बर्दियामा डुंगा पल्टियो, १३ यात्रुको सकुशल उद्धार
डुबेर बेपत्ता तीन मोटरसाइकल र १० मोबाइलको खोजी जारी
बर्दिया — मधुवन नगरपालिका र बारबर्दिया जोड्ने कुम्भ्राघाटमा आइतबार दिउँसो डुंगा पल्टिएको छ । १३ जना यात्रु चढेको सानो डुंगा बबई नदी पार गर्नेक्रममा पल्टिएको सशस्त्र प्रहरी उपरीक्षक जहरसिंह बुढामगरले बताए । उनका अनुसार डुंगामा सवार सबै यात्रुलाई सकुशल उद्धार गरिएको छ ।
दुई वटा मोटरसाइकल, स्कुटी भने बबई नदीमा डुबेकोले फेला पार्न सकिएको छैन । यात्रुले बोकेको १० वटा मोबाइल पनि बबई नदीमा डुबेको छ ।
डुंगामा क्षमताभन्दा बढी यात्रु र मोटरसाइकल राख्दा अनियन्त्रित भई पल्टिएको प्रहरीले जनाएको छ । डुबेका मोटरसाइकल र स्कुटीको खोजी भइरहेको सशस्त्र प्रहरी उपरीक्षक बुढामगरले बताए ।
प्रकाशित : आश्विन ३०, २०७९ १६:४२प्रतिक्रिया