अर्घाखाँची — एमाले केन्द्रीय सचिव एवं अर्घाखाँचीका प्रतिनिधिसभा सदस्य उम्मेदवार टोपबहादुर रायमाझीले चुनावपछि गठबन्धनका दलहरु छिन्नभिन्न भएर सकिने बताएका छन् । एमालेलाई हराउन एक भएका ५ दलभित्रै तीव्र असन्तुष्टि र एजेन्डा नभएकोले चुनावमा एमालेले बहुमत ल्याउने र चुनावपछि केपी शर्मा ओलीको नेतृत्वमा सरकार बन्ने उनले दाबी गरे । 

'गठबन्धन त लक्ष्य, उदेश्यविहीन छ, उसको एउटै एजेन्डा छ जसरी हुन्छ एमाले हराउने,' सोमबार सन्धिखर्कमा पत्रकार भेटघाटमा उनले भने, 'ओली नेतृत्वको सरकारले गरेको विकासका काम देखेर सबै अत्तालिए । चुनावपछि गठबन्धन भित्रका सबै दलहरू छिन्नभिन्न भएर सकिन्छन् ।'

उनले गठबन्धनको अस्तित्त्व नै संकटमा रहेको बताए । चुनावपछि मुलुकमा दुई ध्रुवको राजनीतिक वातावरण बन्ने उनको दाबी छ । पुँजीवादको नेतृत्व कांग्रेसले गर्ने र समाजवादीको नेतृत्व एमालेले गर्ने उनले बताए । एमाले नेतृत्वको सरकारले देशको विकास गर्ने उनले बताए ।