सामान आयात गर्ने स्विस कम्पनी भिक्टोरी स्विट्जरल्यान्डले जनाएको छ । स्विट्जरल्यान्डले पहिले नै ट्रकमा रहेका सामानको भुक्तानी गरिसकेको स्थानीय सञ्चारमाध्यमले उल्लेख गरेका छन् ।


भिक्टोरी स्विट्जरल्यान्डका प्रबन्ध निर्देशक डेनियल गेर्बरले स्विस इन्फोलाई बताएअनुसार स्विट्जरल्यान्डतर्फ ल्याइँदै गरेको रोगाणुनाशक जेल (डिसइन्फेक्टेन्ड ह्यान्ड जेल) इटालीका भन्सारका अधिकारीहरूले जफत गरेका हुन् ।


इटालीका भन्सार अधिकारीहरूले भने कोरोना भाइरसका कारण सिर्जित आपत्कालीन अवस्थामा कीटाणुनाशक पदार्थले भरिएको ट्रक कब्जा गर्नु उचित भएको तर्क दिएको छ । स्विस टोलीलाई दिइएको भन्सार कागजमा ती सामान डोमोडोसलामामा रहेको इटालीको भन्सार निकायलाई बुझाइने उल्लेख छ । त्यसपछि इटालीका अस्पताल र नगरपालिकामा वितरण गरिने जनाइएको छ । भिक्टोरी स्विट्जरल्यान्डले जर्मन कम्पनी गिफ्ट्स र ब्युटी ह्यान्डलबाट तीन साताअघि ३० हजार ८ सय डलर तिरेर कीटाणुनाशक सामग्री मगाए पनि उक्त सामग्री इटालीमै बनेका थिए ।


इटालीका अधिकारीहरूले भने जफत गरेका सामग्रीको मूल्य फिर्ता गर्न सकिने उल्लेख गरेका छन् । भिक्टोरी स्विट्जरल्यान्डले यसअघि मार्चको सुरुवातमा पनि जर्मनीमा यस्तै समस्या भोगेको थियो । चीनबाट जर्मनी हुँदै ल्याउन लागिएका ३ लाख १४ हजार मास्क जर्मनीको हेमबर्गमा रोकिएको थियो । दुई दिनपछि मात्र मास्क पठाइएको थियो ।

प्रकाशित : चैत्र २७, २०७६ ०८:३४
प्रतिक्रिया
पठाउनुहोस्

कोरोनाविरुद्ध लड्न एनआरएनए युरोपको आपत्‌‌कालीन कोष

ददि सापकोटा

पेरिस — गैरआवासीय नेपाली संघ युरोप क्षेत्रीय कमिटीले कोरोना संक्रमणविरुद्ध लड्न ५० हजार युरोको आपत्‌‌कालीन कोष स्थापना गरेको छ । कमिटीको बैठकले एनआरएनए युरोप कोभिड १९ सहयोग समिति समेत गठन गरेको छ ।

एनआरएनए केन्द्रीय अध्यक्ष कुमार पन्त, महासचिव हेम शर्मा, आईसीसी सदस्य रामशरण सिंखडा, कोषाध्यक्ष महेश श्रेष्ठ, युरोप क्षेत्रीय संयोजक नारायण आचार्यसहितको बैठकले यस्तो निर्णय लिएको हो ।
उक्त रकम कोरोना प्रभावित क्षेत्रमा परिचालन गरिने आईसीसी सदस्य सिंखडाले जानकारी दिए ।
युरोप उपसंयोजक कृष्णप्रसाद तिमिल्सिनाका अनुसार संयोजक आचार्यको अध्यक्षता रहेको समितिको ११ सदस्यीय सचिवालयमा उपसंयोजकत्रय मुक्तबहादुर गुरुङ, कृष्णप्रसाद तिमिल्सिना र शुक्रराज न्यौपाने तथा आईसीसी सदस्यहरू रामशरण सिंखडा (यूके), सुभाष जोशी (बेल्जियम), सुनील रानाभाट (स्पेन), विजय मोक्तान (जर्मनी) र चिन्तामणि सापकोटा (स्पेन) छन् ।
बैठकले केन्द्रमा गठित स्वास्थ्य कार्यदलसँगको सहकार्यमा युरोप क्षेत्रका स्वास्थ्यविज्ञहरू रहने गरी डा. बोधराज सुवेदीको संयोजकत्वमा उपसमितिसमेत गठन गरेको छ । समितिले बिहीबारदेखि नै भाइरसको बढी प्रभाव रहेका युरोपेली देशमा समस्या पहिचान गरी लगत राख्न थाल्नेछ ।
समितिले अल्पकालीन तथा दीर्घकालीन सहयोग पहिचान गरी मूल समितिमा एक साताभित्र प्रतिवेदन पेस गर्ने निर्णय रहेको सिंखडाले जानकारी दिए ।

प्रकाशित : चैत्र २०, २०७६ १४:०४
पूरा पढ्नुहोस्
प्रतिक्रिया
पठाउनुहोस्
×