प्रधानमन्त्री दाहालले राजनीतिलाई विकृत बनाए : उपमहासचिव ज्ञवाली
देउखुरी — नेकपा एमालेका उपमहासचिव प्रदीप ज्ञवालीले प्रधानमन्त्री एवं माओवादी केन्द्रका अध्यक्ष पुष्पकमल दाहाललाई नेपाली राजनीति विकृत बनाएको आरोप लगाएका छन् ।
दाहालले राजनीतिमा झुठ र बेइमानी प्रस्तुत गरेर राजनीतिलाई अत्यन्तै विकृत बनाएको उनको आरोप थियो ।
दाङको देउखुरीमा प्रेस चौतारीले आयोजना गरेको पत्रकार सम्मेलनमा बोल्दै नेता ज्ञवालीले यस्तो बताएका हुन् । एमालेले दाहाललाई राम्रोसँग देशको नेतृत्व गर्नुहोला भनेर प्रधानमन्त्रीमा समर्थन गरेको तर दाहालले बेइमानी गरेर बाटो बदलेको उनको भनाइ थियो ।
दाहाल कुर्सी बचाउनका लागि बाह्य शक्तिको हितमा लाग्दा मुलुकमा अस्थिरता पैदा भएको पनि नेता ज्ञवालीको आरोप थियो ।
अर्को प्रसंगमा उनले कांग्रेस-एमालेको वैकल्पिक सरकार बनाउनभन्दा एमाले सम्पूर्ण ध्यान २०८४ को चुनावमा बलियो शक्तिको रुपमा देशको नेतृत्व गर्नतिर केन्द्रित भएको बताएका थिए । देशमा विकृति र अराजकता निम्तिँदा पनि कांग्रेस पार्टीलाई कुनै महसुस नभएको उनको टिप्पणी छ ।
प्रकाशित : श्रावण २४, २०८० १६:४७