खेल सामग्रीबिनै तयारी- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

खेल सामग्रीबिनै तयारी

दुर्गालाल केसी

दाङ — इँटा समाएर सुटिङको अभ्यास । सुन्दै अचम्म लाग्ने खेलको अभ्यासमा छन् तुलसीपुर उपमहानगरपालिका–६ का शंकर गौतम । ११ कक्षामा अध्ययनरत उनी एक महिनादेखि सुटिङ खेलको अभ्यासमा छन् तर उनको साथमा बन्दुक छैन । इँटालाई बन्दुक मानेर नवौं राष्ट्रिय खेलकुदको तयारी गरिरहेका हुन् ।


बन्दुक र पेस्तोल अभावमा गौतमजस्ता १२ जना खेलाडी इँटाको निसाना लगाएर गोली हान्ने अभ्यास गरिरहेका छन् । ‘अहिलेसम्म बन्दुक पड्काउन पाएको छैन । बन्दुक कसरी समाउने भन्ने मात्रै सिकेको छु,’ पहिलोपटक सुटिङ खेलमा प्रवेश गरेका गौतमले भने, ‘यसकै भरमा नवौं राष्ट्रिय खेलकुदको छनोटमा सहभागी हुँदै छु ।’

गौतमजस्तै तुलसीपुरकै १२ कक्षामा अध्ययनरत शर्मिला कुँवर, विमला विष्ट र ओपेन्द्र खत्री पनि पहिलोपटक सुटिङ खेलमा प्रवेश गरेका छन् । एक महिनासम्म अभ्यास गर्दा पनि उनीहरूले बन्दुक पड्काउन पाएका छैनन् । एकपटक पनि बन्दुक नपड्काई राष्ट्रिय खेलकुदको तयारी गर्नुपरेको विष्टले बताइन् । ‘पहिलोपटक बन्दुक पड्कँदा डराइन्छ होला, तर्सन्छु होला भन्ने लागेको छ,’ उनले भनिन्, ‘जे त होला भनेर खेलमा होमिएका छौं । हतियार नभएपछि के गर्नू ?’

दाङ सुटिङमा राम्रो सम्भावना भएको जिल्ला हो । आठौं राष्ट्रिय खेलकुदमा तुलसीपुरका अर्नव घिमिरेले एकल स्वर्णपदक जितेका थिए । सातौंमा अर्नवका साथै पवन घिमिरेको टिमले स्वर्ण पदक जितेको थियो । छैटौं राष्ट्रिय खेलकुदमा वसन्ती केसीले एकल कास्य र समूहमा रजत पदक जितेकी थिइन् । अर्नवले १३ औं साफ खेल खेलेका छन् । पवनले १२ औं साफ खेल खेलेका छन् । ‘नयाँ खेलाडीहरू पनि त्यत्तिकै आउन खोजिरहेका छन् तर हतियार नभएपछि खिन्न भएर फर्किन्छन्,’ सुटिङ संघका जिल्ला अध्यक्ष केशव चौधरीले भने ।

आइतबारदेखि नेपालगन्जमा नवौं राष्ट्रिय खेलकुदको लुम्बिनी प्रदेश स्तरीय छनोट खेल सुरु हुँदै छ । चौधरी ६ महिला र ६ पुरुष खेलाडी लिएर जाँदैछन् । १२ खेलाडीमध्ये चार जना नयाँ छन्, जसले अहिलेसम्म एकपटक पनि बन्दुक पड्काउन पाएका छैनन् । ‘हतियार नभए पनि खेलको तयारी गर्नैपर्‍यो । केन्द्रसँग जति माग गर्दा पनि पाइएन । अरु विकल्प भएन,’ उनले भने । पुराना खेलाडीको समेत अवस्था बिग्रे वा सुध्रेको थाहा हुन नसकेको आठौं खेलकुदका स्वर्णपदक विजेता अर्नव घिमिरेले बताए । ‘हाम्रो अवस्थासमेत बिग्रिएको छ कि के छ केही थाहा छैन । गोली नहानी राम्रो नतिजा ल्याउन सकिँदैन,’ उनले भने ।

इँटाले बन्दुकको भार थाम्न मात्र सघाउने अग्रज खेलाडी वसन्ती केसीले बताइन् । सुटिङ संघ केन्द्रीय समितिले दाङलाई एउटा यर राइफल दिए पनि आठौं राष्ट्रिय खेलकुदको अभ्यास गर्दा गर्दै बिग्रिएको केसीले बताइन् । जिल्लामा सुटिङ संघको कार्यालय र खेल्ने ठाउँ पनि छैन । तुलसीपुर–६ जयभगवती टोलस्थित खेलाडी जानकी रोकाको घरमा अभ्यास गरिएको छ ।

प्रकाशित : आश्विन ९, २०७९ ०९:००
प्रतिक्रिया
पठाउनुहोस्

बिनाप्रतिस्पर्धा आफन्तलाई नियुक्ति

प्रकाश बराल

बागलुङ — धौलागिरि अस्पतालले बिनाप्रतिस्पर्धा स्थायी प्रक्रियामा लैजाने गरी आठ जना कर्मचारी भर्ना गरेको छ । अस्पताल व्यवस्थापन समितिले आफन्तलाई कर्मचारीको रूपमा भर्ना गराएको हो । अस्पतालको ल्याबमा २, काउन्टरमा ५ र फार्मेसीमा १ जना भर्ना गरेको हो । स्वयंसेवक भनेर भर्ना गरेपछि एक महिनापछि ज्यालादारी बनाएर क्रमशः स्थायी प्रक्रियामा लगिएको हो । 

अस्पतालभित्रकै कर्मचारीले पदको दुरुपयोग गर्दै आफन्त र राजनीतिक भर्ती केन्द्र बनाइएको आरोप लगाए । ‘कर्मचारी राख्ने हो भने स्वच्छ प्रतिस्पर्धाबाट राख्नुपर्छ,’ ती कर्मचारीले भने, ‘आफ्ना मान्छे ल्याएर राखेका छन्, उनीहरूकै हालीमुहाली बनाउन खोजिएको छ ।’ यसअघिका समितिले पनि आफ्ना मानिस ल्याएर स्वयंसेवकदेखि करार हुँदै स्थायी प्रक्रियामा लगेका थिए ।

नियुक्ति भएकाहरू समिति सदस्यका आफन्त र नेताका पत्नि समेत छन् । अस्पताल विकास समितिका अध्यक्ष नारायणप्रसाद पौडेलले स्वयंसेवामा लगाउनुपरेकोले ल्याइएको बताए । उनले राजनीतिक भागबन्डामा कर्मचारी नियुक्ति भएको संकेत गरे । अस्पतालमा छ दलीय गठबन्धनबाट समिति निर्माण भएको छ । नियुक्ति भएका कर्मचारी क्रमशः स्थायी प्रक्रियामा जाने पौडेलले बताए । ‘राम्रो काम गरेको खण्डमा ज्यालादारीमा लैजाने हो,’ पौडेलले भने, ‘स्थायी गर्न त नमिल्ला ।’

कर्मचारी भर्ती गर्ने स्थल बनाएको भन्दै विरोध आउने डरले व्यवस्थापनले स्वयंसेवकबाट स्थायी प्रक्रियामा लैजाने सम्झौता गरेको हो । ‘काम राम्रो गरे भने प्रक्रियामा लैजाने हो, नत्र करार गर्दैनौं’, पौडेलले भने, ‘स्थायी दरबन्दीमा लैजाने कुरा भएको छैन ।’ अस्पतालका मेडिकल सुपरिन्टेन्डेन्ट डा.शैलेन्द्र पोखरेलले स्वयंसेवकलाई ज्यालादारी र करारमा लैजान सकिने बताए । ‘सम्झौता गरेर ल्याएको होइन, तर आवश्यक स्थनमा करार गर्न सकिन्छ,’ उनले भने, ‘अस्पतालमा अत्यावश्यक काम सक्नका लागि दक्ष जनशक्ति चाहिएको छ ।’ उनले दैनिक आउने ४ सय देखि ५ सय बिरामीको उपचार र व्यवस्थापनमा धेरै कर्मचारी आवश्यक भएको बताए ।

यसअघि लामो समय सम्म ज्यालादारीमा राखेर एक महिना मात्रै करार भएका एक डाक्टरलाई भने अस्पतालले हटाएको छ । ‘मलाई समिति र प्रशासनले लामो समय करार गरिदिन्छु भन्दै झुलायो, करार भएको एक महिनापछि सम्झौता तोडेर नियोजित रूपमा हटाएको छ,’ डा.मोहमद वसिम अन्सारीले भने ।

प्रकाशित : आश्विन ९, २०७९ ०९:००
पूरा पढ्नुहोस्
प्रतिक्रिया
पठाउनुहोस्
×