रुपन्देहीमा पढ्न नपाएका छोरीहरूलाई आवासीय सुविधासहित नि:शुल्क पढाइने
बुटवल — रुपन्देहीमा हिंसा, भेदभाव, गरिबी र विकटताका कारण पढ्न नपाएका छोरीहरूलाई निःशुल्क पढाउने कार्यक्रम सुरु भएको छ ।पढाइबाट वन्चित छोरीहरूलाई पढाइको अवसर जुटाइदिने र लैंगिक विभेद अन्त्य गर्ने भन्दै खेमओमी पुन कल्याणकारी प्रतिष्ठानले काम थालेको हो ।
जसअन्तर्गत पढ्ने उमेरमा विद्यालय जान नपाएका, बिचमै पढाइ छाडेका र गरिबीका कारण पढाइ छाड्ने अवस्थामा पुगेका छोरीहरूलाई निःशुल्क आवासीय सुविधासहित पढाइने छ । विद्यालय शिक्षा र सीपमूलक तालिम दुवैको माध्यमबाट उनीहरू आत्मनिर्भर भएपछि मात्रै उनीहरूलाई परिवारमा पठाइने वा पुनःस्थापित गरिने अध्यक्ष ओमीकला पुनले बताइन् ।
विपद्मा परेका छोरीहरूलाई आवासीय शिक्षा दिन रुपन्देहीको तिलोत्तमा नगरपालिकाको ऋगेश्वर धाम परिसरमा भवन निर्माण कार्य सुरु भएको छ । घटस्थापनाको अवसर पारेर बालिका छात्रावास भवन निर्माण थालिएको हो । छात्रावास निर्माणको प्रारम्भिक काम सकेर मंसिर १७ सम्ममा पढाउने काम सुरु हुने अध्यक्ष ओमीकला पुनले बताइन् ।
विपन्नको शिक्षा र व्यवस्थापनमा सघाउँदै आएका बुटवलका व्यवसायी तथा समाजसेवी खेम पुनले विपन्न छोरीहरूलाई पढाउन यस्तो योजना ल्याएका थिए । त्यसका लागि खेम-ओमी पुन कल्याणकारी प्रतिष्ठान स्थापना गरेका हुन् । यद्यपि ६० वर्षीय पुनको गत वर्ष मस्तिष्कघातका कारण मृत्यु भएको छ ।
गुल्मीको भार्सेमा जन्मिएर बुटवलमा औषधि व्यवसाय गर्ने खेमराज पुन र उनकी पत्नी ओमीकलाले आत्मशान्ति र पुण्यका लागि भन्दै आफ्नो कमाइको एक चौथाइ रकम जम्मा गरेर खेमओमी पुन कल्याणकारी प्रतिष्ठान स्थापना गरेका थिए । पढाइमा तेज भए पनि आर्थिक अभावले गर्दा पढाइबाट वञ्चित भएका विद्यार्थीहरूलाई कोषमार्फत छात्रवृत्ति प्रदान गरिँदै आएको छ । अब उक्त कोषबाट छोरीहरूलाई आवासीय शिक्षा दिइने छ ।
