बाँकेमा फेरि बढ्दै कोरोना संक्रमण
नेपालगन्ज — बाँकेमा कोरोना संक्रमितको संख्या बढ्न थालेको छ । गत असारयता संक्रमितको संख्या बढेको देखिन थालेको हो । जिल्लाका विभिन्न प्रयोगशालामा भएको परीक्षणमा मंगलबार मात्रै २५ जनामा कोरोना संक्रमण पुष्टि भएको छ । संक्रमण पुष्टि भएका मध्ये २१ जना बाँकेका हुन् भने चार जना अन्य जिल्लाका छन् । सोमबार भारतबाट आएका सात जनामा कोरोना संक्रमण पुष्टि भएको थियो ।
गत वैशाख र जेठमा यहाँ कोरोना संक्रमितको संख्या शून्यमा रहेको थियो । जिल्ला कोभिड–१९ संकट व्यवस्थापन केन्द्रका फोकल पर्सन तेज वलीले चौथो लहरमा कोरोना संक्रमण भएका सबैजसो होम आइसोलेसनमा बसिरहेको बताए । ‘स्थानीय स्वास्थ्य चौकी इन्चार्जलाई कोरोना फोकल पर्सन तोकिएको छ, उहाँहरूले नै फलोअप गर्नुहुन्छ,’ उनले भने, ‘सबै स्थानीय तहमा आइसोलेसन तयारी अवस्थामा छन् । कुनै समस्या आयो भने आइसोलेसनमा बस्न व्यवस्थापन गरेका छौं ।’
जिल्लाका ८ वटै पालिकामार्फत कोरोना परीक्षण भइरहेको वलीले जानकारी दिए । अहिले संक्रमणबाट बच्न मास्क लगाउने, सामाजिक दूरी, साबुनपानीले हात धुने, सेनिटाइजरको प्रयोग गर्नेजस्ता स्वास्थ्य मापदण्ड पालना गर्न जरुरी रहेको उनले बताए । भारतीय नाका हुँदै नेपाल भित्रिनेमा संक्रमण धेरै देखिन थालेको उनले बताए । नेपालगन्जको जमुनाह नाकास्थित हेल्थ डेस्कका ल्याब टेक्निसियन चिरञ्जीवी ज्ञवालीका अनुसार सोमबार नाकामा १ सय १९ जनाको परीक्षण गर्दा सात जनामा कोरोना संक्रमण भेटिएको छ । संक्रमितमध्ये दुई जना बाँकेका छन् । तेस्रो मात्रा खोप लगाएका व्यक्तिमा समेत संक्रमण देखिएको उनले बताए । ज्ञवालीका अनुसार असारयता नाकामा ६ हजार जनाको कोरोना परीक्षण
गरिएकामा १ सय ५० जनामा संक्रमण पुष्टि भएको छ । उनका अनुसार भारतको बैंग्लोर, गुजरात, कालापहाडलगायत ठाउँबाट आएका व्यक्तिमा संक्रमण बढी देखिएको छ ।
जिल्लामा बुधबारसम्म कोरोना संक्रमितको संख्या २१ हजार २ सय ४३ पुगेको छ । तीमध्ये २० हजार ८ सय १७ जना निको भइसकेका छन् । अहिले जिल्लामा ७३ जना सक्रिय संक्रमित रहेका छन् । उनीहरू सबै होम आइसोलेसनमा छन् । कोरोना महामारीबाट अहिलेसम्म जिल्लामा ३ सय ५३ जनाले ज्यान गुमाइसकेका छन् ।
भेरी अस्पतालका फिजिसन चिकित्सक राजन पाण्डेले अहिले कोरोनाको खोप लगाएका र नलगाएका दुवैमा संक्रमण देखिएको बताए । ‘अहिलेको ज्वरोमा कोरोना मात्र छैन, धेरै जना कोरोना भन्दै उपचार नगराएर घरमा बसिरहनुभएको छ,’ उनले भने, ‘अहिलेको ज्वरोमा मलेरिया, डेंगु स्क्रब टाइपस पनि देखिएकाले स्वास्थ्य संस्थामा जँचाएर मात्रै औषधि सेवन गर्नु आवश्यक देखिएको छ ।’ संक्रमण भएका दीर्घरोगीमा निमोनिया देखिए पनि अन्यमा समस्या नरहेको पाण्डेले सुनाए । ‘संक्रमणपछि गम्भीर भएर अस्पताल भर्ना हुनुपर्ने अवस्थाका बिरामी धेरै छैनन्,’ उनले भने, ‘खोप नलगाएकालाई अलि बढी समस्या देखिएको छ ।’
प्रकाशित : श्रावण २६, २०७९ ०८:३४
