हाङचउ एसियाली खेलकुद : निमा र वीरबहादुरले झन्डा बोक्ने

नेपाल ओलम्पिक कमिटीका कार्यकारी सचिव सुजनलाल श्रेष्ठका अनुसार महिलामा उसुकी निमा र पुरुषमा तेक्वान्दोका वीरबहादुरले यो ऐतिहासिक अवसर पाउन लागेका हुन् ।

निमा पछिल्लो दुई संस्करणको दक्षिण एसियाली खेलकुद (साग) मा स्वर्ण पदक विजेता हुन् । यस्तै वीरबहादुरले पछिल्लो सागमा स्वर्ण जितेका थिए ।

टोकियो ओलम्पिक्सदेखि महिला र पुरुष एक/एक जनाले झन्डा बोक्ने परम्परा सुरु भएको हो । लैंगिक समानताका नारा अनुसार यो निर्णय गरिएको हो ।

उद्घाटन समारोह दुई घण्टा चल्नेछ । त्यसको सुरुमा प्रतियोगितामा सहभागी ४५ देशका खेलाडी तथा पदाधिकारीले मार्चपास गर्नेछन् ।