शिक्षा अधिकृतलाई दुर्व्यवहार गर्ने पक्राउ- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

शिक्षा अधिकृतलाई दुर्व्यवहार गर्ने पक्राउ

कमल पन्थी

बर्दिया — मधुवन नगरपालिकाका शिक्षा शाखा अधिकृत नारायण खनाललाई दुर्व्यवहार गर्ने प्रयास गर्दै हातपात गरेको आरोपमा एक जना पक्राउ परेका छन् । पक्राउ पर्नेमा नेत्र विक्रम चन्द नेतृत्वको नेकपानिकट अखिल (क्रान्तिकारी) का नेता अर्जुन विष्ट रहेको प्रमुख जिल्ला अधिकारी बन्धुप्रसाद बास्तोलाले बताए ।

विष्टविरुद्ध अभद्र व्यवहारअन्तर्गत कारबाही चलाइएको प्रजिअ बास्तोलाले बताए ।

उनी नेकपानिकट अखिल (क्रान्तिकारी)का विद्यार्थी रहेको प्रहरीले बताएको छ । शिक्षक नियुक्ति, सरुवा, बढुवालगायत विषयमा शाखा अधिकृत खनालमाथि कारबाही गरेको अखिल (क्रान्तिकारी) का नेता लोकेश जोशीले बताए ।

कार्यालय कक्षमा पसेर कालोमोसो लगाउने प्रयास गर्दै शिक्षा शाखा प्रमुख खनालमाथि हातपात गर्दा कर्मचारीले विरोध गरेका थिए । ५ जनाको समूहमा आएका उनीहरूलाई पक्राउ गर्न खोज्दा चार जना भागेको र एक जनालाई कर्मचारीले समातेर प्रहरीलाई बुझाएको नगर प्रमुख तेजबहादुर भाटले जनाए ।

प्रकाशित : आश्विन ६, २०७९ १६:२४
प्रतिक्रिया
पठाउनुहोस्

राष्ट्रपतिको अपमान गर्नुलाई सत्तारुढ गठबन्धनले आफ्नो महानता ठानेको छ : ओली

कान्तिपुर संवाददाता

काठमाडौँ — एमाले अध्यक्ष केपी शर्मा ओलीले राष्ट्रपति विद्यादेवी भण्डारीले नागरिकता विधेयक प्रमाणीकरण नगरेको विषयमा सत्तारुढ गठबन्धनबाट आएको प्रतिक्रियाको आलोचना गरेका छन् । उनले सत्तारुढ गठबन्धनले राष्ट्रपतिको आलोचना गरेर अपमान गरेको पनि ओलीको आरोप थियो ।

पार्टी केन्द्रीय कार्यालयमा बिहीबार आयोजित कार्यक्रममा ओलीले नागरिकता विधेयकलाई पुनर्विचार गर्न भनेर राष्ट्रपतिले पठाउँदा सत्ता गठबन्धनले जस्ताको तस्तै पारित गर्ने कुरा गर्नु ठीक नभएको बताए ।सत्तारुढ गठबन्धनले जनतालाई अल्मल्याइरहेको र मस्तिष्कबाट नभई 'मसल' बाट चलेको पनि उनको आरोप थियो । 'राष्ट्रपतिज्यूले पुनर्विचार गर्ने कि भन्नुभयो । नगर्ने (आफ्नै पाखुरा सुर्क्याउँदै) उहाँहरूको त्यस्तो विचार छ । बाहिर बसेर, अनाडी मान्छे भेला भएर, अनधिकृत ठाउँमा, संविधानले नचिनेका मान्छे बसेर राष्ट्रपतिको मजाक उडाउने काम भयो,' ओलीले भने, 'असभ्यता, कुसंस्कार, अलोकतान्त्रिक संस्कारको निर्लज्ज प्रयोग यो गठबन्धनले गरिरहेको छ । यसले आफ्नो महानता राष्ट्रपतिको अपमान गर्नु ठानेको छ ।' ओलीले राष्ट्रपतिलाई कुन विधेयक संसद्‍मा लैजाने भन्नेबारे पहिल्यै जानकारी गराउनुपर्ने संवैधानिक व्यवस्था उल्लंघन गरेको पनि आरोप लगाए । संविधानको धारा ८१ मा राष्ट्रपतिलाई विधेयक, वैदेशिक मामिला लगायतका विषयमा जानकारी गराउनुपर्ने व्यवस्था छ । 'मैले संसद्‍मा १ वर्षअगाडि नै बोल्दा भनेको थिए संविधानको धारा ८१ तर्फ ध्यान जाओस्, संविधानको पालना सरकारले गरोस् । संविधानले विधेयकहरू संसद्‍मा पेस गर्नु अगाडि राष्ट्रपतिसँग परामर्श गर्नुपर्छ, स्वीकृत गर्नुपर्छ । राष्ट्रपतिलाई ब्रिफिङ गर्नुपर्छ,' उनले भने । सरकारले संविधानको उक्त व्यवस्था पालना नगरेको ओलीको दाबी छ ।

प्रकाशित : आश्विन ६, २०७९ १६:२४
पूरा पढ्नुहोस्
प्रतिक्रिया
पठाउनुहोस्
x
×