पाल्पामा जिप दुर्घटना : चार जना घाइते 

बुटवलबाट पाल्पाको रैनादेवी छहरा–६, जुठापौवाका लागि यात्रु लिएर हिँडेको लु १ ज १४३१ नम्बरको जिप दुर्घटना हुँदा घाइते मध्ये दुई जनाको अवस्था गम्भीर रहेको जिल्ला प्रहरी कार्यालयका प्रहरी नायब उपरीक्षक वीरेन्द्र थापाले जानकारी दिए । दुर्घटनामा झापाका कृष्णबहादुर राई, पाल्पा जुठापौवाका हिरा पुन, दीपक पुन र छविला रास्कोटी घाइते भएका छन् ।

घाइतेहरुको तानसेनस्थित युनाइटेड मिसन अस्पतालमा उपचार भइरहेको प्रहरीले जनाएको छ । दुर्घटनाग्रस्त जिप छहरा र अमलाबासको बीचमा पर्ने भैरव नवदीप माविको निर्माणाधीन भवनमाथि पुगेको छ । दुर्घटनाका सम्बन्धमा अनुसन्धान भइरहेको प्रहरीले जनाएको छ । जिप चालक प्रहरी नियन्त्रणमा रहेका छन् ।